ދެކުނު ކޮރެޔާގެ ޖަންގަލިތަކުގައި ރޯވެފައިވާ އަލިފާންގަނޑު ޢާންމުން އުޅޭ ހިސާބުތަކަށް ފެތުރެނީ
ދެކުނު ކޮރެޔާގެ އިރުމަތީ އައްސޭރިފަށުގައި އޮންނަ ގަންގްނަންގެ ޖަންގަލިތަކުގައި ރޯވެފައިވާ އަލިފާންގަނޑުތައް ޢާންމުން ދިރިއުޅޭ ސަރަޙައްދުތަކަށް ފެތުރެން ފެށުމާ ގުޅިގެން އެ ރަށުގައި ދިރިއުޅޭ ގިނަ ޢަދަދެއްގެ ބަޔަކު ރައްކާތެރި ހިސާބުތަކަށް ބަދަލުކުރުމުގެ މަސައްކަތް ފަށައިފިއެވެ. ގަންގްނަންގެ ސަރަޙައްދުތަކަށް ވައިބާރުވެފައިވާ ކަމަށާއި، އަލިފާންގަނޑުތައް ފެތުރެން ފަށާފައި ވަނީ އެ ސަބަބާ ގުޅިގެން ކަމަށް އެ ޤައުމުގެ މޫސުމާ ބެހޭ އިދާރާއިން ބުނެއެވެ.
ގަންގްނަންގައި ރޯވެފައިވާ އަލިފާންގަނޑުތަކުގެ ނުރައްކާ ކުރިމަތިވެފައިވާ ސަރަޙައްދުތަކުގައި ދިއިރުޅޭ 300 އަށްވުރެ ގިނަ މީހުން މިހާރު ވެސް ވަނީ ރައްކާތެރި ހިސާބުތަކަށް ބަދަލުކޮށްފައެވެ. އަދި، އިތުރު މީހުން ސަލާމަތް ކުރުމަށް އޮފިޝަލުން ދަނީ މަސައްކަތް ކުރަމުންނެވެ. ގަންގްނަންއަކީ 200,000 އެއްހާ މީހުންގެ އާބާދީއެއް ދިރިއުޅޭ ރަށެކެވެ. އަލިފާނުގެ ހާދިސާގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ.
އަލިފާންގަނޑުތައް ފެތުރުން ހުއްޓުވައި، ކޮންޓްރޯލް ކުރުމަށް އަލިފާން ނިއްވާ ގިނަ ޢަދަދެއްގެ ބަޔަކު ދަނީ ހަރަކާތްތެރިވަމުންނެވެ. އަދި، އަލިފާން ނިއްވުމުގައި ބޭނުންކުރާ މަތިންދާބޯޓުތައް ވެސް ދަނީ ބޭނުން ކުރަމުންނެވެ. އަލިފާންގަނޑުތަކުގެ ސަބަބުން ޖަންގަލީގެ 170 ހެކްޓަރުގެ ބިން މުޅިން އަނދާފައިވާ ކަމުގައި ގަންގްނަން ރަށް އޮންނަ ގަންގްވަން ޕުރޮވިންސުގެ ގަވަރުނަރު ކިން ޖިން-ޓާއީ ވިދާޅުވިއެވެ.
ގަންގްނަންގެ ޖަންގަލިތަކުގައި ރޯވެފައި ވަނީ، ވައި ގަދަވުމުގެ ސަބަބުން ކަރަންޓުގެ ޚިދުމަތް ދިނުނަށް ބޭނުންކުރާ ކޭބަލްތަކެއްގެ މައްޗަށް ގަސްތަކެއް ވެއްޓުމުގެ ސަބަބުން ކަމަށް، މި ހާދިސާ ތަހުޤީޤު ކުރަމުންދާ ފަރާތްތަކުން ބުނެއެވެ. އަލިފާންގަނޑު ކޮންޓްރޯލް ކުރުމަށް ކުރަމުންދާ މަސައްކަތްތައް އިތުރަށް ހަރުދަނާ ކުރުމަށް އެ ޤައުމުގެ ރައީސް ޔޫން ސުކް ޔޯލް ވަނީ، އެ ޤައުމުގެ އިދާރާތަކަށް ގޮވައިލައްވާފައެވެ.