ބަންގްލަދޭޝްގެ ވެރިރަށް ދާކާގައި އޮންނަ ބޮޑު ބާޒާރެއްގައި ނުރައްކާތެރި އަލިފާނުގެ ހާދިސާއެއް ހިނގައި، ބޮޑެތި ގެއްލުންތަކެއް ލިބިއްޖެއެވެ. އަލިފާނުގެ ހާދިސާ ހިނގާފައި ވަނީ ދާކާގައި ހުންނަ އަންނައުނު ވިއްކާ ބާޒާރެއްގައެވެ. އެ ތަނުގައި ރޯވި އަލިފާންގަނޑު ނިއްވައިލެވުނީ އެތަކެއް ސަތޭކަ ފަޔަރފައިޓަރުންގެ މަސައްކަތުންނެވެ.
މި ހާދިސާގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ. ނަމަވެސް، އަލިފާން ރޯވި "ބޮންގޯ ބާޒާރުގެ" ބޮޑު ބައެއްގެ އިތުރުން، އެ މާރުކޭޓާ އިންވެގެން ހުރި ވިޔަފާރިކުރާ ތިން ތަނެއް އަނދައި ހުލިވެފައިވާ ކަމުގައި، އެ ސަރަޙައްދުގެ ވިޔަފާރިވެރިން ބުނެއެވެ.
ދާކާގެ އަލިފާން ނިއްވުމާ ބެހޭ އިދާރާގެ ތަރުޖަމާނު ރަކީބުލް އިސްލާމް ވިދާޅުވީ، ބޮންގޯ ބާޒާރުގައި ރޯވި އަލިފާންގަނޑު ނިއްވައިލެވުމީ 660 މީހުންގެ ޓީމެއްގެ މަސައްކަތުން ކަމުގައެވެ. އަދި، އަލިފާންގަނޑު މުޅިން ކޮންޓްރޯލްގެ ދަށަށް ގެނެވިފައި ވަނީ ފަތިހުގެ ވަގުތުގައި ކަމަށް ވެސް އޭނާ ވިދާޅުވިއެވެ. މި މަސައްކަތުގައި ބަންގްލަދޭޝްގެ އަސްކަރީ ހެލިކޮޕްޓަރުތައް ބޭނުންކޮށްގެން އެހީތެރިކަން ފޯރުކޮށްދީފައިވެއެވެ.
ބޮންގޯ ބާޒާރަކީ ހެޔޮ އަގުގައި އަންނައުނު ވިއްކާ މަޝްހޫރު ބާޒާރެކެވެ. ބަންގްލަދޭޝްގައި ހުންނަ މަޝްހޫރު ބްރޭންޑުތަކުގެ ކާރުޚާނާތަކުން އުފައްދާ އަންނައުނުގެ ތެރެއިން ވަކި މިންގަނޑަކަށް ނުފެތޭ އަންނައުނު ވިއްކަނީ އެ ބާޒާރުގައެވެ. އެ ތަނުގައި ވިއްކާ ބައެއް މަޝްހޫރު ބްރޭންޑުތަކުގެ އަންނައުނުގެ ތެރޭގައި ޓޮމީ ހިލްފިގަރ ވެސް ހިމެނެއެވެ.
ކުރިއަށް ފިޠުރު ޢީދު އޮތް އިރު، ބޮންގޯ ބާޒާރުގައި ހިނގާފައިވާ އަލިފާނުގެ ހާދިސާއާ ގުޅިގެން އެ ތަނުގެ ވިޔަފާރިވެރިންނަށް ވަރަށް ބޮޑު މާލީ ގެއްލުމެއް ލިބިފައިވާ ކަމުގައި އެ މީހުން ބުނެއެވެ. ބައެއް ވިޔަފާރިވެރިން ބުނީ، ޢީދަށް ޚާއްޞަކޮށް ބައެއް މީހުން 15,000 އެމެރިކާ ޑޮލަރާ ގާތްކުރާ ޢަދަދުތަކުން މުދާ ގަނެފައިވާ ކަމުގައެވެ. އަދި، އަލިފާނުގެ އެ ހުރިހާ ތަކެތި އަނދައި ހުލިވެފައިވާ ކަމުގައި ވިޔަފާރިވެރިން ބުނެއެވެ.