އަފްޣާނިސްތާނުގެ ކުރިމަގާ ގުޅޭ ގޮތުން މަޝްވަރާކުރުމަށް އ.ދއިން އިސްނަގައިގެން ޤަޠަރުގެ ވެރިރަށް ދޯހާގައި މުހިންމު މަޝްވަރާތަކެއް ފަށައިފިއެވެ. މި ބައްދަލުވުންތައް ކުރިއަށް ދަނީ އަފްޣާނިސްތާނުގައި މިހާރު ވެރިކަން ކުރަމުންދާ ޠާލިބާނުންގެ ބައިވެރިވުމާ ނުލައެވެ. މި ބައްދަލުވުންތަކުގައި ބައިވެރިވުމަށް އ.ދއިން ތާލިބާނުންނަށް ދަޢުވަތު ދީފައެއް ނުވެއެވެ.
އ.ދގެ އިތުރުން 25 ޤައުމަކުން ބައިވެރިވާ މި ބައްދަލުވުންތަކުގެ ބައިވެރިންގެ ތެރޭގައި އެމެރިކާއާއި، ޗައިނާއާއި، ރަޝިޔާއާއި ޕާކިސްތާނުގެ އިތުރުން ވިލާތުގެ ޤައުމުތައި ވެސް ހިމެނެއެވެ. ދެ ދުވަހުގެ މުއްދަތަށް ކުރިއަށްދާ މި ބައްދަލުވުންތައް ބާއްވަނީ އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝްގެ އިސްނެންގެވުމުގެ މަތިންނެވެ.
މި ބައްދަލުވުންތަކަށް ޠާލިބާނުންނަށް ދަޢުވަތު އަރުވާފައި ނުވަނީ، އެ ޤައުމުގެ ރައްޔިތުންގެ އިންސާނީ ހައްޤުތައް ޠާލިބާނުން އަރައިގަންނަމުން ދާތީއެވެ. ޚާއްޞަކޮށް، އަންހެނުންގެ ހައްޤުތައް ނިގުޅައިގަތުމުގެ ސަބަބުންނެވެ. ޠާލިބާނުން ވަނީ އަންހެނުންނާއި އަންހެން ކުދިންނަށް މަތީ ތަޢުލީމު ހޯދުމާއި ވަޒީފާގެ މައިދާނުގައި ހަރަކާތްތެރިވުމަށް ހުރި ދޮރުތައް ބަންދުކޮށްފައެވެ. މަދަނީ ޖަމުޢިއްޔާތަކުގައި މަސައްކަތް ކުރުން ވެސް އަންހެނުންނަށް އޮތީ މަނާކޮށްފައެވެ.
މި ބައްދަލުވުންތަކާ ގުޅޭ ގޮތުން ޠާލިބާނުންގެ ސަރުކާރުގެ ތަރުޖަމާނުގެ ނައިބު ބިލާލް ކަރީމީ ބުނީ، ބައިނަލްއަޤުވާމީ މުޖުތަމަޢާ އެކު ގާތް ގުޅުމެއް ބާއްވަން ޠާލިބާނުން ބޭނުންވާ ކަމުގައެވެ. ނަމަވެސް، އަފްޣާނިސްތާނުގެ ދާޚިލީ ކަންކަމާ ބައިނަލްއަޤުވާމީ މުޖުތަމަޢުން ބަސްބުނުން ބަލައިނުގަނެވޭނެ ކަމުގައި އޭނާ ބުންޏެވެ. އަދި، އެ ޤައުމުގެ ދާޚިލީ ކަންކަމަކީ ބައިނަލްއަޤުވާމީ މުޖުތަމަޢާ ޠާލިބާނުންނާ ދެމެދު އޮތް ހުރަހަކަށް ވެގެން ނުވާނެ ކަމަށް ވެސް އޭނާ ބުންޏެވެ.
އަފްޣާނިސްތާނުގެ ކުރިމަގާ ގުޅޭ ގޮތުން މަޝްވަރާ ކުރުމަށް އ.ދއިން އިސްނަގައިގެން ބައްދަލުވުންތަކެއް ބާއްވަން އުޅުމުން، އެ ޤައުމުގެ އަންހެނުންގެ ހައްޤުގައި މަސައްކަތް ކުރާ ގުރޫޕަކުން ވަނީ އ.ދއަށް ސިޓީއެއް ފޮނުވާފައެވެ. އަންހެނުންގެ ހައްޤުތަކަށް ޠާލިބާނުން އަރައިގަންނަމުންދާއިރު، ޠާލިބާނުންގެ ސަރުކާރު ބަލައިނުގަތުމަށް އެ ގުރޫޕުން ވަނީ އ.ދއާއި ބައްދަލުވުންތަކުގެ އެހެން ބައިވެރިންނަށް ގޮވައިލާފައެވެ. މި ކަމާ ގުޅޭ ގޮތުން އ.ދއާއި އެމެރިކާއިން ބުނީ ޠާލިބާނުންގެ ސަރުކާރު ބަލައިގަތުމާ މެދު ބައްދަލުވުންތަކުގައި މަޝްވަރާކުރަން ހަމަޖެހިފައި ނުވާ ކަމުގައެވެ.
ނަމަވެސް، ޠާލިބާނުންގެ ސަރުކާރު ބަލައިގަތުމަށް ބާރުއަޅައި އ.ދގެ ސެކްރެޓަރީ ޖެނެރަލްގެ ނައިބު އާމިނާ މުޙައްމަދު ދާދިފަހުން ވަނީ ވާހަކަފުޅު ދައްކަވާފައެވެ. މި ކަމާ ގުޅޭ ގޮތުން އ.ދއިން ބުނީ، ޠާލިބާނުންގެ ވެރިކަން ބަލައިގަތުމަށް އާމިނާ ގޮވައިލައްވާފައި ނުވާ ކަމަށާއި، އޭނާ ވިދާޅުވި ބަސްފުޅުން އެފަދައިން ދޭހަވުމަކީ އޮޅުމެއް ކަމުގައެވެ. އެއްވެސް ޤައުމަކުން މިހާތަނަށް ޠާލިބާނުންގެ ސަރުކާރު ބަލައިގަނެފައި ނުވާއިރު، އަފްޣާނިސްތާނަކީ އ.ދގެ މެންބަރު ޤައުމެއްގެ ގޮތުގައި ކަނޑައެޅުމުގެ ބާރު ލިބިފައި ވަނީ އ.ދގެ ޢާންމު މަޖިލީހަށެވެ.
ދޯހާގައި ބާއްވަމުންދާ ބައްދަލުވުންތަކަށް ޠާލިބާނުންނަށް ދަޢުވަތު އަރުވާފައި ނުވި ނަމަވެސް، ދޯހާއި ހުންނަ ޠާލިބާނުންގެ އޮފީހުގެ އިސް އޮފިޝަލެއް ކަމުގައިވާ ސުޙައިލް ޝާހީން ވަނީ، ބައްދަލުވުމަށް ދޯހާއަށް ދަތުރުކުރި ބައެއް ޤައުމުތަކުގެ އިސްވެރިންނާ ބައްދަލު ކުރައްވާފައެވެ. އެ ޤައުމުތަކުގެ ތެރޭގައި އިނގިރޭސިވިލާތާއި ޗައިނާގެ ވަފްދުގެ އިސް ބޭފުޅުން ހިމެނެއެވެ.
އަފްޣާނިސްތާނުގެ އިންތިޚާބީ ސަރުކާރު ޠާލިބާނުން ވައްޓައިލާފައި ވަނީ 2021 ވަނަ އަހަރުގެ އޮގަސްޓު މަހުއެވެ. އެއަށްފަހު، ވެރިކަމަށް އިސްވެ، ޠާލިބާނުން ވަނީ އެ ޤައުމުގެ ރައްޔިތުންގެ ގިނަ ހައްޤުތަކެއް ނިގުޅައިގަނެފައެވެ. މީގެ ތެރޭގައި އަންހެން ކުދިންނަށް މަތީ ސާނަވީ ތަޢުލީމާއި މަތީ ތަޢުލީމު ހާސިލުކުރުން މަނާ ކުރުން ހިމެނެއެވެ. އަދި، މަދަނީ ޖަމުޢިއްޔާތަކާއި އ.ދގެ އޮފީސްތަކުގައި ވެސް އަންހެނުންނަށް މަސައްކަތް ކުރުން ވަނީ މަނާކޮށްފައެވެ.