ޔަހޫދީން އިސްރާޢީލުން ވެރިވެގަނެފައިވާ ހުޅަނގު އައްސޭރިއަށް އެ ޤައުމުގެ ޓެރެރިސްޓު ސިފައިން ފޮނުވައިގެން ހިންގި ލާއިންސާނީ އުދުވާންތަކެއްގައި ފަލަސްޠީނުގެ ޒުވާނެއް ޝަހީދުކޮށްލައިފިއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ، ޔަހޫދީން ޝަހީދުކޮށްލާފައި ވަނީ އުމުރުން 24 އަހަރުގެ މުޙައްމަދު ރާޢިދު ބަރަދިއްޔާ ކަމުގައެވެ.
ބަރާދިއްޔާ ޝަހީދުކޮށްލާފައި ވަނީ ޔަހޫދީ ސިފައިން އޭނާ ދުއްވަމުން ދިޔަ ކާރަށް ދިން ބަޑީގެ ހަމަލާތަކެއްގައި ކަމުގައި މަންޒަރު ފެނުނު މީހުން ބުނެއެވެ. މި ހަމަލާ ދީފައި ވަނީ ހުޅަނގު އައްސޭރީގެ ބެއިތް ޢައްމަރުގައެވެ. ބަރާދިއްޔާއަށް ހަމަލާދީ ޒަޚަމުކޮށްލުމަށް ފަހު، އޭނާއަށް ފަރުވާދިނުމަށް މަސައްކަތް ކުރުމުން ޔަހޫދީ ސިފައިން އެ ކަމަށް ހުރަސްއަޅާފައިވާ ކަމުގައި ވެސް މަންޒަރު ފެނުނު މީހުން ބުނެއެވެ.
ޔަހުދީ ޖައްބާރު އަސްކަރިއްޔާއިން ބުނީ ބަރާދިއްޔާ ޝަހީދުކޮށްލީ، އިސްރާޢީލު ސިފައިންގެ ބަޔެއްގެ ގައިގައި ކާރުން ޖެއްސުމަށް ފަހު ފިލަން މަސައްކަތް ކުރުމުގެ ކުށުގައި ކަމުގައެވެ. އެ ހާދިސާގައި ތިން މީހަކު ޒަޚަމުވި ކަމަށް ވެސް ޔަހޫދީ އަސްކަރިއްޔާއިން ބުންޏެވެ.
މިއީ، ހުސްވި ހަފުތާއެއްހާ ދުވަހުގެ ތެރޭގައި ފަލަސްޠީނުގެ ބިންތަކަށް އަރައި ޔަހޫދީ ޓެރެރިސްޓު ސިފައިން ޝަހީދުކޮށްލި ފަލަސްޠީނުގެ ދެވަނަ މީހާއެވެ. މަސްޖިދުލް އަޤްޟާ ކައިރީގައި ޔަހޫދީ ޖައްބާރު ސިފައިން ބަޑިޖަހައި ޝަހީދުކޮށްލާފައި ވަނީ އުމުރުން 26 އަހަރުގެ މުޙައްމަދު އަލް-އުޞައިބީއެވެ.
އަލް-އުޞައިބީ ޝަހީދުކޮށްލުމުގެ ކުރިން ކަން ހިނގާފައިވާ ގޮތާމެދު ޔަހޫދީ އިސްރާޢީލުން ވާހަކަދައްކާފައި ވަނީ ދެ ގޮތަކަށެވެ. އިސްރާޢީލުގެ ޤާނޫނު ހަދާ މަޖިލީހުގެ ކުރީގެ މެންބަރެއް ކަމުގައިވާ ޠަލާބް އަލް-ޘާނީ ބުނީ، ޔަހޫދީ ސިފައިން އަލް-އުޞައިބަށް ހަމަލާދީފައި ވަނީ، ފަލަސްޠީނުގެ ޒުވާން ފުރައިގެ އަންހެނަކަށް ޔަހޫދީ ސިފައިންގެ ބަޔަކު ފުރައްސާރަކުރާ މަންޒަރު ފެނިގެން އެ ކަން ހުއްޓުވަން އޭނާ މަސައްކަތް ކުރުމުން ކަމުގައެވެ.
ނަމަވެސް، ޔަހޫދީ ޖައްބާރު އަސްކަރިއްޔާއިން އެ ކަން ދޮގު ކުރެއެވެ. އެ މީހުން ބުނީ އަލް-އުޞައިބަށް ހަމަލާ ދިނީ، އޭނާ ފުލުހެއްގެ ހަތިޔާރު ޖަހައިގަނެ، ފުލުހުންނަށް ހަމަލާދޭން މަސައްކަތް ކުރުމުން ކަމުގައެވެ. ފުލުހެއްގެ ހަތިޔާރު ޖަހައިގަނެފައި ވަނީ، އޭނާއާ ސުވާލު ކުރުމަށް ހުއްޓުވުމުން ކަމުގައި ވެސް ޔަހޫދީ ޓެރެރިސްޓު އަސްކަރިއްޔާއިން ބުންޏެވެ.
ފަލަސްޠީނުގެ މުސްލިމުން ޝަހީދުކުރުމުގެ އިތުރުން، އެ މީހުންނަށް އަލްއަޤްޞާއަށް ވަނުމަށް ޔަހޫދީ ސިފައިން ހުރަސްއަޅަމުންދާ ކަމުގައި ފަލަސްޠީނުގެ ރައްޔިތުން ބުނެއެވެ. 2021 ވަނަ އަހަރު އިސްރާޢީލުން މި ގޮތަށް އަމަލުކުރުމާ ގުޅިގެން ފަލަސްޠީނުގެ މުޖާހިދުން އިސްރާޢީލާ ދެކޮޅަށް ތެދުވިއެވެ. އަދި، އެ ކަމާ ގުޅިގެން ޔަހޫދީ ޖައްބާރު ސިފައިން ފަލަސްޠީނުގެ ރައްޔިތުންނާ ދެކޮޅަށް ހިންގި އުދުވާންތަކުގައި 200 އަށްވުރެ ގިނަ މީހުން ޝަހީދުކޮށްލިއެވެ.
މި އަހަރު ފެށުނު ފަހުން ޔަހޫދީ ޓެރެރިސްޓު ސިފައިން ފަލަސްޠީނުގެ ބިންތަކަށް އަރައި ޝަހީދުކޮށްލާފައިވާ މީހުންގެ ޢަދަދު 92 އަށް އަރައެވެ. އޭގެ ތެރޭގައި ކުށެއް ނެތް ޢާންމުންގެ ތެރެއިން އުމުރުން ދުވަސްވީ މީހުންނާއި، އަންހެނުންނާއި، ކުޑަކުދިން ވެސް ހިމެނެއެވެ.