އ.ދ.ގެ އެންމެ ބާރުގަދަ ގުނަވަން ކަމުގައިވާ ސަލާމަތީ މަޖިލީހުގެ ރިޔާސަތަށް ރަޝިޔާ ޢައްޔަންކުރުމާ ގުޅިގެން ޔޫކްރެއިނުގެ ރައީސް ވޮލޮޑޮމީރް ޒެލެންސްކީގެ ނުރުހުން ފާޅުކުރައްވައިފިއެވެ. ސަލާމަތީ މަޖިލީހުގެ ރިޔާސަތު ރަޝިޔާއާ ހަވާލުކޮށްފައި މި ވަނީ، ހަނގުރާމައިގެ ކުށްތަކާއި ލާއިންސާނީ ޖަރީމާތަކުގެ ތުހުމަތު އެ ޤައުމުގެ ރައީސް ވްލަޑިމިޔަރ ޕުޓިންގެ ކޮނޑުފުޅުގައި އަޅުވަމުންދާ ދަނޑިވަޅެއްގައެވެ.
ރަޝިޔާއިން ސަލާމަތީ މަޖިލީހުގެ ރިޔާސަތު އެންމެ ފަހުން ބަލަހައްޓާފައި ވަނީ 2022 ވަނަ އަހަރުގެ ފެބުރުވަރީ މަހެވެ. ރަޝިޔާ ސިފައިން ޔޫކްރެއިނަށް ފޮނުވައިގެން ޕުޓިން ވަރުގަދަ ހަނގުރާމައެއް ފެއްޓެވީ އެ މަހުގެ 24 ވަނަ ދުވަހުއެވެ. ސަލާމަތީ މަޖިލީހުގެ ރިޔާސަތު އަނެއްކާވެސް ރަޝިޔާއާ ހަވާލުކުރުމަކީ ވަރަށް ފަނާކުރަނިވި ނިންމުމެއް ކަމުގައި ޒެލެންސްކީ ވިދާޅުވިއެވެ.
ޒެލެންސްކީ ވަނީ މި ކަމާ މެދު ކަންބޮޑުވުން ފާޅުކުރައްވައި ވާހަކަފުޅު ދައްކަވަމުން، ރަޝިޔާއިން ޔޫކްރެއިނަށް ދިން ވަރުގަދަ ހަމަލާތަކެއްގައި ފަސް މަހުގެ ތުއްތު ފިރިހެން ކުއްޖަކު މަރައިލާފައިވާ ކަން ވެސް އިޢުލާނު ކުރައްވާފައެވެ. "މިއީ ރަޝިޔާއިން ހިންގަމުންދާ އަމަލުތަކަކީ. ހަމަ އެއް ވަގުތެއްގައި ރަޝިޔާއިން އެ ދަނީ ސަލާމަތީ މަޖިލީހުގެ ރިޔާސަތު ވެސް ބަލަހައްޓަމުން. މި ކަމުން ދޭހަ ކޮށްދެނީ ސަލާމަތީ މަޖިލިސް ބަނގުރޫޓުވެފައިވާ މިންވަރު،" ޒެލެންސްކީ ވިދާޅުވިއެވެ.
15 މެންބަރުން ހިމެނޭ އ.ދ.ގެ ސަލާމަތީ މަޖިލީހުގެ ރިޔާސަތު ބަލަހައްޓާ ޤައުމު ކޮންމެ މަހަކު ބަދަލުވެއެވެ. އަދި، ރިޔާސަތު ބަލަހައްޓާ ޤައުމު ކަނޑައަޅަނީ އިނގިރޭސި އަކުރުތަކުގެ ތަރުތީބުންނެވެ. އެ މަޖިލީހުގެ ރިޔާސަތާ އަލުން ހަވާލުވުމަށް ފަހު ރަޝިޔާއިން ބުނީ، ރިޔާސަތުގެ ހައިސިއްޔަތުން އެ ޤައުމަށް ލިބިގެންވާ ހުރިހާ ހައްޤެއްގެ ބޭނުން އެންމެ ފުރިހަމައަށް ހިފާނެ ކަމުގައެވެ.
އ.ދ.ގެ ސަލާމަތީ މަޖިލީހުގެ ރިޔާސަތާ ރަޝިޔާއިން ހަވާލުވެފައި މި ވަނީ، ޕުޓިން ހައްޔަރުކުރުމުގެ އަމުރެއް ބައިނަލްއަޤުވާމީ ޖިނާޢީ ކީޓު (އައި.ސީ.ސީ)އިން ނެރެފައިވާ ދަނޑިވަޅެއްގައެވެ. ޕުޓިންއާ ދެކޮޅަށް އައި.ސީ.ސީން ކޯޓު އަމުރެއް ނެރެފައި ވަނީ، ޔޫކްރެއިނުގެ ކުޑަކުދިންތަކެއް، އެ ކުދިންނާއި އެ ކުދިންގެ މައިންބަފައިންގެ ނުރުހުމުގައި، ގަދަބާރުން ރަޝިޔާއަށް ގެންދިޔުމުގެ ކުށުގައެވެ. އެއީ، ހަނގުރާމައިގެ ކުށެއްގެ އިތުރުން ލާއިންސާނީ ޖަރީމާއެއްގެ ގޮތުގައި އެ ކޯޓުން ވަނީ ކަނޑައަޅާފައެވެ.
"ރަޝިޔާއަށް ސަލާމަތީ މަޖިލީހުގެ އެންމެ ބާރުގަދަ ގޮނޑީގައި އިށީނދެވުމަކީ ބައިނަލްއަޤުވާމީ މުޖުތަމަޢުގެ މޫނުމަތީގައި ޖެހުމާ އެއް ފަދަ ކަމެއް. މިއިން ދޭހަކޮށްދެނީ ސަލާމަތީ މަޖިލިސް އިސްލާޙުކުރަން ޖެހިފައިވާ ކަން. ޓެރެރިސްޓު ދަޢުލަތަކަށް ސަލާމަތީ މަޖިލީހުގެ ރިޔާސަތުގައި އިނދެވިގެން ނުވާނެ،" ޒެލެންސްކީ ވިދާޅުވިއެވެ.
ރަޝިޔާ ސިފައިން ޔޫކްރެއިނަށް އަރައި ކުރަމުންދާ ހަނގުރާމައަށް 400 އަށްވުރެ ގިނަ ދުވަސް ފާއިތުވެފައިވާއިރު، މި ހަނގުރާމައިގައި އެތަކެއް ހާސް ބަޔެއްގެ ފުރާނަ ވަނީ ގެއްލިފައެވެ. ނަމަވެސް، ހަނގުރާމަ ހިނގަމުންދާތީ، މަރުވެފައިވާ މީހުންގެ ފުރިހަމަ ޢަދަދު ސާފުވާގޮތެއް ނުވެއެވެ. މި ހަނގުރާމައިގައި ޔޫކްރެއިނުގެ ބޮޑު ބަޔަކަށް ރަޝިޔާ ސިފައިން އަތްގަދަކޮށްފައިވާއިރު، ގިނަ ރަށްތައް ވަނީ ސުންނާފަތިކޮށްލާފައެވެ.