ރަޝިޔާ ސިފައިން ޔޫކްރެއިނަށް އަރާ ކުރަމުންދާ ހަނގުރާމައަށް 14 މަސް ފުރިފައިވާއިރު، މިހާތަނަށް 354,000އަށްވުރެ ގިނަ މީހުންގެ ފުރާނައަށް ނުރައްކާތެރިފައިވާ ކަމަށާއި، އެ ޢަދަދަށް މީހުން މަރުވެ، ނުވަތަ ޒަޚަމުވެފައިވާކަން އެމެރިކާގެ ސިއްރު ލިޔެކިޔުންތަކަކުން ހާމަވެއްޖެއެވެ. މި މަޢުލޫމާތު ހާމަވެފައިވަނީ އެމެރިކާގެ ވައިގެ ސިފައިންގެ ނޭޝަނަލް ގާޑްގެ ދަށް ފަންތީގެ މުވައްޒަފެއް ކަމުގައިވާ 21 އަހަރުގެ ޖެކް ޓިޝެއިރާ ލީކުކޮށްލި ސިއްރު ޖާސޫސީ ލިޔެކިޔުންތަކުންނެވެ.
ލިޔެކިޔުންތައް ލީކުކޮށްލި މައްސަލާގައި ޓިޝެއިރާ ހައްޔަރުކޮށް އޭނާއާ ދެކޮޅަށް ދަޢުވާ އުފުލާފައިވާއިރު، ޔޫކްރެއިން ހަނގުރާމައާ ގުޅޭގޮތުން އެމެރިކާގެ ޖާސޫސީ އިދާރާތަކުން އެއްކޮށްފައިވާ ގިނަ ޢަދަދެއްގެ ސިއްރު މަޢުލޫމާތު އޭނާ ލީކުކޮށްލި ލިޔެކިޔުންތަކުގައި ހިމެނެއެވެ. މީގެ ތެރޭގައި ރަޝިޔާ ސިފައިންނާ ދެކޮޅަށް ޔޫކްރެއިނުން ފެށުމަށް ތައްޔާރުވަމުންދާ އަސްކަރީ ކެމްޕޭނާ ގުޅޭ ގިނަ މަޢުލޫމާތުތަކެއްވެސް ހިމެނެއެވެ.
ޓިޝެއިރާ ލީކުކޮށްލާފައިވާ ލިޔެކިޔުންތަކުން ހާމަވާ ގޮތުގައި، ރަޝިޔާ-ޔޫކްރެއިން ހަނގުރާމައިގައި މަރުވެފައިވާ ނުވަތަ ޒަޚަމުވެފައިވާ 354,000 މީހުންގެ ތެރޭގައި ގިނައީ ދެ ޤައުމުގެ ސިފައިންނެވެ. އެ ލިޔެކިޔުންތަކުގެ ސައްޙަކަން ކަށަވަރުވެފައި ނުވި ނަމަވެސް، އެ ތަކެތި ލީކުވުމާ ގުޅިގެން އެމެރިކާގެ ތަހުޤީޤީ އިދާރާ – ފެޑެރަލް ބިޔުރޯ އޮފް އިންވެސްޓިގޭޝަން (އެފް.ބީ.އައި)އިން ވަނީ ތަހުޤީޤެއް ފަށާފައެވެ. އެމެރިކާއިން އެ ޤައުމުގެ އެކުވެރިންނަށް ޖާސޫސްކޮށްފައިވާކަންވެސް ލިޔެކިޔުންތަކުން ވަނީ ހާމަވެފައެވެ.
ރަޝިޔާ-ޔޫކްރެއިން ހަނގުރާމައާ ގުޅޭގޮތުން ގިނަ ޢަދަދެއްގެ ލިޔެކިޔުންތަކެއް ހާމަވެފައިވާއިރު، 2023 ވަނަ އަހަރު ނިމުމުގެ ކުރިން ޔޫކްރެއިންގެ އިރުމަތީ ދޮންބާސްގެ ހުރިހާ ސަރަޙައްދަކަށް އަތްގަދަކުރުމަކީ ރަޝިޔާއަށް ފަސޭހަ ކަމަކަށް ނުވާނެ ކަމަށް އެމެރިކާއިން ދެކެއެވެ. އަދި، ރަޝިޔާއިން މިހާރު ބޭނުންކުރަމުންދާ އުކުޅުތަކުގެ ސަބަބުން ގިނަ ޢަދަދެއްގެ ސިފައިން މަރުވެ، ގިނަ ޢަދަދެއްގެ ހަތިޔާރު ބޭކާރުވެފައިވާ ކަމަށް ވެސް އެމެރިކާގެ ލިޔެކިޔުންތަކުގައި ބުނެފައިވެއެވެ. އަދި، އޭގެ ސަބަބުން ކުރިއަށް އޮތް ތަނުގައި ހަނގުރާމައިގެ ލަނޑުދަނޑިތައް ހާސިލުކުރަން ރަޝިޔާއަށް ދަތިވާނެ ކަމަށް އެމެރިކާއިން ގަބޫލުކުރެއެވެ.
ހަނގުރާމައިގައި ރަޝިޔާގެ 189,000 އާއި 223,000 ދެމެދުގެ ޢަދަދެއްގެ ސިފައިންގެ ފުރާނައަށް ނުރައްކާވެފައި ކަމާއި، އޭގެ ތެރެއިން 35,000 އާއި 43,000 އާ ދެމެދު ޢަދަދެއްގެ ސިފައިން މަރުވެފައިވާ ކަމުގައި ލިޔެކިޔުންތަކުގައި ބުނެފައިވެއެވެ. އަދި، 154,000 އާއި 180,000 އާ ދެމެދު ޢަދަދެއްގެ ސިފައިން ޒަޚަމުވެފައިވާ ކަމުގައިވެސް ރިޕޯޓުގައި ލިޔެފައިވެއެވެ. މި ޢަދަދުތަކަކީ ރަޝިޔާއިން ރަސްމީކޮށް އިޢުލާނުކޮށްފައިވާ ޢަދަދުތަކަށް ވުރެ 10 ގުނަ އިތުރު ޢަދަދުތަކެކެވެ. މި ލިޔެކިޔުންތަކުގެ ސައްޙަކަން ކަށަވަރުކުރެވިފައި ނުވާތީ، މި ކަމާ މެދު އެއްޗެއް ބުނަން ބޭނުން ނުވާ ކަމުގައި ރަޝިޔާގެ ދިފާޢީ ވުޒާރާއިން ވަނީ ބުނެއެވެ.
ޔޫކްރެއިނުގެ ފައުޖުތަކަށް ބަލާލާއިރު، ހަނގުރާމައިގައި މިހާތަނަށް 124,000 އާއި 131,000 އާ ދެމެދުގެ ޢަދަދެއްގެ ސިފައިންގެ ފުރާނައަށް ނުރައްކާވެފައިވާއިރު، އޭގެ ތެރެއިން 15,500 އާއި 17,500 އާ ދެމެދުގެ ޢަދަދެއްގެ ސިފައިން މަރުވެ، 109,000 އާއި 113,500 އާ ދެމެދު ޢަދަދެއްގެ ސިފައިން ޒަޚަމުވެފައިވާ ކަމުގައިވެސް އެމެރިކާގެ ޖާސޫސީ އިދާރާތަކުން ގަބޫލުކުރެއެވެ. މި ޢަދަދުތައް ޔޫކްރެއިނުންވެސް ކަށަވަރުކޮށްދީފައެއް ނުވެއެވެ.
އެމެރިކާގެ ޖާސޫސީ ލިޔެކިޔުންތައް ލީކުކޮށްލުމުގެ ފަހަތުގައިވާ ޓިޝެއިރާއަކީ އޮންލައިން ގޭމު ކުޅުންތެރިން ބޭނުންކުރާ ޕްލެޓްފޯމެއް ކަމުގައިވާ ޑިސްކޯޑްގައި ޗެޓް ރޫމެއް ހިންގާ މީހެކެވެ. އޭނާ ސިއްރު ލިޔެކިޔުންތައް ލީކުކޮށްލާފައި ވަނީ އެ ޗެޓް ރޫމް މެދުވެރިކޮށެވެ. އޭނާ ހައްޔަރު ކޮށްފައި ވަނީ އެމެރިކާގެ އިރުއުތުރުގައިވާ މެސެޗުސެޓްސް ސްޓޭޓްގެ ނޯތް ޑައިޓަން ކިޔާ ރަށެއްގައި ހުންނަ އޭނާގެ ގޭގައި ހުއްޓައެވެ.
ޓިޝެއިރާއަކީ އެމެރިކާގެ އަސްކަރިއްޔާގެ ވަޒީފާއެއް އަދާކުރަމުންދިޔަ މީހެއް ނަމަވެސް، އޭނާއަކީ އެމެރިކާގެ ސަރުކާރާއި އަދި ޖާސޫސީ އިދާރާތަކާ މެދު ހިތްހަމަނުޖެހޭ މީހެއް ކަމުގައިވެސް ޕޯސްޓަށް ދިން އިންޓަރވިއުއެއްގައި ޗެޓް ރޫމްގެ މެންބަރަކު ބުނެފައިވެއެވެ. އަދި، އެމެރިކާގެ ސަރުކާރާއި ޖާސޫސީ އިދާރާތަކުން ގިނަ މަޢުލޫމާތުތަކެއް ރައްޔިތުންނަށް ސިއްރުކޮށްފައި ބާއްވަން ބޭނުންވާ ކަމުގައި އޭނާ ބުނެފައިވާ ކަމަށް ވެސް މެންބަރަކު ބުންޏެވެ.