ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ޙަމަލާ ބަދަލުކުރުން މެދުކަނޑައިލަން އަނެއްކާ ވެސް އެއްބަސްވެއްޖެއެވެ. އެ ކަން އިޢުލާނު ކުރައްވާފައި ވަނީ އެމެރިކާގެ ޚާރިޖީ ވަޒީރު އެންތަނީ ބްލިންކަންއެވެ. މި ފަހަރު ޙަމަލާ ބަދަލުކުރުން މެދުކަނޑައިލަން އެއްބަސްވެފައި ވަނީ 72 ގަޑިއިރުގެ މުއްދަތަކަށެވެ.
އަސްކަރިއްޔާއާއި އާރް.އެސް.އެފުން މީގެ ކުރިން ވެސް ދެ ފަހަރެއްގެ މަތިން މި ކަމަށް އެއްބަސްވިއެވެ. ނަމަވެސް، އެ އެއްބަސްވުމަށް އަމަލުކޮށްފައެއް ނުވެއެވެ. ބްލިންކަން ވިދާޅުވީ، ދެ ފަރާތުން ޙަމަލާ ބަދަލުކުރުން މެދުކަނޑިލަން އެއްބަސްވީ 48 ގަޑިއިރަށް ދެމިގެންދިޔަ މަޝްވަރާތަކަކަށް ފަހުގައި ކަމުގައެވެ. އެ މަޝްވަރާތަކުގައި މެދުވެރިއެއްގެ ދައުރު އަދާކޮށްފައި ވަނީ އެމެރިކާއިންނެވެ.
ސޫދާންގެ އަސްކަރިއްޔާއާއި އާރް.އެސް.އެފްގެ ފައުޖުތަކާ ދެމެދު ހަނގުރާމަ ކުރަން ފަށާފައި ވަނީ އޭޕްރިލް މަހުގެ 15 ވަނަ ދުވަހު ވެރިރަށް ޚަރްތޫމަށް އަރައި ރިޔާސީ ގަނޑުވަރު ހިސާރުކުރަން އާރް.އެސް.އެފުން މަސައްކަތް ފެށުމުންނެވެ. މި ހަނގުރާމައިގައި މިހާތަނަށް 420 އަށްވުރެ ގިނަ މީހުން މަރުވެފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ބުނެއެވެ. އަދި، 3,000 އަށްވުރެ ގިނަ މީހުން ވަނީ ޒަޚަމުވެފައެވެ.
ޚަރްތޫމްގެ އިތުރުން އާބާދީ ބޮޑެތި އެހެން ސަރަޙައްދުތަކުގައި ވެސް އަސްކަރިއްޔާއާއި އާރް.އެސް.އެފުން ދަނީ ހަނގުރާމަ ކުރަމުންނެވެ. މީގެ ތެރޭގައި ހަމަނުޖެހުން ބޮޑު ދާރްފޫރު ސަރަޙައްދު ވެސް ހިމެނެއެވެ. ދެ ފަރާތުގެ ޙަމަލާތައް އަމާޒުކޮށްފައިވާ ތަންތަނުގެ ތެރޭގައި ކަރަންޓާއި ފެނުގެ ޚިދުމަތް ފޯރުކޮށްދިނުމަށް ބޭނުންކުރާ ވަސީލަތްތައް ހިމެނެއެވެ.
ހަނގުރާމައާ ގުޅިގެން ޚަރްތޫމްގެ ބޮޑު ސަރަޙައްދަކުން ކަރަންޓާއި ފެނުގެ ޚިދުމަތް މެދުކެނޑިފައިވާއިރު، ކާބޯތަކެއްޗާއި އެހެނިހެން ޒަރޫރީ ސާމާނު ވެސް ވަނީ ހުސްވެފައެވެ. އަދި، ފަސް މިލިޔަނެއްހާ މީހުންގެ އާބާދީއެއް އޮންނަ ޚަރްތޫމްގެ ގިނަ ރައްޔިތުން ވަނީ ހާލުގައި ޖެހިފައެވެ. ނީލަ ކޯރުން ފެން ނަގައިގެން ބޭނުން ކުރުމަށް ވެސް ބައެއް މީހުންނަށް ވަނީ މަޖުބޫރުވެފައެވެ. އިންޓަރނެޓުގެ ޚިދުމަތް ވެސް ވަނީ މެދުކެނޑިފައެވެ.
ޙަމަލާ ބަދަލުކުރުން މެދުކަނޑައިލުމުގެ މަޤުޞަދަކީ، ޚަރްތޫމާއި އެހެނިހެން ބޮޑެތި ރަށްތަކުގައި ހާލުގައި ޖެހިފައިވާ މީހުންނަށް ރައްކާތެރި ސަރަޙައްދުތަކަށް ބަދަލުވުމަށް ފުރުޞަތު ދިނުމެވެ. އަދި، އެ ޤައުމުގައި ތިބި ބޭރު ޤައުމުތަކުގެ ޚާރިޖިއްޔާތަކުގެ މުވައްޒަފުންނާއި ރައްޔިތުން އެ ޤައުމުން ބޭލުމުގެ ފުރުޞަތު ފަހިކޮށްދިނުމެވެ. ގިނަ ޤައުމުތަކެއްގެ މުވައްޒަފުންނާއި ރައްޔިތުން މިހާރު ވެސް ވަނީ އެ ޤައުމުން ބާލާފައެވެ.
ސޫދާނުގައި ދިރިއުޅޭ 10,000 އަށްވުރެ ގިނަ މީހުން މިހާރު ވެސް ވަނީ ޖެހިގެން އޮތް ދެކުނު ސޫދާނަށް ހިޖުރަކޮށްފައެވެ. މީގެ ތެރޭގައި ގިނައީ ސޫދާނުގައި ދިރިއުޅޭ ދެކުނު ސޫދާނުގެ ރެފިޔުޖީންނެވެ. އަދި، ސޫދާނުގެ އެތަކެއް ހާސް ރެފިޔުޖީން ވަނީ އަވަށްޓެރި އެހެން ޤައުމުތަކަށް ވެސް ހިޖުރަކޮށްފައެވެ.
ސޫދާނުގައި ދާޚިލީ ހަމަނުޖެހުން ހަނގުރާމައަކަށް ބަދަލުވެފައި މި ވަނީ، އަސްކަރިއްޔާގެ އިސްވެރިޔާ ޖެނެރަލް ޢަބްދުލް ފައްތާޙް އަލް-ބުރްހާނާއި އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ހަމްދާން ދަގަލޯއާ ދެމެދު އޮތް ވެރިކަމުގެ ތަޅާފޮޅުމުގެ ތެރެއިންނެވެ. އެ ޤައުމުގައި ވެރިކަން ކުރަމުންދާ އިންތިގާލީ ކައުންސިލުގައި އެންމެ އިސް ދައުރެއް އަދާކުރަނީ ޖެނެރަލް އަލް-ބުރްހާނެވެ. އަދި، ދަގަލޯ މަސައްކަތް ކުރަނީ އޭނާގެ ނައިބެއްގެ ގޮތުގައެވެ.
ސޫދާނުގައި މަދަނީ ވެރިކަމެއް ގާއިމުކުރަން ދެ މީހުން ވެސް ކުރިން ވަނީ އެއްބަސްވެފައެވެ. ދަގަލޯ ބޭނުން ވަނީ 100,000 މީހުން ހިމެނޭ އާރް.އެސް.އެފްގެ ފައުޖަކީ އަސްކަރިއްޔާގެ ބަޔަކަށް ހަދާށެވެ. އަދި، އަސްކަރިއްޔާގެ ބާރުވެރިކަން ހޯދާށެވެ. ނަމަވެސް، ޖެނެރަލް އަލް-ބުރްހާން ގެންދަވަނީ އެ ކަމާ ދެކޮޅު ހައްދަވަމުންނެވެ. އަދި، ވެރިކަމުގެ ބާރުތައް ހަވާލު ކުރެވޭނީ އިންތިޚާބީ ސަރުކާރަކަށް ކަމުގައި ވިދާޅުވަމުންނެވެ.