މިނިސްޓަރ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޚްލޫފްގެ މައްޗަށް ކުރާ ކޮރަޕްޝަންގެ ދަޢުވާ އަނބުރާ ގެނައުމަށް ޕްރޮސެކިއުޓަރ ޖެނެރަލްގެ އޮފީހުން ނިންމަވައިފިއެވެ.
ކޮރަޕްޝަން ހުއްޓުވުމާއި މަނާކުރުމުގެ ގާނޫނުގެ ދަށުން ރިޝްވަތު ހިފުމުގެ ދައުވާ މަޚްލޫފްގެ މައްޗަށް އުފުލީ ނޮވެމްބަރު 2021ގައެވެ. މަޚްލޫފުގެ މައްޗަށް ދަޢުވާކޮށްފައިވަނީ، އޭނާ ރައްޔިތުން މަޖިލީހުގެ މެމްބަރަކަށް ހުންނެވިއިރު ވަކި ގޮތަކަށް ވޯޓްދިނުމަށް 33،000 (ތެއްތިރީސް ހާސް ) ޑޮލަރު ރިޝްވަތުގެ ގޮތުގައި ކުރީގެ ނާއިބު ރައީސް އަހްމަދު އަދީބުގެ އަތުން ނެންގެވިކަމުގެ ތުހުމަތުގައެވެ. މި ފައިސާ މަޚްލޫފު ނަންގަވާފައިވަނީ ސްޕެޝަލް އިކޮނޮމިކް ޒޯން ބިލަށް ތާއީދުކޮށް ވޯޓުދިނުމަށްކަމަށް ދައުލަތުގެ ދައުވާގައި ބުނެފައިވެއެވެ.
އެ މައްސަލަ އަނބުރާ ގެނަންނަ ޕީޖީ އޮފީހުން ނިންމެވީ، ރިޝްވަތުގެ ގޮތުގައި ލިބުނު ފައިސާއެއްކަމަށް ސާބިތުކޮށްދެވޭނެކަމަށް ނުފެންނާތީއެވެ.
ޚިޔާނާތުގެ ތުހުމަތުތަކާއެކު ދެފަހަރެއްގެ މަތިން މިނިސްޓަރ މަޚްލޫފް މަގާމުގެ މަސްއޫލިއްޔަތުން އެކަހެރިކުރެއްވިއެވެ. ނަމަވެސް ދައުވާކުރުމާ މެދު ގޮތެއް ނުނިމި މަސްތަކެއް ފާއިތުވުމާއި ގުޅިގެން ސަރުކާރުންވަނީ މަޚްލޫފްގެ ސަސްޕެންޝަން އުވާލައްވާފައެވެ. ސަސްޕެންޝަން އުވާލުމުން މިނިސްޓަރ މަޚުލޫފު މަސައްކަތަށް ނިކުންނަވަން ފެއްޓެވީ މިދިޔަ އަހަރުގެ އޮކްޓޫބަރު މަހުގެ 10ވަނަ ދުވަހުގައެވެ.
މިނިސްޓަރ މަޚުލޫފުވަނީ އޭނާގެ މައްޗަށް ކުރެވުނު ތުހުމަތުތައް ދޮގުކުރައްވާ، ފައިސާ ލިބުނު މުޢާމަލާތަކީ ޑޮލަރު ގަތުމުގެ ސައްޙަ މުއާމަލާތެއް ކަމަށް ވިދާޅުވެފައެވެ.