ރަޝިޔާއިން ހައްޔަރުކޮށްފައިވާ އެމެރިކާގެ ނޫސްވެރިޔާ އެވިން ގެރްޝްކޯވިޗް ވަގުތުން ވަގުތަށް މިނިވަން ކުރުމަށް ނޭޓޯގެ ސެކްރެޓަރީ ޖެނެރަލް ޔެންސް ސްޓޮލްޓެންބަރގް ގޮވައިލައްވައިފިއެވެ. ރަޝިޔާއިން ގެރްޝްކޯވިޗް ހައްޔަރުކޮށްފައި ވަނީ ޖާސޫސް ކުރުމުގެ ތުހުމަތުގައެވެ. ގެރްޝްކޯވިޗަކީ އެމެރިކާގެ ނޫހެއް ކަމުގައިވާ ދަ ވޯލް ސްޓްރީޓް ޖަރނަލްގެ ނޫސްވެރިއެކެވެ.
"ގެރްޝްކޯވިޗް ހައްޔަރު ކުރުމަކީ ވަރަށް ކަންބޮޑުވާ މައްސަލައެއް. މީޑިޔާގެ މިނިވަންކަމަށް ހުރިހާ ފަރާތަކުން ވެސް އިޙުތިރާމު ކުރަން ޖެހޭނެ. އަދި، ކަންކަމާ މެދު ސުވާލު އުފައްދައި، ކަންކަން އޮޅުންފިލުވަން މަސައްކަތް ކުރުމުގެ ހައްޤު ކޮންމެ ނޫސްވެރިއަކަށް އޮންނަން ޖެހޭނެ،" ސްޓޮލްޓެންބަރގް ވިދާޅުވިއެވެ.
ނޭޓޯގެ ޤައުމުތަކުގެ ޚާރިޖީ ވަޒީރުންގެ ކުރިއަށް އޮތް ބައްދަލުވުމުގައި ގެރްޝްކޯވިޗް ހައްޔަރުކޮށްފައިވާ މައްސަލައާ މެދު މަޝްވަރާ ކުރަން ހަމަޖެހިފައިވާ ކަމަށާއި، އޭނާ މިނިވަން ކުރެވޭނެ ގޮތްތައް ހޯދަން މަސައްކަތް ކުރައްވާނެ ކަމުގައި ވެސް ސްޓޮލްޓެންބަރގް ވިދާޅުވިއެވެ. އެ ބައްދަލުވުމުގައި އެމެރިކާގެ ޚާރިޖީ ވަޒީރު އެންތަނީ ބްލިންކަން ވެސް ބައިވެރިވެ ވަޑައިގަންނަވާނެއެވެ.
31 އަހަރުގެ ގެރްޝްކޯވިޗަކީ އެމެރިކާގެ ރައްޔިތެކެވެ. ރަޝިޔާގެ ސަލާމަތީ ބާރުތަކުން އޭނާ ހައްޔަރުކޮށްފައި ވަނީ ބޭރު ޤައުމުތަކަށް ޖާސޫސް ކުރުމުގެ ތުހުމަތުގައެވެ. މިއީ، ސޯވިއެޓް ޔޫނިއަން ރޫޅުނު ފަހުން ޖާސޫސް ކުރުމުގެ ތުހުމަތުގައި ރަޝިޔާއިން ނޫސްވެރިއަކު ހައްޔަރު ކުރި ފުރަތަމަ ފަހަރު ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ގެރްޝްކޯވިޗް ހައްޔަރު ކުރި މައްސަލައިގައި ދަ ވޯލް ސްޓްރީޓް ޖަރނަލްއިން ވަނީ ނުރުހުން ފާޅުކޮށްފައެވެ. އަދި، އޭނާއަކީ ޖާސޫސެއް ނޫން ކަން އޭނާގެ މަސައްކަތްތަކުން ސާފުވާނެ ކަމުގައި އެ ނޫހުން ވަނީ ބުނެފައެވެ. ބްލިންކަން ވެސް ވަނީ ރަޝިޔާގެ ޚާރިޖީ ވަޒީރު ސަރްގޭ ލެވްރޮފަށް ފޯނުން ގުޅުއްވައި ގެރްޝްކޯވިޗް މިނިވަން ކުރުމަށް ގޮވައިލައްވާފައެވެ.