ސޫދާނުގެ އަސްކަރިއްޔާގެ ސިފައިންނާއި އެ ޤައުމުގައި ހަރަކާތްތެރިވާ ހަތިޔާރުއެޅި ޖަމާޢަތެއް ކަމުގައިވާ ރެޕިޑް ސަޕޯޓް ފޯސަސް (އާރް.އެސް.އެފް)ގެ މެންބަރުންނާ ދެމެދު ހަމަލާ ބަދަލުކުރުން ވަގުތީ ގޮތުން މެދުކަނޑައިލައިފިއެވެ. ދެ ފަރާތުގެ މެދުގައި ހަމަލާ ބަދަލުކުރުންތައް ވަގުތީ ގޮތުން މެދުކަނޑައިލަން ނިންމާފައި ވަނީ އެމެރިކާގެ ޚާރިޖީ ވަޒީރު އެންތަނީ ބްލިންކަން ބާރުއެޅުއްވުމުގެ ސަބަބުންނެވެ.
ބްލިންކަން ވަނީ އަސްކަރިއްޔާއާއި އާރް.އެސް.އެފްގެ އިސް ޖެނެރަލުންނާ ފޯނުން ގުޅުއްވައި ވާހަކަފުޅު ދައްކަވާފައެވެ. އަދި، ހަމަލާ ބަދަލުކުރުންތައް ހުއްޓައިލާ، މަޝްވަރާ ކުރުމަށް ބާރުއަޅުއްވާފައެވެ. ނަމަވެސް، ދެ ފަރާތުގެ މެދުގައި ހަމަލާ ބަދަލުކުރުން ހުއްޓައިލުމަށް އެއްބަސްވެފައި ވަނީ އެންމެ 24 ގަޑިއިރުގެ މުއްދަތަކަށެވެ.
ހަމަލާ ބަދަލުކުރުންތައް މެދުކަނޑައިލާފައި މި ވަނީ، ވެރިރަށް ޚަރްތޫމްގައި ހިނގަމުންދާ ހަމަނުޖެހުންތަކުގެ ތެރޭގައި އެމެރިކާގެ ޚާރިޖީ ދާއިރާގެ އޮފިޝަލުންތަކެއް ދަތުރުކުރަމުންދިޔަ ގާލިފާއަކަށް ހަމަލާތަކެއް ދީފައިވާ ދަނޑިވަޅެއްގައެވެ. އެމެރިކާގެ އޮފިޝަލުން ދަތުރުކުރަމުންދިޔަ އުޅަނދުތަކަށް ހަމަލާދީފައި ވަނީ އާރް.އެސް.އެފަށް ވާގިވެރިވާ ހަތިޔާރުއެޅި ބަޔަކު ކަމަށް އެމެރިކާއިން ބުނެއެވެ. މި ހާދިސާގައި އެއްވެސް މީހެއްގެ ފުރާނައަށް ނުރައްކާވެފައި ނުވި ނަމަވެސް، މި ފަދަ ހަމަލާތައް ބަލައިނުގަނެވޭނެ ކަމުގައި ބްލިންކަން ވިދާޅުވިއެވެ.
ހަމަލާ ބަދަލުކުރުންތައް 24 ގަޑިއިރުގެ މުއްދަތަކަށް މެދުކަނޑައިލާފައިވާ ކަން އަސްކަރިއްޔާގެ އިސް އޮފިސަރެއް ކަމުގައިވާ ޖެނެރަލް ޝަމްސުއްދީން ކައްބާޝީ ކަށަވަރުކޮށްދެއްވައެވެ. އަދި، އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ހަމްދާން ދަގަލޯގެ ފަރާތުން ވެސް ވަނީ އެ ކަން ކަށަވަރުކޮށްދީފައެވެ.
އާރް.އެސް.އެފްގެ ހަތިޔާރު އެޅި މެންބަރުން ވެރިރަށް ޚަރްތޫމަށް އަރައި ރިޔާސީ ގަނޑުވަރާއި އަސްކަރިއްޔާގެ އިސްވެރިޔާގެ ގެކޮޅު ހިސާރުކުރަން މަސައްކަތް ފެށީ އޭޕްރިލް މަހުގެ 15 ވަނަ ދުވަހުއެވެ. އެ ކަމާ ގުޅިގެން އަސްކަރިއްޔާއާއި އާރް.އެސް.އެފްގެ މެންބަރުންނާ ދެމެދު ވަރުގަދަ ހަމަލާތަކެއް ބަދަލުކުރަން ފެށިއެވެ. މި ހަމަނުޖެހުންތަކުގައި މިހާތަނަށް 185 މީހަކު މަރުވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. އަދި، ގިނަ ޢަދަދެއްގެ ބަޔަކު ވަނީ ޒަޚަމުވެފައެވެ.
އާރް.އެސް.އެފް.ގައި 100,000 އަށްވުރެ ގިނަ ހަނގުރާމަވެރިން ތިބެއެވެ. ސޫދާންގެ ހަމަނުޖެހުން ބޮޑު ދާރްފޫރުގެ ބާރުގަދަ ހަތިޔާރުއެޅި ޖަމާޢަތަކަށް ނިސްބަތްވާ ދަގަލޯ މަސައްކަތް ކުރަމުން ދަނީ ސޫދާންގެ ވެރިކަން ހޯދުމަށެވެ. އަދި، ޑިމޮކުރަސީގެ ހަމަތަކުގެ މަތިން އައު ސަރުކާރެއް އެކުލަވައިލަން ކުރަމުންދާ މަސައްކަތްތަކުގެ ތެރެއިން ވެރިކަމަށް އައުމަށް އޭނާ ދަނީ މަސައްކަތް ކުރަމުންނެވެ.
ސޫދާންގައި ވެރިކަން ކުރާ އިންތިގާލީ ސަރުކާރު ނުވަތަ ސޮވެރެން ކައުންސިލް އެކުލެވިގެން ވަނީ އަސްކަރިއްޔާއާއި، އާރް.އެސް.އެފާއި، އެހެން ސިޔާސީ ޕާޓީތަކުގެ މައްޗަށެވެ. އަދި، ސޫދާންގެ ވެރިކަމަށް ދަގަލޯ އަތްގަދަ ކުރުމަކީ އަސްކަރިއްޔާއާއި ސިޔާސީ ޕާޓީތަކުން ރުހޭ ކަމެއް ނޫނެވެ.
ދިގު މުއްދަތެއް ވަންދެން ސޫދާންގައި ވެރިކަން ކުރެއްވި އެ ޤައުމުގެ ކުރީގެ ރައީސް އުމަރު އަލް-ބަޝީރުގެ ސަރުކާރު ބަޣާވާތަކުން ވައްޓައިލުމުގައި އެ ޤައުމުގެ އަސްކަރިއްޔާއާއި އާރް.އެސް.އެފް. ވަނީ ގުޅިގެން މަސައްކަތް ކޮށްފައެވެ. އަލް-ބަޝީރުގެ ސަރުކާރު ވައްޓައިލާފައި ވަނީ 2019 ވަނަ އަހަރެވެ.
ސޫދާނުގައި އިންތިޚާބެއް ބާއްވައި، އައު ސަރުކާރެއް އެކުލަވައިލުމުގެ މަޝްވަރާތައް ކުރިއަށްދާ ދަނޑިވަޅެއްގައި، އާރް.އެސް.އެފުން ވަނީ އެ ޖަމާޢަތުގެ ހަތިޔާރުއެޅި މެންބަރުންގެ ބާރާއި ނުފޫޒު ގަދަކުރަން މަސައްކަތް ފަށާފައެވެ. 2019 ވަނަ އަހަރަށް ފަހު އެކުލަވައިލި އިންތިގާލީ ސޮރެވެން ކައުންސިލު ހިންގަނީ އަސްކަރިއްޔާގެ ޖެނެރަލް ޢަބްދުލް ފައްތާޙް އަލް-ބުރްހާނެވެ. ދަގަލޯ މަސައްކަތް ކުރަނީ އޭނާގެ ނައިބުގެ ގޮތުގައެވެ.