މިއަހަރަކީ މާލެއިން ބޭރުގައި އިހްޔާ ފޯރަމްތައް އެންމެ ގިނައިން ބޭއްވި އަހަރުކަމަށް މިނިސްޓަރ އޮފް އިސްލާމިކް އެފެއާޒް ޑރ.އަޙުމަދު ޒާހިރު އަލީ ވިދާޅުވެއްޖެއެވެ.
މިދިޔަ އަހަރުން ފެށިގެން ސަރުކާރުން އަންނަނީ މާލެއެކޭ އެއްގޮތަށް ރާއްޖޭގެ އެހެން ރަށްރަށުގައިވެސް އިޙްޔާ ފޯރަމްތައް ކުރިއަށްގެންދަމުންނެވެ. މިގޮތުން މިއަހަރުވެސް ވަނީ އެކި ސަރަހައްދުތަކުގައި އާއްމުންގެ ބައިވެރިވުމާއެކު މި ފޯރަމް ކުރިއަށްގެންގޮސްފައެވެ.
އިސްލާމިކް މިނިސްޓްރީން މިދިޔަ އަހަރު ވަނީ މާލެ ސިޓީގެ އިތުރުން އައްޑޫ ސިޓީ، ފުވައްމުލައް ސިޓީ އަދި ކުޅުދުއްފުށި ސިޓީގައިވެސް އިޙްޔާ ފޯރަމް ކުރިއަށްގެންގޮސްފައެވެ. މިއަހަރު މި ޕްރޮގްރާމް އިތުރަށް ފުޅާކުރުމުގެ ގޮތުން ސިޓީތަކުގެ އިތުރުން، 4 އަތޮޅެއްގައިވެސް އިޙްޔާ ފޯރަމް ކުރިއަށްގެންދިޔައެވެ. އެއީ ހއ.ހޯރަފުށި، ރ.ދުވާފަރު، ޅ.ނައިފަރު، އަދި ގދ.ތިނަދުއެވެ.
އަތޮޅުތަކުގައި މިއަހަރު ބާއްވާ އިހްޔާ ފޯރަމްގެ އެންމެފަހު ފޯރަމް ބާއްވާފައިވަނީ ފުވައްމުލަކު ސިޓީގައެވެ.
ފުވައްމުލަކު ސިޓީގައި ބޭއްވި އިހްޔާ ފޯރަމްގައި ވާހަކަފުޅުދައްކަވަމުން އިސްލާމިކް މިނިސްޓަރ ވިދާޅުވީ މިހާ ފުޅާކޮށް އަތޮޅުތަކުގައި އިހްޔާ ފޯރަމްތައް މީގެކުރިން ގެންގޮސްފައިނުވާކަމަށެވެ. އަދި ކުރިއަށްއޮތްތަނުގައިވެސް ރަށްރަށުގައި ބާއްވާ ފޯރަމްތައް ގިނަކޮށް، އިތުރަށް ފުރިހަމަކުރައްވާނެކަަމަށްވެސް މިނިސްޓަރ ވިދާޅުވިއެވެ.
"މީގެ ކުރީގެ އެއްވެސް ސަރުކާރަކުން ނުގެންދާހާ ގިނަ އިޙްޔާ ފޯރަމް މި ރަމަޞާންމަހު އަތޮޅުތަކުގައި ކުރިއަށް ގެންގޮސްފައި މިވަނީ. މިކަމުގައި މިނިސްޓްރީ، ސިޓީ ކައުންސިލްތަކާ، ރަށު ކައުންސިލްްތަކާއި، ދީނީ ޢިލްމުވެރިން އަދި އާއްމުންގެ ބޮޑު އެހީއެއްވެސް ލިބުނު." މިނިސްޓަރ ވިދާޅުވިއެވެ.
އިހްޔާ ފޯރަމްތައް ކުރިއަށްގެންދަނީ އެ ފޯރަމްގައި ބައިވެރިވާ ފަރާތްތަކަށް އިނާމުވެސް ލިބޭ ގޮތަށެވެ. އެގޮތުން ފުވައްމުލަކުގައި ބޭއްވި ފޯރަމްގައި ވަނީ އަތޮޅުތަކުގައި މި ރޯދަމަހު ކުރިއަށްގެންދިޔަ އިޙްޔާ ފޯރަމްތަކުގައި ބައިވެރިވި ފަރާތްތަކުގެ މެދުގައި ގުރުއަތުލުން ބާއްވައި، އިނާމުތައް ހަވާލުކޮށްފައެވެ.
1 ވަނަ އިނާމަކަށް އޮތް އުމްރާ ދަތުރު ލިބުނީ ހޯރަފުށީގައި ބޭއްވި އިޙްޔާ ފޯރަމްގެ ބައިވެރިއަކަށެވެ. 2 ވަނަ އިނާމަކަށް ކަނޑައަޅާފައި އޮތް އައިފޯން 13 އާއި 3 ވަނަ އިނާމަކަށް ކަނޑައަޅާފައި އޮތް ސޯފާސެޓް ލިބުނީ ފުވައްމުލައް ސީޓީގެ އިހްޔާ ފޯރަމްގެ 2 ބައިވެރިއަކަށެވެ.
ކުރީގެ ރައީސް މައުމޫން އަބްދުލްޤައްޔޫމްގެ ވެރިކަމުގައި 1980 ވަނަ އަހަރު ފެށި އިހްޔާ ޖަލްސާ ނުވަތަ އިޙްޔާ ފޯރަމްތަކަކީ ދިނީ އެކިއެކި މުހިންމު މަޢުލޫތަކަށް މަޢުލޫމާތު ފޯރުކޮށްދިނުމާއި، މުޖުތަަޢުގައި ދީނީ ގޮތުން އޮޅުންއަރާ ކަންކަން އޮޅުންފިލުވައިދީ އެކަންކަމުގެ ސައްޙަ މަޢުލޫމާތު ގެނެސްދިނުމުގެ މަޤުސަދުގައި ފަށައިގެން ކުރިއަށްގެންދާ ޕްރޮގްރާމެކެވެ. ނަމަވެސް މީގެކުރިން މި ފޯރަމްތަކާއި ޖަލްސާތައް ކުރިއަށްގެންގޮސްފައިވަނީ ހަމައެކަނި މާލޭގައެވެ. އެހެންކަމުން އަތޮޅުތަކުގައިވެސް މިކަން ފަށަން ނިންމައި، މިދިޔަ އަހަރުން ފެށިގެން އިސްލާމިކް މިނިސްޓްރީން އަންނަނީ އަތޮޅުތަކުގައިވެސް އިޙްޔާ ފޯރަމްތައް ބާއްވަމުންނެވެ.