ސޫދާންގެ އަސްކަރިއްޔާއާއި ހަތިޔާރުއެޅި ރެޕިޑް ސަޕޯޓް ފޯރސަސް (އާރް.އެސް.އެފް)ގެ ފައުޖުތަކާ ދެމެދު ފަށާފައިވާ ހަނގުރާމައިގެ ސަބަބުން ސަލާމަތްކަން ހޯދުމަށް 10,000 އަށްވުރެ ގިނަ ރެފިޔުޖީން ދެކުނު ސޫދާނަށް ހިޖުރަކޮށްފިއެވެ. ސޫދާންގައި ފަށާފައިވާ ހަނގުރާމަ ދެވަނަ ހަފުތާއަކަށް ދިގުލައިގެން ގޮސްފައިވާއިރު، މިހާތަނަށް 420 އަށްވުރެ ގިނަ މީހުން މަރުވެފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ބުނެއެވެ.
ދެކުނު ސޫދާނަކީ ސޫދާނާ އިންވެގެން ދެކުނަށް އޮންނަ ޤައުމެކެވެ. ސޫދާނުގައި ހިނގަމުންދާ ހަމަނުޖެހުންތަކުން ސަލާމަތްވުމަށް އޭޕްރިލް 22 ވަނަ ދުވަހު 6,500 އަށްވުރެ ރެފިޔުޖީން ދެކުނު ސޫދާނަށް އެތެރެވެފައިވާ ކަމުގައި އެ ޤައުމުން ބުނެއެވެ. އަދި، އޭޕްރިލް 23 ވަނަ ދުވަހު އިތުރު 3,000 ރެފިޔުޖީން ވަނީ ދެކުނު ސޫދާނަށް ހިޖުރަކޮށްފައެވެ.
ސޫދާން ދޫކޮށް ދެކުނު ސޫދާނަށް ދަތުރުކޮށްފައިވާ މީހުންގެ ތެރެއިން ހަތަރު ބައިކުޅަ ތިންބައި މީހުންނަކީ ދެކުނު ސޫދާނުގެ ރެފިޔުޖީންނެވެ. އެ މީހުން ސޫދާނަށް ހިޖުރަކޮށްފައި ވަނީ އަމިއްލަ ޤައުމުގައި ހިނގަމުންދިޔަ ހަމަނުޖެހުންތަކުން ސަލާމަތްވުމަށެވެ. ސޫދާނުގައި ދެކުނު ސޫދާނުގެ 800,000 އަށްވުރެ ގިނަ ރެފިޔުޖީން ދިރިއުޅޭ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ސޫދާނުގެ ކިބައިން ދެކުނު ސޫދާނަށް މިނިވަންކަން ލިބުނީ 2011 ވަނަ އަހަރެވެ. ސޫދާނުގައި ހިނގަމުންދާ ހަމަނުޖެހުންތަކުން ސަލާމަތްވުމަށް ދެކުނު ސޫދާނަށް ހިޖުރަކޮށްފައިވާ މީހުންގެ ތެރޭގައި ދެން ތިބީ ސޫދާނާއި، އެރިޓްރިޔާއާއި، ކެންޔާއާއި، ޔުގާންޑާގެ އިތުރުން ސޮމާލިޔާގެ ރެފިޔުޖީންނެވެ.
ދެކުނު ސޫދާނަށް އެތެރެވެފައިވާ ރެފިޔުޖީންނަށް އިންސާނީ އެހީތެރިކަން ފޯރުކޮށްދޭން އެ ޤައުމުން ދަނީ މަސައްކަތް ކުރަމުންނެވެ. އަދި، މި ކަމުގައި ބައިނަލްއަޤްވާމީ މުޖުތަމަޢުން އަދި މިހާތަނަށް އެއްވެސް އެހީތެރިކަމެއް ފޯރުކޮށްދީފައި ނުވާ ކަމުގައި އެ ޤައުމުން ބުނެއެވެ.
ދެކުނު ސޫދާނުގައި ވެސް އަމިއްލަ ވަޒަނުގައި ރެފިޔުޖީންގެ ހާލުގައި ދިރިއުޅޭ ދެ މިލިޔަނަށްވުރެ ގިނަ މީހުން ދިރިއުޅެއެވެ. 2013 އާއި 2018 ވަނަ އަހަރާ ދެމެދު އެ ޤައުމުގައި ހިނގި ދާޚިލީ ހަނގުރާމައިގައި 400,000 އެއްހާ މީހުންގެ ފުރާނަ ވަނީ ގެއްލިފައެވެ.
ސޫދާންގެ ވެރިރަށް ޙަރްތޫމަކީ ފަސް މިލިޔަން މީހުންގެ އާބާދީއެއް އޮންނަ ރަށެކެވެ. ހަނގުރާމައާ ގުޅިގެން އެ ރަށުން ސާފު ބޯފެނާއި ކާބޯތަކެތި ހުސްވާން ފަށާފައިވާއިރު، އެ ތަކެތި ހޯދުމަށް ޢާންމު ރައްޔިތުންނަށް ވަނީ ދަތިވެފައެވެ. ކަރަންޓުގެ ޚިދުމަތް ވެސް ވަނީ މެދުކެނޑިފައެވެ. ގިނަ މީހުން ތިބީ އެ މީހުންގެ ގެދޮރުގައި ތާށިވެފައެވެ. އަދި، ހޮސްޕިޓަލް ފަދަ އަސާސީ ޚިދުމަތްތައް ދޭ ތަންތަނަށް ހަމަލާދެމުން ދިއުމުގެ ސަބަބުން، ޞިއްޙީ ޚިދުމަތް ހޯދުމަށް ވެސް ވަނީ ހުރަސްއެޅިފައެވެ.