އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ މައްޗަށް އުފުލާފައިވާ ދަޢުވާތަކަކީ ޤައުމަށް ލިބުނު ހިތްދަތިކަމެއް ކަމަށް ސިފަކުރައްވާ، އޭނާ ދެކޮޅަށް ދަޢުވާ އުފުލާފައިވާ ޕްރޮސިކިޔުޓަރުންނަށް އޭނާ ފާޑުވިދާޅުވެއްޖެއެވެ. އޭނާއާ ދެކޮޅަށް އުފުލާފައިވާ ދަޢުވާއާ ގުޅިގެން ކޯޓަށް ހާޒިރުކުރުމަށް އޭޕްރިލް 4 ވަނަ ދުވަހު އޭނާ ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. ނަމަވެސް، އަޑުއެހުމަށް ފަހު އޭނާ ވަނީ ދޫކޮށްލާފައެވެ.
މިއީ، އެމެރިކާގައި ރައީސް ކަމުގެ މަޤާމު ފުރުއްވާފައިވާ ބޭފުޅެއްގެ މައްޗަށް ޖިނާޢީ ދަޢުވާއެއް އުފުލާފައިވާ ފުރަތަމަ ފަހަރެވެ. 76 އަހަރުގެ ޓްރަމްޕުގެ މައްޗަށް ދަޢުވާ ކޮށްފައި ވަނީ މަޢުލޫމާތުތަކެއް ސިއްރުކުރުމުގެ ނިޔަތުގައި މީހަކަށް ރިޝްވަތުގެ ފައިސާ ދީ، 2016 ވަނަ އަހަރު ބޭއްވި ރިޔާސީ އިންތިޚާބަށް ނުފޫޒު ފޯރުވަން މަސައްކަތް ކުރުމުގެ ކުށުގެ ތުހުމަތުގައެވެ.
ޓްރަމްޕް ހައްޔަރުކުރުމާ ގުޅިގެން އެމެރިކާއާއި މުޅި ދުނިޔޭގެ ނަޒަރު އެ ކަމަށް ހުއްޓުނެވެ. އަދި، އޭނާގެ ތާރީޚީ ޝަރީއަތުގެ މަރުހަލާ ފެށުނެވެ. މިއީ، 2024 ވަނަ އަހަރު ބާއްވާ ރިޔާސީ އިންތިޚާބުގައި ވާދަކުރައްވާނެ ކަން އިޢުލާނު ކުރެއްވުމުން، އެ ކަމަށް ހުރަސްއެޅުމަށް އުފުލާފައިވާ ދަޢުވާއެއް ކަމުގައި ޓްރަމްޕު ތުހުމަތު ކުރައްވައެވެ.
"މިއީ ދުވަހެއްގެ ކޮޅުން ވެސް އެމެރިކާގައި ހިނގައިފާނެ ފަދަ ކަމެއް ކަމަށް އަހުރެން ދުވަހަކު ވެސް ހިތަކަށް ނާރާ. އަހަރެން ހަމައެކަނި ކުށަކީ މި ޤައުމު ހަލާކުގެ މަގުން ސަލާމަތް ކުރަން ގަދައަޅައި މަސައްކަތް ކުރުން. މި ޤައުމު ނެތިކޮށްލަން އުޅޭ ބަޔެއްގެ ކިބައިން ޤައުމު ސަލާމަތް ކުރަން ތެދުވުން. އިތުރު ކުށެއް ނުކުރަން. އަހުރެންނާ ދެކޮޅަށް އުފުލާފައިވާ ދަޢުވާއަކީ ޤައުމަށް ލިބުނު ހިތްދަތިކަމެއް،" ފްލޮރިޑާގައި އޭނާއަށް ތާޢީދުކުރާ މީހުންނާ ބައްދަލުކޮށް ޓްރަމްޕް ވިދާޅުވިއެވެ.
ނިއު ޔޯކްގެ މެންހެޓަން ކްރިމިނަލް ކޯޓުގައި ބޭއްވި އަޑުއެހުމަށް ފަހު ޓްރަމްޕް ވަނީ ދޫކޮށްލާފައެވެ. ނަމަވެސް، އޭގެ ކުރިން، ކުށުގެ ތުހުމަތުގައި ހައްޔަރުކުރެވޭ އެހެން މީހުންނާ މެދު އަމަލުކުރާ އުސޫލުގެ ދަށުން ޓްރަމްޕުގެ އިނގިލީގެ ނިޝާން ނަގައި، "ބުކިންގް ފޮޓޯ" ނުވަތަ "މަގް ޝޮޓް" ނަގާފައިވެއެވެ. އަދި، ޝަރީއަތުގެ އަޑުއެހުމުގެ ވީޑިޔޯ ދުރަށް ދައްކާފައި ނުވި ނަމަވެސް، ޝަރީއަތުގެ މަޖިލީހުގެ ފޮޓޯތަކެއް ވަނީ ޢާންމުކޮށްފައެވެ. އަޑުއެހުން ނިމުމުން ޓްރަމްޕް ވަނީ ފްލޮރިޑާގެ މާރް-އަ-ލާގޯގައި ހުންނަ އޭނާގެ ގެކޮޅަށް ވަޑައިގަންނަވާފައެވެ.
"މިއީ، އެމެރިކާގެ ތާރީޚުގައި ވެސް މި ޤައުމަށް ކުރިމަތިވި އެންމެ އަނދިރި އަދި ހިތްދަތި ވަގުތުކޮޅު. ނަމަވެސް، އަހުރެންގެ އަޒުމެއް ނުގުޑާނެ. އަހުރެންގެ ހިތްވަރެއް ވެސް ނޭލޭނެ،" ޓްރަމްޕް ވިދާޅުވިއެވެ. އޭނާއާ ދެކޮޅަށް އުފުލާފައިވާ ދަޢުވާތަކަށް އޭނާ އިންކާރު ކުރައްވައެވެ.
ޓްރަމްޕާ ދެކޮޅަށް ދަޢުވާ އުފުލުގައި އިސްކޮށް އުޅުއްވަނީ މެނެހެޓަންގެ ޑިސްޓްރިކްޓް އެޓަރނީ އެލްވިން ބްރެގެވެ. ޓްރަމްޕްގެ މައްޗަށް 34 މައްސަލައެއްގައި ދަޢުވާކޮށްފައިވާއިރު، މި ދަޢުވާތައް ގުޅެނީ އޮޅުވައިލައިގެން މީހަކަށް ރިޝްވަތު ފައިސާ ދިނުމާއެވެ. އަދި، އެ ފައިސާ ދިންކަން ފޮރުވުމަށް މަސައްކަތް ކުރުމެވެ.
އޭނާ ރިޝްވަތު ދީފައިވާ ކަމަށް ބެލެވެނީ ސްޓޯމީ ޑެނިއެލްސް ކިޔާ އަންހެނަކަށެވެ. އެއީ، އޮރިޔާންކާޑު އުފައްދާ މީހެކެވެ. އޭނާއަށް ރިޝްވަތުގެ ފައިސާ ދީފައި ވަނީ، ޓްރަމްޕާއި އޭނާއާ މެދު ކުރިން ހިނގާފައިވާ ލޯބީގެ ގުޅުމުގެ މަޢުލޫމާތު ސިއްރު ކުރުމުގެ ނިޔަތުގައެވެ. ރިޝްވަތާ ގުޅޭ އަދި ލޯބީގެ ގުޅުމާ ގުޅޭ ތުހުމަތުތައް ވެސް ޓްރަމްޕް ދޮގުކުރައްވައެވެ. މި ކުށާ ގުޅޭ މައްސަލައެއްގައި ޓްރަމްޕުގެ ކުރީގެ ޗީފް ފައިނޭންޝަލް އޮފިސަރ އެލަން ވީސްލްބަރްގްގެ މައްޗަށް ކުށް ސާބިތުވެ، އޭނާ މިހާރު ދަނީ ޖަލު ހުކުމެއް ތަންފީޒު ކުރަމުންނެވެ.
ޑެނިއެލްސްއަށް ޓްރަމްޕް 130,000 އެމެރިކާ ޑޮލަރު ދީފައިވާ ކަމަށް ތުހުމަތު ކުރެވޭއިރު، އޮރިޔާންކާޑު އުފައްދާ މޮޑެލްއެއް ކަމުގައިވާ ކެރަން މެކްޑޫގަލްއަށާއި، ޓްރަމްޕް ޓަވަރުގައި ދޮރުވާނެއްގެ ގޮތުގައި މަސައްކަތް ކުރާ މީހަކަށް ވެސް ޓްރަމްޕް ފައިސާ ދީފައިވާ ކަމުގައި ބްރެގް ތުހުމަތު ކުރެއެވެ. މެކްޑޫގަލްއަށް 150,000 އެމެރިކާ ޑޮލަރު އަދި ދޮރުވާނަށް 30,000 އެމެރިކާ ޑޮލަރު ދީފައިވާ ކަމަށް ދަޢުވާގައި ބުނެފައިވެއެވެ. ދޮރުވާނަށް ފައިސާތަކެއް ދީފައި ވަނީ، ކައިވެނީގެ ބޭރުން އެހެން އަންހެނަކާ އެކު ޓްރަމްޕް ހޯދާފައިވާ ދަރިއެއްގެ މަޢުލޫމާތު ސިއްރު ކުރުމުގެ ބޭނުމުގައި ކަމަށް ތުހުމަތު ކުރެވެއެވެ.