އެމެރިކާގެ އިރުދެކުނުގައި އޮންނަ ކެންޓަކީ ސްޓޭޓްގެ ރަށެއް ކަމުގައިވާ ލުއީވިލްގެ ބޭންކެއްގެ ތެރޭގައި ބަޑިޖަހައި ހަތަރު މީހުން މަރައިލައިފިއެވެ. ލުއީވިލްގައި ހުންނަ "އޯލްޑް ނޭޝަނަލް ބޭންކު"ގައި ހިންގި ބަޑިޖެހުމުގެ ހަދިސާގައި އިތުރު އަށް މީހަކު ވަނީ ޒަޚަމުވެފައެވެ. ބޭންކުގެ ތެރޭގައި ބަޑީގެ ހަމަލާދީފައި ވަނީ އެ ބޭންކުގައި ކުރިން މަސައްކަތް ކުރި މުވައްޒަފެއް ކަމުގައި ލުއީވިލްގެ ފުލުހުން ބުންޏެވެ.
ލުއީވިލްއަކީ ކެންޓަކީގެ އެންމެ އާބާދީ ބޮޑު ރަށެވެ. އެ ރަށުގައި ހުންނަ އޯލްޑް ނޭޝަނަލް ބޭންކަށް ހަމަލާދީފައި ވަނީ ހެނދުނު، ބެންކު ހުޅުވި ވަގުތުގައެވެ. މި ހާދިސާގެ ރިޕޯޓު ލިބުމުން ފުލުހުން އެ ތަނަށް ހާޒިރުވިއިރު ވެސް، އެ މީހާ ބަޑިޖަހަމުން ގޮސްފައިވާ ކަމުގައި ފުލުހުން ބުނެއެވެ.
އޭނާ ހުއްޓުވަން ފުލުހުން ބާރުގެ ބޭނުންކޮށްފައިވާ ކަމުގައި ލުއީވިލް ފުލުހުންގެ އިދާރާގެ އިސްވެރިޔާގެ ނައިބު ޕޯލް ހަމްފްރީ ވިދާޅުވިއެވެ. ފުލުހުންނާ ދެމެދު ހިނގި ބަޑީގެ ކުރިމަތިލުމުގައި އޭނާ މަރުވެފައިވާ ކަމަށާއި، އޭނާ މަރުވީ ފުލުހުންގެ ހަމަލާއެއްގައިތޯ ނުވަތަ އޭނާ އަމިއްލައަށް ބަޑިޖަހައިގެންތޯ ކަށަވަރު ކުރުމަށް މަސައްކަތް ކުރަމުންދާ ކަމުގައި ވެސް އޭނާ ވިދާޅުވިއެވެ.
ހަމަލާ ބަދަލުކުރުމުގައި ޒަޚަމުވި އަށް މީހުންގެ ތެރޭގައި ދެ ފުލުހުން ވެސް ހިމެނެއެވެ. މި ހާދިސާގައި ޒަޚަމުވި ދެ މީހެއްގެ ހާލު ސީރިޔަސް ކަމަށާއި، އެ ދެ މީހުން ހޮސްޕިޓަލުގައި އެޑްމިޓްކޮށްގެން ފަރުވާދެމުންދާ ކަމުގައި ހަމްފްރީ ވިދާޅުވިއެވެ. އޭގެ ތެރެއިން އެކަކަކީ ފުލުހެކެވެ. މި ހަމަލާގައި ބަޑިޖަހާފައިވާ މީހަކީ ކާކުކަން ދެނެގަތުމުގެ މަސައްކަތް ކުރަމުންދާ ކަމުގައި ވެސް ފުލުހުން ބުންޏެވެ. އޭނާއާއި ބޭންކާ ދެމެދު އޮތް ގުޅުމެއް ހޯދަން ވެސް ފުލުހުން ދަނީ ތަހުޤީޤު ކުރަމުންނެވެ.
އެމެރިކާއަކީ ބަޑި ފަދަ ހަތިޔާރު ގެންގުޅުމުގެ ހައްޤު ޢާންމު ރައްޔިތުންނަށް ދީފައި އޮންނަ ޤައުމެކެވެ. އަދި، ބަޑި ޖެހުމުގެ މި ފަދަ ހާދިސާތައް ގިނަ ޢަދަދަކަށް ހިނގާ ޤައުމެކެވެ. މި އަހަރު ފެށުނު ފަހުން އެމެރިކާގެ އެކި ކަންކޮޅުތަކުގައި ދީފައިވާ ބަޑީގެ ހަމަލާތަކުގައި މަރުވި މީހުންގެ ޢަދަދު މިހާރު ވަނީ 4,900 އަށްވުރެ މައްޗަށް އަރާފައެވެ.
ލުއީވިލްގައި ދިން ބަޑީގެ ހަމަލާތަކާ ގުޅިގެން ރައީސް ޖޯ ބައިޑަން ވަނީ ވަރަށް ބޮޑަށް ކަންބޮޑުވުން ފާޅު ކުރައްވާފައެވެ. އަދި، ޢާންމުންނަށް ހަތިޔާރު ގެންގުޅުމުގެ ޤާނޫނީ ހައްޤު ހަނިކުރަން އޭނާ ކުރަމުންދާ މަސައްކަތްތަކަށް ރިޕަބްލިކަން ޕާޓީން ހުރަސްއަޅަމުންދާތީ، ބައިޑަން ވަނީ އެ ކަމަށް ވެސް ފާޑުވިދާޅުވެފައެވެ.
"އަޅުގަނޑުމެން އަޅަން ޖެހޭ ފިޔަވަޅުތައް ނާޅާތީ، ނިންމަންޖެހޭ ނިންމުންތައް ނުނިންމާތީ، ގިނަ ޢަދަދެއްގެ އެމެރިކާ ރައްޔިތުންގެ ފުރާނަ އެ ދަނީ ގެއްލެމުން. ކޮންގްރެސްގައި ތިބި ރިޕަބްލިކަން ޕާޓީގެ މެންބަރުންނަށް ވިސްނޭނީ ކޮންއިރަކުންތަ؟ ޢާންމު ރައްޔިތުންގެ ފުރާނަ ސަލާމަތްކުރަން އެ މީހުން ތެދުވާނީ ކޮންއިރަކުން؟" ބައިޑަން ވިދާޅުވިއެވެ.
330 މިލިޔަން މީހުންގެ އާބާދީއެއް އޮންނަ އެމެރިކާގެ ޢާންމުންގެ އަތުގައި 400 މިލިޔަނަށްވުރެ ގިނަ ބަޑި އޮންނަ ކަމުގައި ތަފާސްހިސާބުތަކުން ދައްކައެވެ. އޭގެ ތެރޭގައި ފިސްތޯލައިގެ އިތުރުން ސެމީ-އޮޓޮމެޓިކް އަދި އޮޓޮމެޓިކް ރައިފަލް ވެސް ހިމެނެއެވެ. ލުއީވިލްގައި ހިނގާފައިވާ ބަޑިޖެހުމުގެ ހާދިސާގައި އެމެރިކާގައި މި އަހަރުގެ ތެރޭގައި ހިނގާފައިވާ މި ފަދަ ބޮޑު 146 ވަނަ ހާދިސާއެވެ.