މިރޭގެ އިޚްޔާ ފޯރަމް ގެނެސްދޭނީ ސްކޫލް ދަރިވަރުން

ބަދަލުތަކާއެކު މިއަހަރު ފަށާފައިވާ އިޙްޔާ ޕްރޮގްރާމްގައި، ސްކޫލް ދަރިވަރުން ހުށައަޅައިދޭ ފުރަތަމަ އިޙްޔާ ފޯރަމް މިރޭ އޮންނާނެއެވެ. އިސްލާމިކް މިނިސްޓްރީން ވިދާޅުވީ މިއިޙްޔާ ފޯރަމް ކުރިއަށްގެންދާނީ އަލްމަދްރަސަތުލް ޢަރަބިއްޔަތުލް އިސްލާމިއްޔާގެ ދަރިވަރުންކަމަށެވެ.

މިރޭގެ ފޯރަމްގެ މަޢުޟޫއަކީ "ޔޫރަޕުގެ ކުރިއެރުމުގައި މުސްލިމުންގެ ދައުރު" މިއެވެ.

މިއީ ރަމަޟާން މަހު ކުރިއަށްގެންދާ ދީނީ ދަރުސް ޕްރޮގްރާމް "އިޙްޔާ ފޯރަމް"ގައި މިގޮތަށް ސްކޫލް ދަރިވަރުންނަށް ހުށައެޅުމުގެ ފުރުޞަތު ދޭ ފުރަތަމަ ފަހަރެވެ. މިއީ އިސްލާމްދީނާއި މެދު ކުދިންގެ ހިތުގައި ލޯބި ޖައްސާ، އަދި ދީނީ ޢިލްމު ފެތުރުމުގައި ޒުވާނުން ޝައުގުވެރިކުރުމަށް ފަށާ މަސައްކަތެކެވެ.

މިރޭގެ އިޙްޔާ ފޯރަމް އޮންނާނީ އިސްލާމީ މަރުކަޒުގެ ޖަލްސާކުރާ މާލަމުގައި، 21:30ގައެވެ. މިއީ އާއްމުކޮށް ހުޅުވާލައިގެން ބާއްވާ ފޯރަމެކެވެ.

ދަރިވަރުންގެ އިޙްޔާ ފޯރަމް
މައުޟޫޢު " ޔޫރަޕްގެ ކުރިއެރުމުގައި މުސްލިމުންގެ ދައުރު"
?️ އަލްމަދްރަސަތުލް ޢަރަބިއްޔަތުލް އިސްލާމިއްޔާ
? އިސްލާމީ މަރުކަޒުގެ ހޯލްގައި
⌛️ ގަޑި: 21:30
?03 އޭޕްރިލް 2023 (މިރޭ) pic.twitter.com/jaYUI6zJrM

— Ministry of Islamic Affairs (@MVIaffairs) April 3, 2023

މިއަހަރު ޖުމްލަ 17 އިޙްޔާ ފޯރަމް ބޭއްވުމަށް ހަމަޖެހިފައިވާއިރު މާލޭގައި 9 ޕްރޮގްރާމް އަދި އަތޮޅުތަކުގައި 8 ޕްރޮގްރާމް ކުރިއަށް ގެންދާނެއެވެ. އަތޮޅުތަކުގައި އިޙްޔާ ފޯރަމް ބާއްވަން ފަށާފައިވަނީ މިދިޔަ އަހަރުން ފެށިގެންނެވެ. އަތޮޅުތަކުގައި އިޙްޔާ ފޯރަމްތައް ކުރިއަށްގެންދަނީ ހަފްތާ ބަންދުގައެވެ.

މި ޕްރޮގްރާމްގައި ގުރުއަތުން ހޮވޭ ފަރާތްތަކަށް ދީނީ ފޮތް ހަދިޔާކުރުން ކުރިއަށްގެންދެއެވެ.