އެމްއެންޑީއެފް ކޯސްޓްގާރޑު "ޝިޕް ހުރަވީ" ގެ ބަދަލުގައި އިންޑިޔާ ސަރުކާރުން ދިން އުޅަނދު ރާއްޖެ ގެނެސްފިއެވެ. މި އުޅަނދު ރާއްޖެ އައީ ހޮނިހިރު ދުވަހުއެވެ.
އެމްއެންޑީއެފުން ވިދާޅުވީ މިފަހަރު އިންޑިޔާއިން ހަދިޔާކުރި އުޅަނދަކީ ހުރަވީއަށްވުރެ ބޮޑު، އޮޕަރޭޝަނަލް ޤާބިލްކަން އިތުރު، ފަހުގެ އުޅަނދެއްކަމަށެވެ. މި އުޅަނދު އެމްއެންޑީއެފަށް ހަދިޔާކުރުމާއެކު ކޯސްޓްގާރޑު ޝިޕް ހުރަވީ ޑީކަމިޝަންކުރާނެއެވެ.
އެމްއެންޑީއެފް ކޯސްޓްގާރޑް ފްލީޓްގައި އޮތް އެންމެ ބޮޑު އަދި ޢަސްކަރީ ގޮތުން އެންމެ ޤާބިލް އުޅަނދު، ކޯސްޓްގާރޑް "ޝިޕް ހުރަވީ" އަކީ 2006 ވަނަ އަހަރު އޭޕްރީލް މަހުގެ 16 ވަނަ ދުވަހު އިންޑިޔާ ސަރުކާރުން ރާއްޖެއަށް ހަދިޔާކޮށްފައިވާ އުޅަނދެކެވެ. އެދުވަހުން ފެށިގެން މިއުޅަނދު ކޮންމެ 2 އަހަރަކުން އެއްފަހަރު މަރާމާތުކޮށްދެމުން އަންނަނީ އިންޑިޔާގެ ހިލޭ އެހީގައެވެ. މިހާތަނަށް 6 ފަހަރެއްގެ މަތިން މިއުޅަނދު އިންޑިޔާގެ ނޭވަލް ޑޮކްޔާޑުގައި ރީފިޓްކޮށް މަރާމާތުކޮށްފައިވެއެވެ.
ކޯސްޓްގާޑް ޝިޕް ހުރަވީ މިހާރު ޚިދުމަތުގައި ގިނަ ދުވަސްތަކެއް ވެފައިވާތީ، ހުރަވީގެ ބަދަލުގައި އިތުރު އުޅަނދުފަހަރު ހޯދާ އެމްއެންޑީއެފްގެ އޮޕަރޭޝަނަލް ޤާބިލްކަން އިތުރުކުރުމަކީ ދިވެހި ސަރުކާރުން ވަރަށް ބޮޑު އިސްކަމެއް ދެއްވާ ކަމެކެވެ.
މިގޮތުން އިންޑިއާއިން ހަދިޔާކުރި އުޅަނދު މިދިޔަ ހޮނިހިރު ދުވަހު ވަނީ މާލެ އައިސްފައެވެ. އަދި މި އުޅަނދު ރަސްމީކޮށް އެމްއެންޑީއެފާ ޙަވާލުކުރުމަށް ފުރިހަމަކުރަންޖެހޭ ކަންކަން ކުރަމުން އަންނަކަމަށް އެމްއެންޑީއެފުން ވިދާޅުވެއެވެ. މިގޮތުން މިއަންނަ މެއި މަހުގެ ތެރޭގައި މި އުޅަނދު ރަސްމީކޮށް ޙަވާލުކުރުމަށް ފުރިހަމަކުރަންޖެހޭ ލިޔެކިޔުންތަކުގެ މަސައްކަތް ކުރިއަށްދާ ކަމަށް އެމްއެންޑީއެފުން ވިދާޅުވެއެވެ.
އަދި އުޅަނދަށް ޢައްޔަންކުރެވޭ ކޯސްޓްގާޑްގެ ސިފައިން، އުޅަނދުގައި ބޭނުންކުރާ މުހިއްމު މެޝިނަރީ އަދި އިކްއިޕްމެންޓްތަކާއި އޮޕަރޭޓިންގ ޕްރޮސީޖަރތަކަށް އަހުލުވެރިވުމަށް ކޮންމެހެން ބޭނުންވާ ތަމްރީން ޕްރޮގްރާމްތައް ހިންގަވަމުން ގެންދަވާކަމަށްވެސް އެމްއެންޑީއެފުން މަޢުލޫމާތުދެއެވެ. މިއީ ދެ ހަފްތާގެ ތަމްރީންތަކެކެވެ. އެމްއެންޑީއެފުން ވިދާޅުވީ ތަމްރީން ޕްރޮގްރާމް ނިމި ރަސްމީކޮށް އުޅަނދު ޙަވާލުކުރުމުގެ ކަންކަން ނިމުމުން، މި އުޅަނދު މާލެ ގެނައުމުގައި ޙަރަކާތްތެރިވި އިންޑިއަން ނޭވީގެ ކުރޫ އަނބުރާ އިންޑިޔާއަށް ދިއުމަށް ހަމަޖެހިފައިވާ ކަމަށެވެ.
މީގެއިތުރުން އެމްއެންޑީއެފްގެ އޮޕަރޭޝަނަލް ޤާބިލްކަން އިތުރުކުރުމަށްޓަކައި އިންޑިޔާ ސަރުކާރުން 2019 ވަނަ އަހަރުވެސް ވަނީ އިތުރު އުޅަނދެއް ކަމަށްވާ (ސީޖީ ކާމިޔާބު) ހަދިޔާކުރައްވާފައެވެ.