އަސްކަރީ ދާއިރާގެ ބްލޮގެއް ހިންގާ ރަޝިޔާގެ މަޝްހޫރު ބްލޮގަރެއް ކަމުގައިވާ ވްލެޑްލެން ޓަޓަރްސްކީ މަރައިލައިފިއެވެ. އޭނާ މަރައިލާފައި ވަނީ ރަޝިޔާގެ ދެވަނަ އެންމެ ބޮޑު ރަށް ސެއިންޓް ޕީޓަރސްބަރގުގައި ހުންނަ ކެފޭއެއްގައި ބާރުގަދަ ބޮމެއް ގޮއްވައިލައިގެން ދިން ހަމަލާއެއްގައެވެ.
މި ހަމަލާގައި މަރުވެފައިވާ ކަން ކަށަވަރު ކުރެވިފައި ވަނީ އެންމެ މީހެކެވެ. އެއީ ޓަޓަރްސްކީއެވެ. ނަމަވެސް، މި ހަމަލާގައި އިތުރު 25 މީހަކު ޒަޚަމުވި ކަމަށާއި، އޭގެ ތެރެއިން 24 މީހަކަށް ހޮސްޕިޓަލުގައި ފަރުވާދޭން ޖެހުނު ކަމުގައި ރަޝިޔާގެ ޞިއްޙަތާ ބެހޭ ވުޒާރާއިން ހާމަކުރެއެވެ.
މިއީ ޓަޓަރްސްކީ މަރައިލުމަށް ދިން ހަމަލާއެއް ކަމަށާއި، މި ހާދިސާ ތަހުޤީޤު ކުރަމުންދާ ކަމުގައި ރަޝިޔާގެ އޮފިޝަލުން ވިދާޅުވެއެވެ. މި ހަމަލާގައި ޒަޚަމުވި މީހުންގެ ތެރެއިން ހަ މީހެއްގެ ހާލަތު ސީރިޔަސް ކަމަށް ވެސް ރަޝިޔާގެ ޞިއްޙަތާ ބެހޭ ވުޒާރާއިން ބުންޏެވެ.
މި ހަމަލާގައި ބޮން ގޮއްވައިލާފައި ވަނީ ސެއިންޓް ޕީޓަރސްބަރގުގެ ނޭވާ ކޯރު ކައިރީގައި ހުންނަ "ސްޓްރީޓް ފުޑް ބާ ނަމްބަރ 1" ކިޔާ ކެފޭއެއްގައި ކަމަށް ރަޝިޔާގެ ދާޚިލީ ވުޒާރާއިން ބުނެއެވެ. ބިން ހަރުކޮށްފައި ވަނީ، ޓަޓަރްސްކީއަށް ހަދިޔާއެއްގެ ގޮތުގައި ދިން ބުދެއްގެ ފާޑުގެ އެއްޗެއްގެ ތެރޭގައި ކަމަށް މި ހަމަލާ ތަހުޤީޤު ކުރާ އޮފިޝަލުން ވިދާޅުވިއެވެ.
ޓަޓަރްސްކީ އަތަށް އެ ބުދު ބަންދުކޮށްފައިވާ ފޮށި ދިނީ އޭނާ ދަންނަ އަންހެން ކުއްޖެއް ކަމަށް ބެލެވޭ ކަމުގައި ވެސް ތަހުޤީޤީ އިދާރާތަކުން ބުނެއެވެ. އުމުރުން 40 އަހަރުގެ ޓަޓަރްސްކީގެ އަސްލު ނަމަކީ މެކްސިމް ފޯމިންއެވެ. އޭނާގެ ޓެލެގްރާމް ޗެނަލްގެ ފޮލޮވަރުންގެ ޢަދަދު 500,000 އަށްވުރެ މައްޗަށް އަރާއިރު، އޭނާއަކީ ރަޝިޔާ ސިފައިން ޔޫކްރެއިނަށް ފޮނުވައިގެން ކުރަމުންދާ ހަނގުރާމައަށް ތާޢީދުކުރާ މީހެކެވެ.
ބްލޮގް މެދުވެރިކޮށް އޭނާ ކުރާ މައިގަނޑު މަސައްކަތަކީ ރަޝިޔާއާއި ޔޫކްރެއިންގެ އަސްކަރިއްޔާގެ ހަރަކާތްތަކުގެ ވީޑިޔޯތައް ޢާންމުކޮށް، އެ ވީޑިޔޯތައް އެނެލައިޒްކޮށް، ޔޫކްރެއިނުގައި ތިބި ރަޝިޔާގެ ސިފައިންނަށް އިރުޝާދު ދިނުމެވެ. މި ހަމަލާ ދީފައި ވަނީ، "ސައިބަރ ފްރޮންޓް ޒީ"ގެ ނަން ދީފައިވާ ގުރޫޕަކުން ހަފުލާއެއް ބޭއްވުމަށް ކެފޭ ކުއްޔަށް ނަގާފައިވާ ވަގުތެއްގައެވެ.
ޓަޓަރްސްކީއަކީ އަސްލު ޔޫކްރެއިނުގެ އިރުމަތީގައިވާ ޑޮނެޓްސް ސަރަޙައްދަށް އުފަން މީހެކެވެ. ޑޮނެޓްސްކުގެ ބޮޑު ސަރަޙައްދަކަށް ރަޝިޔާ ސިފައިން ވަނީ އަތްގަދަކޮށްފައެވެ. އޭނާ މަރައިލުމާ ގުޅިގެން ޔޫކްރެއިނުގެ ރައީސް ވޮލޮޑޮމީރް ޒެލެންސްކީގެ އިސް މުޝީރު މިޚައިލޯ ޕޮޑޮލްޔެކް ވިދާޅުވީ، މިއީ ޔޫކްރެއިނުން ފަހަތުގައި އޮވެ ހިންގާފައިވާ ޓެރެރިޒަމްގެ އަމަލެއް ކަމަށް ތުހުމަތުކުރަން ރަޝިޔާއިން މަސައްކަތް ކުރާނެ ކަމަށް ގަބޫލުފުޅު ކުރައްވާ ކަމުގައެވެ.
2022 ވަނަ އަހަރުގެ އޮގަސްޓު މަހު ރަޝިޔާގެ ވެރިރަށް މޮސްކޯގައި ދިން ވަރުގަދަ ބޮމުގެ ހަމަލާއެއްގެ ފަހަތުގައި ވެސް ވަނީ ޔޫކްރެއިނު ކަމަށް ރަޝިޔާއިން ވަނީ ތުހުމަތުކޮށްފައެވެ. ނަމަވެސް، ޔޫކްރެއިނުން އެ ތުހުމަތު ދޮގުކުރެއެވެ. އެ ހަމަލާ އަމާޒުކޮށްފައި ވަނީ ރަޝިޔާގެ ރައީސް ވްލަޑިމިޔަރ ޕުޓިންއާ ގާތް ގުޅުމެއް އޮންނަ އެލެގްޒެންޑަރ ޑޫގިންގެ އަންހެން ދަރިފުޅަށެވެ. އެ ހަމަލާގައި ޑޫގިންގެ އަންހެން ދަރިފުޅު ވަނީ މަރުވެފައެވެ.