ޔަހޫދީ ޖައްބާރު ޓެރެރިސްޓު ފުލުހުން މުސްލިމުންގެ ތިންވަނައަށް އެންމެ މުޤައްދަޞް މިސްކިތް ކަމުގައިވާ މަސްޖިދް އަލް-އަޤްޞާއަށް ގަދަބާރުން ވަދެ، ފަތިސް ނަމާދުގެ ޖަމާޢަތުގައި ބައިވެރިވުމަށް މިސްކިތަށް އަރައި ތިބި މުސްލިމުންނަށް ފުރައްސާރަކޮށް، އަނިޔާކޮށް، ގިނަ ޢަދަދެއްގެ މުސްލިމުން ހައްޔަރުކޮށްފިއެވެ. ރަމަޟާން މަހަކީ ދުނިޔޭގެ އެކި ކަންކޮޅުތަކުގެ މުސްލިމުން އަޅުކަން ކުރުމަށް ވަރަށް ބޮޑު އަހަންމިއްޔަތުކަމެއްދޭ، މުސްލިމުންނަށް މުހިންމު، އަދި ލޯބިކުރާ މައްސަރެކެވެ.
ރަމަޟާން މަހާ ދިމާކޮށް ކޮންމެ އަހަރަކު ވެސް ޔަހޫދީ ޖައްބާރު ސަރުކާރުން ހިންގާ ލާއިންސާނީ އުދުވާންތައް އިތުރުކުރެއެވެ. އެ މީހުން ވެރިވެގަނެފައިވާ ފަލަސްޠީނުގެ ބިންތަކަށް އަރައި، ރޯދައަށް ތިބޭ މުސްލިމުންނަށް ފުރައްސާރަކުރުން ގިނަ ކުރެއެވެ. މުސްލިމުންނާ ކުރިމަތިލައި، ހަމަނުޖެހުން އުފައްދަން މަސައްކަތް ކުރެއެވެ. މި އަހަރުގެ ރަމަޟާން މަހާ ދިމާކޮށް ވެސް ޔަހޫދީ ޖައްބާރު ސިފައިންނާއި ޓެރެރިސްޓު ފުލުހުން ފޮނުވައިގެން އެ މަސައްކަތް މި ވަނީ ފަށާފައެވެ.
2021 ވަނަ އަހަރު ވެސް ޔަހޫދީ ސިރުކާރުން ވަނީ ސިފައިންނާއި ފުލުހުން ފަލަސްޠީނުގެ ރަށްތަކަށް ފޮނުވައި ހަމަނުޖެހުން އުފައްދާފައެވެ. މުސްލިމުންނަށް ފުރައްސާރަކޮށް، އަނިޔާކޮށް، ގިނަ ޢަދަދެއްގެ ބަޔަކަށް ހަމަލާދީ ޝަހީދުކޮށްލާފައެވެ. އެ އަހަރު ޔަހޫދީ ސިފައިން ހިންގި ލާއިންސާނީ އުދުވާންތަކާ ގުޅިގެން ފަލަސްޠީނުގެ މުސްލިމުން ވަނީ ޔަހޫދީންގެ އިސްތިއުމާރީ ވެރިކަމާ ދެކޮޅަށް ތެދުވެފައެވެ. އެ އަހަރު ފަލަސްޠީނުގެ މިނިވަން ކަމަށް ޖިހާދުކުރާ މުޖާހިދުންނާއި ޔަހޫދީ ސިފައިންނާ ދެމެދު ހިނގި ހަނގުރާމަ 10 ދުވަހަށް ދެމިގެންދިޔައެވެ.
އަލް-އަޤްޞާއަށް ޔަހޫދީ ސިފައިން އަރައި މިސްކިތުގައި ތިބި މުސްލިމުންނަށް އަނިޔާކޮށް ފުރައްސާރަކުރުމާ ގުޅިގެން ފަލަސްޠީނުގެ މުޖާހިދުންގެ ޖަމާޢަތްތަކުން ވަނީ އެ ކަމަށް ރައްދު ދީފައެވެ. އަދި، އިސްރާޢީލުގެ އަމާޒުތަކަށް ރޮކެޓް ހަމަލާތަކެއްދީފައެވެ. ރޮކެޓްތައް ފޮނުވައިލާފައި ވަނީ ޣައްޒާއިންނެވެ. މި ހަމަލާތަކުގެ ރައްދުގައި ޔަހޫދީންގެ އަސްކަރީ މަތިންދާބޯޓުތަކުން ވަނީ ޣައްޒާއަށް ބޮން އަޅަން ފަށާފައެވެ. އެ ހަމަލާތައް އަމާޒުކޮށްފައި ވަނީ ޣައްޒާގައި ވެރިކަންކުރާ ހަމާސް ޖަމާޢަތުގެ އަސްކަރީ ތަމްރީނުދޭ މަރުކަޒުތަކަށް ކަމުގައި ޔަހޫދީ އަސްކަރިއްޔާއިން ބުންޏެވެ.
ވައިގެ ހަމަލާތަކުގެ އިތުރުން އަސްކަރީ ޓޭންކުފަހަރު ބޭނުންކޮށްގެން ވެސް އިސްރާޢީލުން ޣައްޒާއަށް ހަމަލާދީފައިވާ ކަމުގައި މަންޒަރު ފެނުނު މީހުން ބުނެއެވެ. މިސްކިތަށް އަރައި ރަބަރު އުންޑަޔާއި މުގުރުން ހަމަލާދިނުމުގެ ސަބަބުން ފަލަސްޠީނުގެ 12 މީހަކަށް އަނިޔާވި ކަމުގައި ފަލަސްޠީނުގެ ރެޑް ކްރެސެންޓުން ބުނެއެވެ. އަދި، އެ މީހުންނަށް ފަރުވާދޭން މަސައްކަތް ކުރި ޞިއްޙީ ޚިދުމަތްތެރިންނަށް ވެސް ޔަހޫދީ ޖައްބާރު ފުލުހުން ހުރަސްއެޅި ކަމުގައި ރެޑް ކްރެސެންޓުން ބުނެއެވެ.
މީގެ އިތުރުން، ޔަހޫދީ ފުލުހުން ވަނީ ކަރުނަ ގޭހާއި ސްޓަން ގްރިނޭޑް ވެސް ބޭނުންކޮށްފައެވެ. ޔަހޫދީ ފުލުހުން ބުނީ، އެ މީހުން މިސްކިތަށް ވަދެފައި ވަނީ ބަޑިބޭހާއި ހަވާ ބޭނުންކޮށްގެން ފުލުހުންނަށް ހުރަސްއެޅި ފަލަސްޠީނުގެ ބަޔަކު ހޯދުމަށް ކަމުގައެވެ. އަދި، ފުލުހުން މިސްކިތަށް ވަނުމުން ފަލަސްޠީނުގެ ޒުވާނުން އެ މީހުންނަށް ހަމަލާދީފައިވާ ކަމަށް ވެސް ޔަހޫދީ ފުލުހުން ތުހުމަތު ކުރެއެވެ. އަލް-އަޤްޞާގެ ތެރެއިން 500 އަށްވުރެ ގިނަ މީހުން ހައްޔަރުކޮށްފައިވާ ކަމުގައި ރިޕޯޓުތައް ބުނެއެވެ.
ޢަރަބި ދުނިޔެއިން ވަނީ ޔަހޫދީ އިސްރާޢީލުގެ ފުލުހުން އަލް-އަޤްޞާއަށް ވަދެ ހިންގާފައިވާ އުދުވާންތައް އެންމެ ހަރުކަށި އިބާރާތުން ކުށްވެރިކޮށްފައެވެ. މި ކަމާ ދެކޮޅަށް އަޑުއުފުލާފައިވާ ޤައުމުތަކުގެ ތެރޭގައި މިޞްރާއި އުރުދުންގެ އިތުރުން ސަޢޫދީ ޢަރަބިއްޔާ ހިމެނެއެވެ. ފަލަސްޠީނުގެ ސަރުކާރުން ބުނީ ޔަހޫދީ ފުލުހުން ހިންގާފައި ވަނީ ބޮޑު ކުށެއް ކަމުގައެވެ. އަދި، މި ފަދަ އަމަލުތައް ގިނަވާ ނަމަ މަސްރަޙު ހޫނުވާނެ ކަމުގައި ވެސް ފަލަސްޠީނުން ބުންޏެވެ.