ކާޑުގެ ބާވަތްތައް ގުދަންކުރާ ތަންތަން ރަޖިސްޓްރީކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީން އަންގަވައިފިއެވެ.
އެފްޑީއޭއިން ވިދާޅުވީ، ގުދަންތައް އެ އޮތޯރިޓީގައި ރަޖިސްޓްރީކުރަން އަންގަވައިފައިވަނީ، ކާޑުގެ ބާވަތްތަކުގެ ރައްކާތެރިކަން ކަށަވަރުކުރުމަށް ރެގިއުލޭޓް ކުރެވޭނެ ނިޒާމު ހަރުދަނާކުރެއްވުމަށް ކަމަށެވެ.
ހަނޑޫ، ހަކުރު، ފުށަކީ ރާއްޖޭގައި ސްޓޭޕަލް ފުޑް ނުވަތަ ކާޑުގެ ބާވަތްތަކުގެ ގޮތުގައި ޢާއްމުކޮށް ކައިއުޅޭ ބާވަތްތަކެވެ. މި ތަކެއްޗަކީ ބޮޑެތި އަދަދުތަކުން ގަނޑުކޮށް ރާއްޖެ އެތެރެކުރާ ބާވަތްތަކެވެ.
ކާޑުގެ ބާވަތްތައް ރައްކާތެރިކުރާ ގުދަންތައް ޗެކްކުރެއްވުމުގެ މަސައްކަތްތައް އެފްޑީއޭއިން މީގެކުރިން ވެސް ކުރަމުއްވަމުން އައިސްފައިވެއެވެ. ނަމަވެސް އެފަދަ ތަންތަން ރަޖިސްޓްރީކުރުމަށް އަންގާފައި މިވަނީ "ރައްކާތެރިގޮތުގައި ކާބޯތަކެތި ގެންގުޅުމާއި، އެތަކެތި އެއްތަނުން އަނެއްތަނަށް އުފުލުމާއި ގުދަންކުރުމުގައި ޢަމަލު ކުރާނެ ގޮތުގެ މިންގަނޑު" ގެ ދަށުންނެވެ. މިއީ ކާބޯތަކެތީގެ ރައްކާތެރިކަން ބެލެހެއްޓުމަށް ކުރާ މަސައްކަތުގައި، އެކަން ކަށަވަރުކުރުމަށް އެމްއެފްޑީއޭއިން އެކުލަވާލާފައިވާ މިންގަނޑެކެވެ.
މިފަދަ ތަންތަން، 1 އޮގަސްޓްގެ ކުރިން އެ އޮތޯރިޓީގައި ރަޖިސްޓްރީކުރުމަށް ވަނީ އަންގާފައެވެ.
އެމްއެފްޑީއޭއިން ޕީއެސްއެމް ނިއުސްއަށް މަޢުލޫމާތު ދެއްވަމުން ވިދާޅުވީ، އެމްއެފްޑީއޭގެ ފަރާތުން އެފަދަ ތަންތަން ބަލައި ފާސްކުރުމަކީ މިހާރުވެސް ކުރަމުން އަންނަ ކަމެއް ކަމަށެވެ. ނަމަވެސް ރަޖިސްޓްރީކުރަން އަންގާފައިވަނީ، އެފަދަ ތަންތަން ހުރި އަދަދުތައް ދެނެގަތުމާއި ބަލައި ފާސްކުރުމުގެ މަސައްކަތް ޚާއްޞަ އުޞޫލަކުން ކުރިއަށް ގެންދިއުމަށް ކަމަށެވެ. މި އުޞޫލާއެކު ކޮންމެ 6 މަހުން ނުވަތަ ކަނޑައަޅާ ވަކި މުއްދަތަކުން އެފަދަ ގުދަންތަކުގެ ޙާލަތު ޤަވާޢިދުން ބަލާނެކަމަށެވެ.
މިގޮތަށް ބަލާއިރު، ގުދަންތަކުގެ ޖާގަ އާއި، ސާފުތާހިރުކަމާއި އަދި އެތަންތަނުގެ ފިނިހޫނުމިން ފަދަ ކަންކަމަށް ބަލާނެއެވެ. މި މަސައްކަތުގައި މާލެ އާއި އަދި އަތޮޅުތަކުގައި ހުރި ކާޑު ގުދަންތަންވެސް ރަޖިސްޓްރީ ކުރުމަށް ވަނީ އަންގާފައެވެ.