ޔޫކްރެއިނުގެ އިރުމަތީގައިވާ ރަށެއް ކަމުގައިވާ ބަޚްމުތް ހިފިއްޖެ ކަމަށް، އެ ރަށް ހިފުމަށް މަސައްކަތް ކުރަމުންދާ ވެގްނަރ ގުރޫޕުން ބުނެފިއެވެ. ބަޚްމުތަކީ ދޮންބާސް ސަރަޙައްދުގައި އޮންނަ ޑޮނެޓްސްކުގެ ރަށެކެވެ. އެ ރަށް ހިފުމަށް، ވެގްނަރ ގުރޫޕުގެ ކުލީ ސިފައިން ފޮނުވައިގެން ރަޝިޔާއިން މަސައްކަތް ފަށާފައި ވަނީ މީގެ އަށެއްކަ މަސް ކުރިންނެވެ.
ބަޚްމުތް ހިފުމަށް ކުރަމުންދާ ހަނގުރާމައިގެ ކުރީ ސަފަށް ރަޝިޔާއިން ވަނީ އެ ޤައުމުގެ އަސްކަރިއްޔާގެ އެންމެ ތަޖުރިބާކާރު ޔުނިޓުތައް ވެސް ފޮނުވާފައެވެ. ވެގްނަރ ގުރޫޕުން ބުނީ، ބަޚްމުތްގެ ސިޓީ ހޯލް، ނުވަތަ ސިޓީ ކައުންސިލުގެ މައި އިދާރާ މިހާރު އޮތީ އެ މީހުންގެ އަތްދަށުގައި ކަމަށެވެ. އަދި، ޤާނޫނީ ގޮތުން ބަލާއިރު، އެއީ މިހާރު ރަޝިޔާގެ އަތްދަށުގައި އޮތް ރަށެއް ކަމުގައި ވެސް ވެގްނަރ ގުރޫޕުން ބުންޏެވެ.
ބަޚްމުތް ހިފާފައިވާ ކަން އިޢުލާނު ކޮށްފައި ވަނީ ވެގްނަރ ގުރޫޕުގެ އިސްވެރިޔާ ޔެވްގެނީ ޕްރިގޮޜިންއެވެ. އޭނާ ވަނީ، ސިޓީ ހޯލްގައި ރަޝިޔާގެ ދިދައެއް ހިފައިގެން ހުރި މަންޒަރު ފެންނަ ވީޑިޔޯއެއް ޢާންމުކޮށްފައެވެ. ބަޚްމުތް ހިފީ ވެގްނަރ ގުރޫޕުގެ ކުލީ ސިފައިންގެ ބުރަ މަސައްކަތުން ކަމުގައި ވެސް އޭނާ ބުނެއެވެ.
ބަޚްމުތް ހިފާފައިވާ ކަމަށް ވެގްނަރ ގުރޫޕުން ބުނި ނަމަވެސް ޔޫކްރެއިނުން އެ ކަން ކަށަވަރު ކޮށްދީފައެއް ނުވެއެވެ. ޕްރިގޮޜިންގެ ވީޑިޔޯއާ ގުޅޭ ގޮތުން ޔޫކްރެއިނުގެ އަސްކަރިއްޔާގެ އިސް އޮފިޝަލުން ވިދާޅުވީ، އެ ރަށުގެ ސިޓީ ހޯލް ހިފުމަށް ވެގްނަރ ގުރޫޕުގެ ކުލީ ސިފައިން 20 ފަހަރެއްގެ މަތިން މަސައްކަތް ކުރި ކަމުގައެވެ. އަދި، އެ 20 ފަހަރު ވެސް ޔޫކްރެއިނު ސިފައިން އެ ރަށް ދިފާޢުކޮށްފައިވާ ކަމުގައި އޮފިޝަލުން ވިދާޅުވިއެވެ.
ބަޚްމުތް ދިފާޢުކުރުމަކީ ޔޫކްރެއިނުގެ މިނިވަންކަމާއި ސިޔާދަތު ހިމާޔަތްކުރުމަށް އެ ޤައުމުގެ ސިފައިން ކުރަމުންދާ ހަނގުރާމައިގެ މުހިންމު ފިޔަވަޅެއް ކަމުގައި ޔޫކްރެއިނުން ގަބޫލުކުރެއެވެ. ބަޚްމަތް ރަޝިޔާގެ އަތްދަށަށް ވެއްޓިފައިވާ ކަމަށް ވެގްނަރ ގުރޫޕުން ބުނުމާ ގުޅިގެން ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވަނީ އެ ރަށް ދިފާޢުކުރުމަށް ހަނގުރާމަ ކުރަމުންދާ އޭނާގެ ސިފައިންނަށް ތަޢުރީފު ކުރައްވާފައެވެ.
ބަޚްމުތާ 27 ކިލޯމީޓަރު ދުރުގައި އޮންނަ ކޮސްޓްޔަންޓިވްނިކާއަށް ވެސް ރަޝިޔާ ސިފައިން މިހާރު ދަނީ ވަރުގަދަ ހަމަލާތަކެއް އަމާޒުކުރަމުންނެވެ. އެއީ، ޢާންމުން ދިރިއުޅޭ ރަށެކެވެ. ރަޝިޔާއިން އެ ރަށަށް ދިން މިސައިލް ހަމަލާތަކުގައި ޢާންމުންގެ ހަ މީހުން މަރުވިއެވެ. އެއީ، ތިން އަންހެނުންނާއި ތިން ފިރިހެނުންނެވެ.
މިސައިލް ހަމަލާތައް އަރާފައި ވަނީ ޢާންމުން ދިރިއުޅޭ ޢިމާރާތްތަކަށެވެ. މި ހަމަލާތަކުގައި އިތުރު 11 މީހަކު ޒަޚަމުވެފައިވާ ކަމުގައި ވެސް ކޮސްޓްޔަންޓިވްނިކާގެ އޮފިޝަލުން ވިދާޅުވެއެވެ. ރަޝިޔާގެ މިސައިލް ހަމަލާއެއްގައި 14 ބުރީގެ ޢިމާރާތަކަށް ވެސް ބޮޑެތި ގެއްލުންތަކެއް ލިބިފައިވެއެވެ. އަދި، ޢާންމުން ދިރިއުޅޭ ގެތަކަށް ވެސް ގެއްލުންވިއެވެ.
ރަޝިޔާ ސިފައިން ޔޫކްރެއިނަށް ފޮނުވައިގެން ހަނގުރާމަ ފަށާފައި ވަނީ މީގެ އަހަރަކަށް ވުރެ ގިނަ ދުވަސް ކުރިން 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައިގައި ރަޝިޔާ ސިފައިން ވަނީ ޔޫކްރެއިނުގެ ބައެއް ސަރަޙައްދުތަކަށް އަތްގަދަކޮށްފައެވެ. އޭގެ ތެރޭގައި އިރުމަތީގައިވާ ލުހާންސްކާއި ޑޮނެޓްސްކުގެ ބޮޑު ބަޔަކާއި ދެކުނުގައިވާ ޒަޕޮރީޜިޔާ ހިމެނެއެވެ.