ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ފުރަތަމަ ފަހަރަށް ރަސްމީކޮށް ރޯދަވީއްލުމެއް ބާއްވަވައިފިއެވެ. ރޯދަވީއްލުން ބާއްވާފައި ވަނީ ވެރިރަށް ކީވްގެ ރަށްބޭރުގައި ހުންނަ މިސްކިތެއްގައެވެ. މި ރޯދަވީއްލުމުގައި އެ ސަރަޙައްދުގައި ދިރިއުޅޭ ގިނަ ޢަދަދެއްގެ މުސްލިމުން ބައިވެރިވިއެވެ.
މި ރޯދަވީއްލުމުގައި ވާހަކަފުޅު ދައްކަވަމުން ޒެލެންސްކީ ވަނީ ކްރައިމިޔާގައި ދިރިއުޅޭ ޓަޓާރް ދަރިކޮޅުގެ މުސްލިމުން ރަޝިޔާގެ އިސްތިއުމާރީ ވެރިކަމުގެ ދަށުގައި ދިރިއުޅެން ޖެހިފައިވާ ނިކަމެތި ހާލަތާ މެދު ކަންބޮޑުވުން ފާޅުކުރައްވާފައެވެ. ދެ މިލިޔަން މީހުންގެ އާބާދީއެއް އޮންނަ ކްރައިމިޔާގެ 15 އިންސައްތަ ރައްޔިތުންނަކީ ޓަޓާރް ދަރިކޮޅަށް ނިސްބަތްވާ މުސްލިމުންނެވެ.
ޔޫކްރެއިނުގެ ދެކުނުން ކަޅު ކަނޑުގައި އޮންނަ ކްރައިމިޔާއަކީ 2014 ވަނަ އަހަރު ރަޝިޔާ ސިފައިން އަތްގަދަކޮށްފައިވާ ސަރަޙައްދެކެވެ. އެ ތަނުގައި ފެންނަ ނުފެންނަ ވޯޓެއް ނެގުމަށް ފަހު، އެއީ މިހާރު ރަޝިޔާގެ ބައެއްގެ ގޮތުގައި އެ ޤައުމުން ވަނީ އަމިއްލައަށް ކަނޑައަޅާފައެވެ. ނަމަވެސް، ޓަޓާރް ދަރިކޮޅުގެ މުސްލިމުން ވަނީ އެ ވޯޓާ ދެކޮޅު ހަދާފައެވެ.
އެ ކަމާ ގުޅިގެން ރަޝިޔާއިން ވަނީ ޓަޓާރް ދަރިކޮޅުގެ މަޖިލިސް އުވައިލާފައެވެ. އަދި، އެ ދަރިކޮޅުގެ މުސްލިމުންނަކީ ޓެރެރިސްޓުންގެ ގޮތުގައި ކަނޑައަޅައި، ގިނަ ޢަދަދެއްގެ މުސްލިމުން ހައްޔަރުކޮށް ޖަލަށްލިއެވެ. ކްރައިމިޔާ ހިފުމާ ގުޅިގެން އެ ދަރިކޮޅުގެ ގިނަ ޢަދަދެއްގެ ބަޔަކު ވަނީ ޔޫކްރެއިނުގެ އެހެން ސަރަޙައްދުތަކަށް ދަތުރުކޮށްފައެވެ.
"ރަޝިޔާއިން ޔޫކްރެއިނުގެ ރައްޔިތުން އަޅުވެތިކުރުމުގެ މަސައްކަތް ފަށާފައި ވަނީ 2014 ވަނަ އަހަރު ކްރައިމިޔާއިން. ކްރައިމިޔާގެ ރައްޔިތުން މިހާރު ދިރިއުޅެނީ ރަޝިޔާގެ އަޅުވެތިކަމުގެ ދަށުގައި. ޔޫކްރެއިނުގެ އެހެން ސަރަޙައްދުތައް އަޅުވެތިކުރަން މިހާރު އެ ދަނީ މަސައްކަތް ކުރަމުން. ނަމަވެސް، ޔޫކްރެއިނާއި ކްރައިމިޔާގެ މުސްލިމުންގެ މިނިވަން ކަމަށް ކުރަމުންދާ ހަނގުރާމަ ހުއްޓައެއް ނުލާނަން،" ޒެލެންސްކީ ވިދާޅުވިއެވެ.
އަދި، ކޮންމެ ރަމަޟާން މަހަކު ޔޫކްރެއިނުގެ މުސްލިމުންނަށް ސަރުކާރުން ރަސްމީކޮށް ރޯދަވީއްލުމެއް ބާއްވަން ނިންމާފައިވާ ކަން ވެސް އޭނާ އިޢުލާނު ކުރެއްވިއެވެ. "ޔޫކްރެއިނުގެ މުސްލިމުންނަށް މި ޤައުމުން ޝުކުރުވެރިވަން. އަދި މުޅި މުސްލިމް އުންމަތަށް ވެސް ޔޫކްރެއިނުގެ ރައްޔިތުންގެ ނަމުގައި ޝުކުރު އަދާކުރަން. މުސްލިމުންނަކީ ސުލްޙައަށް ލޯބިކުރާ ބަޔެއް،" ޒެލެންސްކީ ވިދާޅުވިއެވެ.
ރޯދަވީއްލުމުގެ ކުރިން ޒެލެންސްކީ ވަނީ އެ ޤައުމުގެ އަސްކަރިއްޔާގައި މަސައްކަތް ކުރާ ބައެއް މުސްލިމް ސިފައިންނާ ބައްދަލުކުރައްވާ، އެ މީހުންނަށް މެޑަލް އަރުވާފައެވެ. ރަޝިޔާއިން ޔޫކްރެއިނަށް އަރައިގެން ކުރަމުންދާ ހަނގުރާމައަށް ސުލްޙަވެރި ހައްލެއް ހޯދުމަށް މަސައްކަތް ކުރަމުންދާ ޤައުމުތަކުގެ ތެރޭގައި ސަޢޫދީ ޢަރަބިއްޔާއާއި ތުރުކީވިލާތް ހިމެނެއެވެ.
ޔޫކްރެއިނުގައި އުފައްދާ ގޮވާމުގެ ބާވަތްތައް އެކްސްޕޯޓުކުރުމުގެ ފުރުޞަތު ފަހިކޮށްދީފައި ވަނީ ވެސް މުސްލިމް ޤައުމަކުން ކުރި ބުރަ މަސައްކަތުންނެވެ. ރަޝިޔާގެ ދެކުނުގައިވާ ޗެޗްނިޔާ އަދި ދާގިސްތާނުގައި ވެސް މުސްލިމުންގެ ބޮޑު އާބާދީއެއް އޮވެއެވެ. ނަމަވެސް، އެ ސަރަޙައްދުގެ ބައެއް މުސްލިމުން ރަޝިޔާގެ އަސްކަރިއްޔާއާ ގުޅި، ޔޫކްރެއިނާ ދެކޮޅަށް ކުރަމުންދާ ހަނގުރާމައިގައި ވަނީ ބައިވެރިވެފައެވެ.