އިންޑިއާގެ ބޭރު ފައިސާގެ ރިޒާރވަށް މި މަހުގެ 14 ވަނަ ދުވަހުގެ ނިޔަލަށް 1.657 ބިލިއަން އެމެރިކާ ޑޮލަރު އިތުރުވެ، 586 ބިލިއަން އެމެރިކާ ޑޮލަރަށް އަރާފައިވާކަމަށް އެގައުމުގެ މަރުކަޒީ ބޭންކް، އާރުބީއައިއިން އާންމުކުރި ތަފާސް ހިސާބުތަކުން ދައްކައިފިއެވެ.
މިއީ ވިދިވިދިގެން މިގޮތަށް ރިޒާވަށް ލިބޭ އާމްދަނީ އިތުރުވާ ދެވަނަ ހަފްތާކަމަށްވެސް އާރްބީއައިއިން ބުނެއެވެ. މީގެކުރިން އެ ޤައުމުގެ ޖުމްލަ ރިޒާރވް 6.306 ބިލިއަން އެމެރިކާ ޑޮލަރަށް އިތުރުވެ، 584 ބިލިއަން އެމެރިކާ ޑޮލަރަށް އަރާފައިވެއެވެ.
އާރުބީއައިއިން ހަފްތާއަކު އެއް ފަހަރު އާންމުކުރާ ހިސާބުތަކުން ދައްކާގޮތުގައި މި މަހުގެ 14 ވަނަ ދުވަހުގެ ނިޔަލަށް ރިޒާރވްގެ ބޮޑު ބައެއް ކަމަށްވާ ބޭރު ފައިސާގެ އެސެޓަށް 2.204 ބިލިއަން އެމެރިކާ ޑޮލަރު އިތުރުވެ، 516 ބިލިއަން ޑޮލަރަށް ވަނީ އަރާފައެވެ.
މީގެއިތުރުން އިންޑިއާގެ ރަނުގެ ރިޒާރވް 521 މިލިއަން އެމެރިކާ ޑޮލަރު ދަށްވެ، 46.1 ބިލިއަން އެމެރިކާ ޑޮލަރަށް އަރާފައިވާކަމަށްވެސް އާރުބީއައިއިން ބުނެއެވެ. ސްޕެޝަލް ޑްރޯއިން ރައިޓްސް، އެސްޑީއާރު 38 މިލިއަން އެމެރިކާ ޑޮލަރު ދަށްވެ، 18.4 ބިލިއަން އެމެރިކާ ޑޮލަރަށް އަރާފައިވާކަމަށްވެސް އެޕެކްސް ބޭންކުން ބުނެއެވެ.