އެލްޕްސް ފަރުބަދައިގެ ފަރަންސޭސިވިލާތުގައި އޮންނަ ފަޅީގައި ހިނގި އެވަލާންޗެއް ނުވަތަ ފަރުބަދަމަތިން ސްނޯއާއި އައިސް ގަނޑުގަނޑަށް ފޭބުމުގެ ހާދިސާއެއްގައި ހަތަރު މީހުން މަރުވެއްޖެއެވެ. އެލްޕްސް ފަރުބަދައަކީ ވިލާތުގައި އޮންނަ އެންމެ އުސް އަދި އެންމެ ދިގު ފަރުބަދަ ރޭންޖެވެ. އެވަލާންޗު ހިނގާފައި ވަނީ ފަރަންސޭސިވިލާތުގެ އިރުދެކުނުގައި އޮންނަ މޮން ބްލޮން އޮންނަ ސަރަޙައްދުގައެވެ.
މި ހާދިސާގައި އިތުރު ފަސް މީހަކަށް އަނިޔާވި ކަމުގައި ފަރަންސޭސިވިލާތުގެ ދާޚިލީ ވަޒީރު ޖެރާލްޑް ޑާރްމަނިން ވިދާޅުވިއެވެ. ފަރުބަދަމަތިން ފޭބި ސްނޯއާއި އައިސްތަކުގެ ދަށުގައި އިތުރު ބަޔަކު ތާށިވެފައިވޭތޯ ބެލުމަށް އޮފިޝަލުން މަސައްކަތް ކުރަމުންދާ ކަމުގައި ވެސް އޭނާ ވިދާޅުވިއެވެ. މި ހާދިސާގައި މަރުވި މީހުންގެ ޢަދަދު އިތުރުވުމަކީ އެކަށީގެންވާ ކަމެކެވެ.
އެ އެވަލާންޗުގެ ދިގުމިނުގައި 1,000 މީޓަރު، އަދި ފުޅާމިނުގައި 100 މީޓަރު ހުންނާނެ ކަމުގައި އެ ސަރަޙައްދުގައި އޮންނަ ހޫޓް ސަވުއާ ޕްރިފެކްޗަރގެ އޮފިޝަލުން ވިދާޅުވިއެވެ. ސްނޯއާއި އައިސްގެ ދަށުގައި ތާށިވެފައި ވަނީ، ފަރުބަދަމައްޗަށް ހައިކް ކުރުމަށް ދިޔަ ބަޔެއް ކަމަށާއި، އެއީ ކޮން ޤައުމަކަށް ނިސްބަތްވާ ބަޔެއް ކަން އަދި ސާފުވެފައި ނުވާ ކަމުގައި ވެސް އޮފިޝަލުން ވިދާޅުވެއެވެ.
މި ހާދިސާއެއް ހިނގާފާނެ ކަމުގެ އެއްވެސް އިންޒާރެއް، ކަމާގުޅޭ އެއްވެސް އިދާރާއަކުން ދީފައެއް ނުވެއެވެ. މި ހާދިސާގައި މަރުވި މީހުންގެ ޢާއިލާތަކަށް ފަރަންސޭސިވިލާތުގެ ރައީސް އެމަނުއެލް މެކްޚޯން ވަނީ ތަޢުޒިޔާ ދަންނަވާފައެވެ. އަދި، ސްނޯއާއި ގަނޑުފެނުގެ ދަށުގައި ތާށިވެފައިވާ ކަމަށް ބެލެވޭ މީހުން ސަލާމަތް ކުރުމަށް ޓީމުތަކުން މަސައްކަތް ކުރަމުންދާ ކަން ވެސް އޭނާ ފާހަގަކުރެއްވިއެވެ.
މި މަސައްކަތުގައި ހެލިކޮޕްޓަރުތަކުގެ އިތުރުން، މި މަސައްކަތަށް ޚާއްޞަކޮށް ތަމްރީނުކޮށްފައިވާ ކުއްތާތައް ވެސް ދަނީ ބޭނުން ކުރަމުންނެވެ. 2014 ވަނަ އަހަރު ވެސް އެ ސަރަޙައްދުގައި އެވަލާންޗެއް ހިނގައި، ދެބެއިން މަރުވެފައިވެއެވެ. އެއީ، އުމުރުން 20 އަހަރުގެ ދެ ކުދިންނެވެ.