ދެކުނު ކޮރެޔާގެ ޖޮންޏޯ ވޯޑުގައި އޮންނަ މައުންޓް އިންވޮންގް ފަރުބަދައިގެ ޖަންގަލިތަކުގައި ރޯވި އަލިފާންގަނޑު ނިންވައިލައިފިއެވެ. އެ ފަރުބަދައަކީ ފަތުރުވެރިންގެ މެދުގައި މަޤުބޫލު މަންޒަލެކެވެ. އެ ތަނުގެ ޖަންގަލިތަކުގައި ރޯވި އަލިފާންގަނޑު ނިއްވައިލެވިފައި ވަނީ 25 ގަޑިއިރުގެ މަސައްކަތުންނެވެ.
ފަރުބަދައިގެ ޖަންގަލިތަކުގައި ރޯވި އަލިފާންގަނޑު ވަރަށް ހަލުވިކަމާ އެކު ފެތުރެން ފަށާފައިވާ ކަމަށް ޖޮންޏޯގެ އޮފިޝަލުން ވިދާޅުވެއެވެ. އަދި، ޢާންމުން ދިރިއުޅޭ ހިސާބުތަކަށް އަލިފާންގަނޑު ފެތުރުމުގެ ނުރައްކާވުމުން، އެ ސަރަޙައްދުގައި ހުންނަ 120 އަށްވުރެ ގިނަ ގޭގައި ދިރިއުޅޭ ރައްޔިތުން ރައްކާތެރި ހިސާބުތަކަށް ވަނީ ބަދަލުކޮށްފައެވެ.
އޭޕްރިލް 2 ވަނަ ދުވަހު މެންދުރު ކުރީގައި ރޯވި އަލިފާންގަނޑު ނިއްވައިލެވިފައި ވަނީ އޭގެ 25 ގަޑިއިރު ފަހުން، އަނެއް ދުވަހުގެ ދަންވަރުގެ ވަގުތުގައެވެ. މި ހާދިސާގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ. މި ހާދިސާގައި 15 ހެކްޓަރުގެ ޖަންގަލި އަނދާފައިވާ ކަމަށް އޮފިޝަލުން ވިދާޅުވެއެވެ. އެއީ، 30 ފުޓުބޯޅަ ދަނޑާ އެއްވަރުގެ ސަރަޙައްދެކެވެ.
މައުންޓް އިންވޮންގެ ޖަންގަލީގައި އަލިފާން ރޯވާން މެދުވެރިވި ސަބަބު ހޯދުމަށް ތަހުޤީޤު ފަށާފައިވާ ކަމުގައި ފުލުހުން ބުންޏެވެ. ފަހަރުގައި މިއީ ގަސްދުގައި ބަޔަކު ރޯކޮށްލި އަލިފާންގަނޑަކަށްވުމަކީ އެކަށީގެންވާ ކަމެއް ކަމަށް ވެސް އޮފިޝަލުން ވިދާޅުވެއެވެ.