އެމެރިކާގެ ނިއު ޔޯކް ސިޓީގައި ހުންނަ ހަތަރު ފުރޮޅުލީ އުޅަނދުފަހަރު ޕާކުކުރާ ގަރާޖެއް ހުންނަ ޢިމާރާތެއް ވެއްޓި، އެކަކު މަރުވެއްޖެއެވެ. މި ހާދިސާ ހިނގާފައި ވަނީ ކާރުބާރޫ ބޮޑު ލޮވަރ މެންހެޓަންގައެވެ. މި ހާދިސާގައި ވެއްޓުނު ޕާކިންގް ގަރާޖު ހުންނަނީ ހަތަރު ބުރިއަށް ނަގާފައިވާ ޢިމާރާތެއްގައެވެ.
އޭން ސްޓްރީޓްގައި ހުންނަ ޕާކިންގް ޢިމާރާތް ވެއްޓުނު ހާދިސާގައި ޒަޚަމުވި އިތުރު ހަތަރު މީހަކަށް ހޮސްޕިޓަލުގައި އެޑްމިޓްކޮށްގެން ފަރުވާ ދެމުންދާ ކަމުގައި ނިއު ޔޯކްގެ ފުލުހުން ބުނެއެވެ. ސޯޝަލް މީޑިޔާގައި ދައުރުވަމުންދާ ވީޑިޔޯތަކުން ފެންނަނީ މަތި މައްޗަށް ފުނިޖެހިފައިވާ އުޅަނދުފަހަރެވެ.
މި ހާދިސާގައި ޢިމާރާތުގެ ބޭރު ފާރުތަކަށް ބޮޑެތި ގެއްލުންތަކެއް ލިބިފައި ނެތް ނަމަވެސް، ހުރިހާ ފަންގިފިލާތަކެއް ވަނީ ވެއްޓިފައެވެ. އަދި، ސުންނާފަތިވެފައެވެ. މި ހާދިސާގައި ގެއްލުން ލިބިފައި ނެތް ޢިމާރާތުގެ ބައިތައް ވެސް ވެއްޓިދާނެ ކަމުގެ ބިރު އޮތް ކަމުގައި ނިއު ޔޯކްގެ ޢިމާރާތްތަކާ ބެހޭ އިދާރާގެ އިސްވެރިޔާ ކެޒިމީރް ވިލެންޗިކް ވިދާޅުވިއެވެ.
ޕާކިންގް ޢިމާރާތް ވެއްޓުނު ވަގުތު އެ ތަނުގެ ތެރޭގައި ހަ މީހުން ތިބި ކަމަށް ބެލެވޭ ކަމުގައި ނިއު ޔޯކްގެ އަލިފާން ނިއްވާ އިދާރާއިން ބުނެއެވެ. އަދި، އެ މީހުން ސަލާމަތް ކުރުމަށް އެ އިދާރާއިން ވަނީ ރޮބޮޓާއި ޑްރޯން ފަދަ އާލާތްތައް ބޭނުންކޮށްފައެވެ. އޭގެ ތެރެއިން ހަތަރު މީހަކު ވަނީ ފަރުވާ ކުރުމަށް ހޮސްޕިޓަލަށް ގެންގޮސްފައެވެ. ހަ ވަނަ މީހާ ފަރުވާ ހޯދަން ދެކޮޅު ހަދާފައިވާ ކަމުގައި ވެސް އަލިފާން ނިއްވާ އިދާރާއިން ބުންޏެވެ.