މިއަދު ކުރިއަށްދާ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަންގައި، ވޯޓުލާން ކަނޑައަޅާފައިވާ ވަގުތު ހަވީރު 5:00 ޖެހުމާއި ހަމައަށް އިތުރުކޮށްފިއެވެ.
އިލެކްޝަންސް ކޮމިޝަނުން ކުރިން ކަނޑައަޅާފައި އޮތީ ވޯޓްލުން ހެނދުނު 8:00 އިން ހަވީރު 4:00 ޖެހުމާއި ހަމައަށް ކުރިއަށްގެންދިއުމަށެވެ.
އިލެކްޝަންސް ކޮމިޝަނުން ބުނީ ވޯޓް ނެގުމަށް ހަމަޖެހިފައިވާ ވަގުތުގައި މޫސުން ގޯސްވުމުގެ ސަބަބުން ވޯޓުލާން ދާން ބައެއް މީހުންނަށް ދަތިވެފައިވާކަމަށެވެ. އެހެންކަމުން ވޯޓުލުމުގެ ވަގުތު ހަވީރު 5:00 އަށް އިތުރުކޮށްފައިވާކަމަށް އިލެކްޝަންސް ކޮމިޝަނުން ބުނެއެވެ.
މިއަދު ކުރިއަށްދާ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަންގައި، ވޯޓުނެގުމަށް ހަމަޖެހިފައިވާ ވަގުތުގައި މޫސުން ގޯސްވުމުގެ ސަބަބުން ވޯޓުލާން ދިޔުމަށް ދަތިވެފައިވާތީ، ވޯޓުލުމުގެ ވަގުތު މިއަދު 17:00އަށް އިތުރުކުރެވިފައިވާ ވާހަކަ ދަންނަވަން.
— Elections Commission (@ElectionsMv) April 15, 2023
އިލެކްޝަންްސް ކޮމިޝަނުން ހާމަކޮށްފައިވާ ތަފާސް ހިސާބުތައް ދައްކާގޮތުން ވޯޓްލުމުގެ ޙައްޤު ލިބިފައިވާ 3423 މީހުންގެ ތެރެއިން މެންދުރު 2:00 ޖެހުމާއި ހަމައަށް ވޯޓްލާފައިވަނީ 1766 މީހުންނެވެ. އެއީ 910 ފިރިހެނުންނާއި 856 އަންހެނުންނެވެ. މިއީ ވޯޓްލުމުގެ ޙައްޤު ލިބިފައިވާ މީހުންގެ 51.5 އިންސައްތައެވެ. އެހެންކަމުން ވޯޓްނުލާ އަދިވެސް 48.4 އިންސައްތައެއްހާ މީހުން އެބައުޅެއެވެ.
މި އިންތިޚާބުގެ ވޯޓުލުން ކުރިއަށްދަނީ ގުރައިދޫ ދާއިރާގައި ހިމެނޭ 3 ރަށްކަމަށްވާ ގުރައިދޫ، މާފުށި، ގުޅީގެ އިތުރުން މާލެ ސިޓީގައެވެ.
މިއަދު ކުރިއަށްދާ ބައި އިލެކްޝަންގައި މައްސަލަތަކެއް ދިމާވެ، ނުވަތަ ހަމަނުޖެހުމެއް ހިންގުމުގެ އެއްވެސް ކަމެއް ހިނގާފައެއް ނުވެއެވެ. ވޯޓްލުން ކުރިއަށްދާ 4 ސަރަހައްދުގައިވެސް ވޯޓްލުން ކުރިއަށްދަނީ އަމާންކޮށެވެ.