އިސްލާމީ ފަތުވާދޭ އެންމެ މަތީ މަޖިލީހަށް ރައީސުލްޖުމްހޫރިއްޔާ 3 ބޭފުޅަކު ޢައްޔަންކުރައްވައިފި
އިސްލާމީ ފަތުވާދޭ އެންމެ މަތީ މަޖިލީހަށް ރައީސުލްޖުމްހޫރިއްޔާ 3 ބޭފުޅަކު ޢައްޔަންކުރައްވައިފިއެވެ.
"ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤާނުނު" ގެ ދަށުން، ”އިސްލާމީ ފަތުވާދޭ އެންމެ މަތީ މަޖިލިސް“ގެ ނަމުގައި މަޖިލީހެއް އުފައްދަވާފައިވަނީ 25 އޭޕްރިލް 2016 ގައެވެ.
5 މެންބަރުންގެ މައްޗަށް އެކުލެވޭ އިސްލާމީ ފަތުވާދޭ މަޖިލީހުގައި ހިމެނިވަޑައިގަންނަވަނީ ރައީސުލްޖުމްހޫރިއްޔާ ޢައްޔަންކުރައްވާ 3 މެމްބަރުންނާއި، ދިވެހިރާއްޖޭގެ ޤައުމީ ޔުނިވަރސިޓީ ނުވަތަ އިސްލާމިކް ޔުނިވަރސިޓީގެ އެކަޑަމިކް މުވައްޒަފުންގެ ތެރެއިން، ރައީސުލްޖުމްހޫރިއްޔާ ޢައްޔަންކުރައްވާ މެންބަރަކާއި ދިވެހިރާއްޖޭގެ ޝަރުޢީ ކޯޓުތަކުގެ ފަނޑިޔާރުންގެ ތެރެއިން، އުއްތަމަ ފަނޑިޔާރުގެ ލަފާގެ މަތިން ޢައްޔަންކުރައްވަން ޖެހިވަޑައިގަންނަވާ މެންބަރެވެ.
ނަމަވެސް ބައެއް މެމްބަރުންގެ ދައުރު ހަމަވުމާ ގުޅިގެން ވޭތުވެދިޔަ 2 އަހަރު، މި މަޖިލީހުގެ 4 މެމްބަރެއްގެ މަޤާމު އޮތީ ހުސްވެފައެވެ. އަދި އެ މަޖިލީހުގައި މިހާތަނަށް އިންނެވީ އެންމެ މެންބަރެކެވެ. އެއީ ރައީސް ޢައްޔަންކުރައްވާ 3 މެމްބަރުންގެ ތެރޭގައި ހިމެނިވަޑައިގަންނަވާ، އެ މަޖިލީޙުގެ ރައީސްގެ ފަޟީލަތުލް އުސްތާޛުއްޝައިޚް ޑރ. މުޙައްމަދު ރަޝީދު އިބްރާހީމެވެ.
ރައީސް އޮފީޙުން ވިދާޅުވީ އިސްލާމީ ފަތުވާދޭ އެންމެ މަތީ މަޖިލީހުން ހުސްވެފައިވާ 4 މަޤާމުގެ ތެރެއިން ރައީސުލްޖުމްހޫރިއްޔާ ޢައްޔަންކުރައްވަންޖެހޭ 3 ބޭފުޅުން ޢައްޔަންކުރައްވާފައިވާ ކަމަށެވެ. ފަތުވާ މަޖިލީހަށް އަލަށް ޢައްޔަންކުރެއްވި 3 ބޭފުޅުންނަކީ، ޑރ.އަބްދުސައްތާރް ޢަބްދުއްރަޙްމާނާއި ޑރ.އިބްރާހީމް ޒަކަރިއްޔާ މޫސާ އާއި އައްޝައިޚް އިލްޔާސް ޙުސައިނެވެ.
ކޮމިޓީގައި މިހާރު ހުސްކޮށް އޮތީ ދިވެހިރާއްޖޭގެ ޝަރުޢީ ކޯޓުތަކުގެ ފަނޑިޔާރުންގެ ތެރެއިން، އުއްތަމަ ފަނޑިޔާރުގެ ލަފާގެ މަތިން ޢައްޔަންކުރައްވަން ޖެހިވަޑައިގަންނަވާ މެންބަރެވެ.
އިސްލާމީ ފަތުވާދޭ މަޖިލީހަކީ ދިވެހިރާއްޖޭގައި ދީނީގޮތުން ޚިޔާލު ތަފާތުވުން އުފެދޭ ކަންކަމުގައި، ސަރުކާރަށާއި ދިވެހި ރައްޔިތުންނަށް ބޭނުންވާނެ އެކިއެކި ދީނީ ފަތުވާދެއްވުމަށާއި، ފިޤުހީ އައު މައްސަލަތަކުގެ ދިރާސާތައް ކުރުމަށާއި، އެކަންކަމާގުޅޭ ދީނީ ލަފާޔާއި އިރުޝާދުދެއްވުމެވެ.
މި މަޖިލިސް ހިންގަވަނީ މިނިސްޓްރީ އޮފް އިސްލާމިކް އެފެއަރޒުގެ ބެލެނިވެރިކަމުގެ ދަށުންނެވެ.