ޗައިނާގެ ރައީސް ޝީ ޖިންޕިންގާއި ޔޫކްރެއިންގެ ރައީސް ވޮލޮޑޮމީރް ޒެލެންސްކީ ފޯނުން ގުޅުއްވައި ވާހަކަފުޅު ދައްކަވައިފިއެވެ. މިއީ، ރަޝިޔާ ސިފައިން ޔޫކްރެއިނަށް ފޮނުވައިގެން ހަނގުރާމަ ފެށި ފަހުން ޝީއާއި ޒެލެންސްކީއާ ދެ ބޭފުޅުން ވާހަކަފުޅު ދައްކަވާފައިވާ ފުރަތަމަ ފަހަރެވެ. ރަޝިޔާ ސިފައިން ޔޫކްރެއިނަށް އަރާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ.
އެއް ގަޑިއިރަށް ދެމިގެންދިޔަ ފޯން ކޯލުގައި ޝީ ވަނީ ރަޝިޔާއާއި ޔޫކްރެއިނާ ދެމެދު ސުލްޙައިގެ މަޝްވަރާތައް ފެށުމާ ގުޅޭ ގޮތުން ވާހަކަފުޅު ދައްކަވާފައެވެ. ސުލްޙައިގެ މަޝްވަރާތަކަށް ފުރުޞަތު ދޭނެ ކަމަށް ރަޝިޔާއިން ބުނަމުން ދިޔަ ނަމަވެސް، މަޝްވަރާކުރަން ޔޫކްރެއިނުން ދެކޮޅު ހަދަމުންދާ ކަމުގައި ރަޝިޔާއިން ބުނެއެވެ.
ރަޝިޔާ-ޔޫކްރެއިން ހަނގުރާމައިގައި ޗައިނާއިން އިސްކޮށްފައި ވަނީ މެދު މިނުގެ ސިޔާސަތެކެވެ. ވަކި ފަރާތަކަށް ތާޢީދުކުރާ ކަން ހާމަކޮށްފައެއް ނުވެއެވެ. ހަނގުރާމަ ކުށްވެރިކޮށްފައެއް ވެސް ނުވެއެވެ. އަދި، ހަނގުރާމައިގައި އަސްކަރީ ގޮތުން އެއްވެސް ފަރާތަކަށް މަދަދުވެރިވެދީފައެއް ވެސް ނުވެއެވެ. ނަމަވެސް، ޗައިނާއިން ދަނީ ރަޝިޔާއާ އެކު އެހެން ދާއިރާތަކުން ގާތް ގުޅުމެއް ބާއްވަމުންނެވެ.
ހަނގުރާމަ ހުއްޓައިލަން ރަޝިޔާއަށް ބާރުއަޅަށް ބައިނަލްއަޤުވާމީ މުޖުތަމަޢުން ޗައިނާއަށް ގޮވައިލުމުން ޗައިނާއިން ވަނީ ހަނގުރާމަ ހުއްޓައިލުމަށް އަމަލުކުރާނެ 12 ނުކުތާގެ މައްޗަށް އެކުލެވިގެންވާ ހުށަހެޅުމެއް ނުވަތަ ޕްލޭނެއް ހުށަހަޅާފައެވެ. އެއީ މި އަހަރުގެ ފެބުރުވަރީ މަހެވެ. ނަމަވެސް، އެ ހުށަހެޅުމަކީ ރަޝިޔާއަށް ފައިދާވާ ގޮތަށް އޮތް އެއްޗެއް ކަމުގައި ހުޅަނގުން ވަނީ ތުހުމަތުކޮށްފައެވެ. އެއަށްފަހު، ޝީ ވަނީ ރަޝިޔާއަށް ވަޑައިގަންނަވައި، ރައީސް ވްލަޑިމިޔަރ ޕުޓިންއާ ވެސް ބައްދަލު ކުރައްވާފައެވެ.
"ޝީއާ އެކު ދެކެވުނީ ވަރަށް ބޭނުންތެރި މަޝްވަރާތަކެއް. މަޝްވަރާތަކަށް ފަހު، އަދި ޗައިނާއަށް ޔޫކްރެއިނުން ސަފީރެއް ކަނޑައެޅުމުން، ދެ ޤައުމުގެ ދެމެދުގައި ގުޅުންތައް ބަދަހިކުރަން ފަސޭހަވެގެން ދާނެ،" ޝީއާ އެކު ފޯނުން ކުރެއްވި މަޝްވަރާތަކާ ގުޅޭ ގޮތުން ޒެލެންސްކީ ވިދާޅުވިއެވެ.
ދެ ބޭފުޅުންގެ މަޝްވަރާތަކާ ގުޅޭ ގޮތުން ޗައިނާގެ ދަޢުލަތުގެ މީޑިޔާ ސީ.ސީ.ޓީ.ވީން ބުނީ، ދެ ބޭފުޅުން ފޯނުން މަޝްވަރާ ކުރައްވާފައި ވަނީ ޒެލެންސްކީގެ އެދިވަޑައިގެންނެވުމުގެ މަތިން ކަމުގައެވެ. އަދި، ހަނގުރާމަ ނިމުމަކަށް ގެނައުމަށް އޮތް ހަމައެކަނި ގޮތަކީ މަޝްވަރާގެ މަގު ކަމުގައި ޒެލެންސްކީގެ އަރިހުގައި ޝީ ވިދާޅުވި ކަމުގައެވެ.
ޗައިނާއިން އަބަދު ވެސް އިސްކުރާނީ ސުލްޙައިގެ މަގު ކަމުގައި ޝީ ވިދާޅުވި ކަމަށް ވެސް ސީ.ސީ.ޓީ.ވީން ރިޕޯޓުކުރެއެވެ. އަދި، ހަނގުރާމައިގައި ނިއުކްލިޔަރ ހަތިޔާރު ބޭނުންކުރުމާ ދެކޮޅަށް ޝީ ވާހަކަފުޅު ދައްކަވާފައިވާ ކަމުގައި ވެސް ސީ.ސީ.ޓީ.ވީން ބުންޏެވެ. ހަނގުރާމަ ނިމުމަކަށް ގެންނާނެ ގޮތަކާ މެދު ޔޫކްރެއިނާ އެކު މަޝްވަރާ ކުރުމަށް ޗައިނާގެ ޚާއްޞަ ވަފުދެއް ޔޫކްރެއިނަށް ފޮނުވުމަށް ދެ ބޭފުޅުން އެއްބަސްވެފައިވާ ކަމުގައި ވެސް ރިޕޯޓުތައް ބުނެއެވެ.