އިސްރާޢީލުން ވެރިވެގަނެފައިވާ ފަލަސްޠީނުގެ ހުޅަނގު އައްސޭރިއަށް ޔަހޫދީ ސިފައިން އަރައި ލާއިންސާނީ އުދުވާންތަކެއް ހިންގައި، ފަލަސްޠީނުގެ ހަތް މީހަކު ޒަޚަމުކޮށްލައިފިއެވެ. ޔަހޫދީ ޓެރެރިސްޓު ސިފައިން ވަދެ އުދުވާންތައް ހިންގާފައި ވަނީ ޖިނީން ރެފިޔުޖީ ކޭމްޕު ހުންނަ ސަރަޙައްދުގައެވެ.
މި އުދުވާންތަކުގައި ހަތް މީހެއްގެ ހަށިގަނޑަށް ބަޑިޖަހައި ޒަޚަމުކޮށްލާފައިވާއިރު، އޭގެ ތެރެއިން ހަ މީހަކަށް ފަރުވާދީފައި ވަނީ ޖިނީންގެ ސަރުކާރު ހޮސްޕިޓަލުގައި ކަމަށް ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެއެވެ. އިތުރު މީހަކަށް އެހެން ހޮސްޕިޓަލެއްގައި ވަނީ ފަރުވާދީފައެވެ. ޔަހޫދީ ޖައްބާރު ސިފައިން ހިންގި އުދުވާންތަކުގައި ޒަޚަމުކޮށްލާފައިވާ މީހުންގެ ވަނަވަރު ހާމަކޮށްފައެއް ނެތެވެ.
ޖިނީންގައި ދިރިއުޅޭ ފަލަސްޠީނުގެ ރައްޔިތުންނަށް ފުރައްސާރައާއި ދުއްތުރާ ކުރުމާއި، އެ މީހުން ހައްޔަރުކޮށް އަނިޔާކުރުމަކީ ޔަހޫދީ އިސްރާޢީލުގެ އަސްކަރިއްޔާއިން ކޮންމެ ދުވަހަކުން ކުރާ ކަމެކެވެ. މި އަހަރުގެ ތެރޭގައި ޖިނީންގައި ހިންގާފައިވާ އެކި އުދުވާންތަކުގައި ޝަހީދުކޮށްލާފައިވާ މުސްލިމުންގެ ޢަދަދު ވަނީ 25 އަށް އަރާފައެވެ.
ޔަހޫދީ ޖައްބާރު ސިފައިން މި އަހަރުގެ މިހާތަނަށް ހިންގާފައިވާ ލާއިންސާނީ އުދުވާންތަކުގައި ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު 96 އަށް އަރާއިރު، އޭގެ ތެރޭގައި ގިނަ ޢަދަދެއްގެ ޢާންމުންނާއި ކުޑަކުދިން ހިމެނެއެވެ. ގިނަ ޢަދަދެއްގެ އަންހެނުންނާއި އުމުރުން ދުވަސްވީ މީހުން ވެސް ޔަހޫދީ ޓެރެރިސްޓު ސިފައިންގެ ޝިކާރައަކަށް ވަނީ ވެފައެވެ.