2040 ވަނަ އަހަރުގެ ކުރިން އަލަށް ޕުލާސްޓިކު ކުނި އުފެއްދުން ނުވަތަ އެ ފަދަ ކުނި އުފެދޭ މިންވަރު ދަށްކުރަން ސިނާޢީ ގޮތުން އެންމެ ކުރިއަރާފައިވާ ހަތް ޤައުމު ނުވަތަ "ގްރޫޕް އޮފް ސެވަން" (ޖީ7)ގެ މެންބަރު ޤައުމުތަކުން އެއްބަސްވެއްޖެއެވެ. ޖީ7ގެ މެންބަރުން މި ކަމަށް އެއްބަސްވެފައި ވަނީ ޖަޕާނުގެ އުތުރުގައިވާ ސައްޕޮރޯގައި ކުރިއަށްދިޔަ، ޖީ7ގެ މެންބަރު ޤައުމުތަކުގެ ތިމާވެއްޓާއި މޫސުމާ ބެހޭ ވަޒީރުންގެ ބައްދަލުވުމުގައެވެ.
ޖީ7ގެ މެންބަރު ޤައުމުތަކުން އެއްބަސްވެފައި ވަނީ އެ ޤައުމުތަކުގައި ޕުލާސްޓިކު ކުނި އުފެދޭ މިންވަރު މަދުކޮށް، އައު ޕުލާސްޓިކު ކުނި އުފެއްދުން 2040 ވަނަ އަހަރުގެ ކުރިން ހުއްޓައިލާށެވެ. މިއީ ވަރަށް ތާރީޚީ އަދި އުންމީދުން ފުރިގެންވާ އެއްބަސްވުމެއް ކަމުގައި ޖަރުމަނުވިލާތުގެ ތިމާވެއްޓާ ބެހޭ ވަޒީރު ސްޓެފީ ލެމްކޭ ސިފަކުރައްވައެވެ.
ޖީ7ގެ ޤައުމުތަކުގެ ތެރޭގައި ހިމެނެނީ ޖަރުމަނުވިލާތް، ފަރަންސޭސިވިލާތް، ކެނެޑާ، އިނގިރޭސިވިލާތް، ޖަޕާން، އެމެރިކާ އަދި އިޓަލީ ވިލާތެވެ. މީގެ ތެރެއިން ޖަރުމަނުވިލާތާއި، ފަރަންސޭސިވިލާތާއި ކެނެޑާއާއި އިނގިރޭސިވިލާތުން މީގެ ކުރިން ވެސް ވަނީ މި ކަމަށް އެއްބަސްވެފައެވެ.
ޖީ7އިން ހަދާފައިވާ އެއްބަސްވުމުގެ ލަނޑުދަނޑިތައް ހާސިލުކުރުމުގެ ގޮތުން އެ ޤައުމުތަކުން ޕުލާސްޓިކުގެ ބާވަތްތައް އުފެއްދުން މަދުކޮށް، ޕުލާސްޓިކު ކުނި މެނޭޖުކުރުން އިތުރަށް ހަރުދަނާ ކުރުމުގެ އިތުރުން ޕުލާސްޓިކު ބޭނުންކޮށްގެން އުފައްދާފައިވާ ހުންނަ މުދާ ދެމެހެއްޓެނިވި ގޮތެއްގައި ބޭނުން ކުރުމަށް ބާރު އަޅާނެ ކަމުގައި އެ ގުޅުމުން ބުނެއެވެ.
ފާއިތުވި 20 އަހަރުގެ ތެރޭގައި ދުނިޔޭގައި އުކައިލާފައިވާ ޕުލާސްޓިކު ކުނީގެ މިންވަރު ވަނީ ދެގެނައަށް އިތުރުވެފައެވެ. އޭގެ ތެރެއިން ރައްކާތެރި ގޮތުގައި ރީސައިކަލް ކުރެވެނީ، ނުވަތަ އެހެން ގޮތަކަށް ބޭނުން ކުރެވެނީ އެންމެ 9 އިންސައްތައެވެ. 2040 ވަނަ އަހަރުގެ ކުރިން ދުނިޔޭގެ ކަނޑުތަކަށް އުކައިލާ ކުނީގެ މިންވަރު ތިންގުނައަށް އިތުރުވާނެ ކަމަށް އ.ދ.އިން އިންޒާރު ކުރެއެވެ.