މި ދުވަސްވަރު ރާއްޖޭގެ އެކި ހިސާބުތަކުގައި ހުމާއި އަރިދަފުސް ރޯގާއާއި ކޯވިޑް ފެތުރޭ މިންވަރު އިތުރުވަމުންދާތީ ރައްކާތެރި ފިޔަވަޅުތައް އެޅުމަށް ހެލްތް ޕްރޮޓެކްޝަން އެޖެންސީ، އެޗްޕީއޭއިން ގެންދަވަނީ އިލްތިމާސްކުރައްވަމުންނެވެ.
ހުމާއި ރޯގާ ޖެހިގެން ޑޮކްޓަރަށް ދައްކާ މީހުންގެ އަދަދު މި ދުވަސްވަރު ވަނީ ވަރަށް ބޮޑަށް އިތުރުވެފައެވެ. އެޗްޕީއޭއިން ވިދާޅުވީ، މިދުވަސްވަރަކީ ސްކޫލް ޗުއްޓީ އާއި ޢީދު ބަންދަށް ރާއްޖެއިން ބޭރަށާއި، އަތޮޅުތަކަށް ދަތުރުފަތުރު ކުރުމާއި، ގޭގެއަށް ޒިޔާރަތްކުރުން އިތުރުވާނެ ދުވަސްވަރެއް ކަމަށެވެ. އެހެންކަމުން ހުމާއި އަރިދަފުސް ރޯގާއިން ސަލާމަތްވުމަށް ފަރުދީ ލެވެލްގައި ފިޔަވަޅު އެޅުމަށް އެޗްޕީއޭއިން ވަނީ އާންމުންނަށް އިލްތިމާސްކޮށްފައެވެ.
އާންމުން ސަމާލުކަން ދޭންވީ ކަންކަން:
* ހުމާއި ރޯގާގެ އެއްވެސް ޢަލާމާތެއް ހުރެއްޖެނަމަ ވީހާވެސް އަވަހަކަށް ޑޮކްޓަށް ދެއްކުން
* ގިނައިން ދިޔާއެއްޗެތި ބޭނުންކުރުން
* ރޯގާގެ އަލާމާތެއް ހުރިނަމަ، ނޭފަތާއި އަނގަ ނިވާވާނެހެން ރަނގަޅަށް މާސްކުއެޅުން
* ޢާންމު ތަންތަނުގައި އުޅޭއިރު، ގައިދުރުކަން ބެހެއްޓުން
* ރޯގާގެ އެއްވެސް އަލާމާތެއް ހުރިނަމަ، މީހުން އެއްވެ އުޅޭ ތަންތަނަށް ނުދިއުން
އެޗްޕީއޭއިން އެންމެ ފަހުން އާންމުކޮށްފައިވާ ތަފާސް ހިސާބުތައް ދައްކާގޮތުން ރޯގާގެ އިތުރުން ރާއްޖޭގައި މިހާރު ކޯވިޑް19 ފެތުރޭ މިންވަރުވެސް ވަނީ ވަރަށް ބޮޑަށް އިތުރުވެފައެވެ. އެގޮތުން މިމަހުގެ 9 ވަނަ ދުވަހުން 15 ވަނަ ދުވަހުގެ ނިޔަލަށް ރާއްޖެއިން 148 މީހަކު ވަނީ ކޯވިޑަށް ޕޮޒިޓިވްވެފައެވެ. މީގެތެރޭގައި މާލެ ސަރަހައްދުން 100 މީހުންނަށް ކޯވިޑް ޖެހިފައިވެއެވެ.
މިއީ މިފަހުން ކޯވިޑްގެ ނަންބަރުތައް މިހާ މަތިވި ފުރަތަމަ ފަހަރެވެ. މިއަހަރު ފެށުނުއިރު ހަފްތާއެއްގެ މައްޗަށް ކޯވިޑްޖެހޭ މީހުންގެ އަދަދު އުޅުނީ 2 ނުވަތަ 5 ގައެވެ. ނަމަވެސް މާރޗް މަހުން ފެށިގެން ރާއްޖޭގައި ކޯވިޑްޖެހޭ މީހުންގެ ނަންބަރުތައް އިތުރުވަމުން އަންނަކަމަށް އެޗްޕީއޭގެ ތަފާސްހިސާބުތަކުން ދައްކައެވެ. ކޯވިޑް ޖެހިގެން މިވަގުތު 28 މީހަކަށް ހޮސްޕިޓަލްތަކުގައި އަންނަނީ ފަރުވާ ދެމުންނެވެ.
ކޯވިޑްގައި އެޑްމިޓްކޮށްގެން ފަރުވާދޭންޖެހޭ މީހުންގެ އަދަދު އިތުރުވުމަކީ މުޅި ޞިއްޙީ ނިޒާމަށް އޭގެ ސަބަބުން އަސަރުކުރާނެ ކަމެކެވެ. މީގެކުރިން އަޅުގަނޑުމެންނަށް އެ މަންޒަރު ވަނީ ވަރަށް ގާތުން ފެނިފައެވެ. އަދި މިކަމުގެ ކަންބޮޑުވުން ޑޮކްޓަރުން ވެސް ފާހަގަކުރައްވައެވެ.
ކޯވިޑުން ރައްކާތެރިވުމަށް ކުރެވިދާނެ ކަންކަން:
* ސައިބޯނި ލައިގެން ގިނައިން ރަނގަޅަށް އަތް ދޮވުން ނުވަތަ ސެނިޓައިޒަރ ބޭނުންކޮށްގެން އަތް ސާފުކުރުން.
* ބަލިޖެހުމުން ނުރައްކާވުމުގެ ފުރުޞަތު ބޮޑު މީހުން ބޭރުގައި އުޅޭއިރު، އަދި ގިނަ މީހުންގެ ތެރެއަށް ނުކުންނައިރު، މާސްކު އަޅައިގެން އުޅުން.
* ކޯވިޑު ވެކްސިން ފުރިހަމަކުރުން. އަދި ބޫސްޓަރ ޑޯޒް ޖެހުމަށް ޝަރުތުހަމަވާ ފަރާތްތަކުން ބޫސްޓަރ ޑޯޒް ފުރިހަމަ ކުރުން.
ޢާންމު ދަތުރުފަތުރުގެ ޚިދުމަތްދޭ ފަރާތްތަކުން ކޯވިޑް-19 އާއި އަރިދަފުސް ރޯގާ ކޮންޓްރޯލްކުރުމަށް ސަމާލުވާންޖެހޭ ކަންކަންވެސް އެޗްޕީއޭއިން ވަނީ ފާހަގަކުރައްވާފައެވެ. އޭގެ ތެރޭގައި އުޅަނދުގައި އަތްސާފުކުރެވޭނެހެން ސެނެޓައިޒަރ ބެހެއްޓުމާއި، ފަސިންޖަރުން އުޅަނދުން ފައިބަމުން އަތްލާ ތަންތަން ސާފްކުރުމާއި އަމިއްލަ ރައްކާތެރިކަމަށްޓަކައި ޑްރައިވަރުން މާސްކް އެޅުން ހިމެނެއެވެ.