ޖުމްހޫރީ ޕާޓީން ކުރިއަށް އޮތް ރިޔާސީ އިންތިޚާބުގައި ވާދަކުރަން ނިންމުމާއި ގުޅިގެން، އެޕާޓީގެ ސްލޮޓްތަކުގައި ސަރުކާރުގެ އިސް ބައެއް މަޤާމުތަކުގައި ތިއްބެވި ބޭފުޅުން ޕާޓިން އިސްތިއުފާދެއްވާ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ތާޢީދުކުރައްވަން ނިންމަވައިފިއެވެ.
އެމްޑީޕީއާއި ވަކިން ޖުމްހޫރީ ޕާޓީން ރިޔާސީ އިންތިޚާބުގައި ވާދަކުރަން ނިންމުމާއި ގުޅިގެން، ޖޭޕީގެ ސްލޮޓްގައި އެމްޓީސީސީގެ ސިއީއޯގެ މަޤާމުގައި ހުންނެވި އާދަމް އާޒިމާއި، އެމްޑަބްލިއުއެސްސީގެ މެނޭޖިންގ ޑިރެކްޓަރ ޙަސަން ޝާޙް ވަނީ ޖުމްހޫރީ ޕާޓީން ވަކިވެވަޑައިގެންފައެވެ. އަދި އެބޭފުޅުން ވަނީ ކުރިއަށް އޮތް ރިޔާސީ އިންތިޚާބު، ދެވަނަ ދައުރަކަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިންތިޚާބުކުރެއްވުމަށް މަސައްކަތްކުރައްވާނެކަން ހާމަކުރައްވާފައެވެ.
ޖޭޕީން ވަކިވެ އެބޭފުޅުން ޕާޓީގެ ލީޑަރަށް ފޮނުއްވާފައިވާ ސިޓީތަކުގައިވެސް ވަނީ، ކުރިއަށް އޮތް ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ދެވަނަ ދައުރެއް ލިބުމަކީ ރާއްޖެއާއި ރައްޔިތުންނަށް އެންމެ ފައިދާ ހުރި ގޮތް ކަމަށް ގަބޫލުފުޅުކުރައްވާކަމަށް ވިދާޅުވެފައެވެ. އާޒިމާއި ޝާޙްގެ އިތުރުންވެސް ޖޭޕީގެ ސްލޮޓްތަކުގައި ސަރުކާރުގެ ސިޔާސީ މަޤާމުތަކުގައި ތިއްބެވި އެހެން ބައެއް ބޭފުޅުންވެސް ވަނީ ޕާޓީން ވަކިވެ ރައީސް އިބްރާހީމް މުޙައްމަދު ޞާލިޙާށް ތާޢީދުކުރެއްވުމުގައި ދެމިހުންނަވާކަން ހާމަކުރައްވާފައެވެ.
މަޢުލޫމާތު ލިބިފައިވާގޮތުގައި ޖޭޕީގެ ސްލޮޓްތަކުގައި ތިއްބެވި ބައެއް ވަޒީރުންވެސް ވަނީ ރައީސުލްޖުމްހޫރިއްޔާއަށް ތާޢީދުކުރެއްވުމަށް ނިންމާފައެވެ. ނަމަވެސް އަދި މިހާތަނަށް ޖޭޕީން އެއްވެސް ވަޒީރަކު ވަކިވެވަޑައިގެންފައެއް ނުވެއެވެ.
ރިޔާސީ އިންތިޚާބަށް ޖޭޕީން ކެނޑިޑޭޓެއް ނެރުމަށް ވަނީ ނިންމާފައެވެ. އަދި އެޕާޓީ އިސްވެ އޮވެ ކޯލިޝަން ހެދުމަށްވެސް ޕާޓީގެ ކައުންސިލުން ނިންމާފައިވެއެވެ. ރިޔާސީ އިންތިޚާބަށް ޖުމްހޫރީ ޕާޓީގެ ފަރާތުން ވާދަކުރާ ކެނޑިޑޭޓެއް ހޮވުމަށް ބާއްވާ ޕްރައިމަރީއަށް ހުޅުވާލުމުން ކުރިމަތިލެއްވީ ޕާޓީގެ ލީޑަރު ޤާސިމް އިބްރާހީމް އެކަންޏެވެ.
މިއަހަރުގެ ބާއްވާ ރިޔާސީ އިންތިޚާބު އޮންނަނީ ސެޕްޓެމްބަރުމަހުގެ 9 ވަނަ ދުވަހުއެވެ.