ތަޢުލީމީ ޤާނޫނުގެ ދަށުން "ސްކޫލް ދަރިވަރުންގެ ޢާއްމު ގަވާއިދު" ނެރެފިއެވެ. މި ޤަވާއިދުގެ ބޭނުމަކީ ހުރިހާ ދަރިވަރުން ޢަމަލު ކުރާނެ އެއް މިންގަނޑެއް އޮތުން ކަމަށް އެޑިއުކޭޝަން މިނިސްޓްރީން ވިދާޅުވެއެވެ.
އެޑިއުކޭޝަން މިނިސްޓްރީން ވިދާޅުވީ ސްކޫލްތަކަކީ ދަރިވަރުން ދިރިއުޅުމަށް ތައްޔާރުކޮށް، އެ ދަރިވަރުންނަކީ މުޖުތަމަޢު ޤަބޫލުކުރާ އަޚުލާގެއްގެ ވެރި ބަޔަކަށް ހެދުމުގެ ޒިންމާ ހަވާލުވެފައިވާ ތަންކަމަށެވެ. އެގޮތުން ސްކޫލްތަކުގައި ދަރިވަރުން އުޅޭއިރު ދަރިވަރުން ޢަމަލުކުރާނެ ގަވާއިދެއް އޮތުމާއި، ސްކޫލުން ބޭރުގައި ދަރިވަރުންގެ އުޅުން ބައްޓަން ކުރާނެ މިންގަނޑުތަކެއް ކަނޑައެޅިފައި އޮތުމަކީ މުހިންމުކަމެއްކަމަށެވެ.
މި ގަވާއިދަކީ ތަޢުލީމުގެ ޤާނޫނުން މިނިސްޓްރީ އޮފް އެޑިއުކޭޝަނުން ހެދުމަށް މަތިކޮށްފައިވާ ގަވާއިދެކެވެ.
"ސްކޫލް ދަރިވަރުންގެ އާއްމު ގަވާއިދު" އެޑިއުކޭޝަން މިނިސްޓްރީން މިހާރު ވަނީ އާއްމުކޮށް، އެ ގަވާއިދަށް ޢަމަލުކުރަން އަންގާފައެވެ. މި ގަވާއިދާ އެއްގޮތަށް ސްކޫލްތަކުގެ މުވައްޒަފުންނާ، ދަރިވަރުންނާ އަދި ބެލެނިވެރިންވެސް ޢަމަލުކޮށް ތަންފީޒްކުރުމަށް އެޑިއުކޭޝަނުން ވަނީ އަންގާފައެވެ.
މި ގަވާއިދުގައި ވަނީ ސްކޫލް ދަރިވަރުންގެ އަޚުލާގީ މިންގަނޑު ހުންނަންޖެހޭގެ ގޮތްތަކާއި، ސްކޫލަށް ހާޒިރުވުމާއި ދަރިވަރުންގެ ޔުނިފޯމް ކޯޑުގައި ހުންނަންޖެހޭ މިންގަނޑު ކަނޑައަޅާފައެވެ.
އަދި ސްކޫލާއި، ސްކޫލުން ބޭރު ހަރަކާތްތަކުގައި ބައިވެރިވުމުގައި ޢަމަލު ކުރާނެ ގޮތް ވަނީ ކަނޑައަޅާފައެވެ. އެގޮތުން ސްކޫލުން ބޭރުގައި ހިނގާ ފިލްމު، ތަމްސީލް، އިޝްތިހާރު ނުވަތަ މީޑިއާގައި ހިންގާ ޕްރޮގްރާމެއްގައި ބައިވެރިވެވޭނީ އެޑިއުކޭޝަން މިނިސްޓްރީގެ ހުއްދައާއެކު ކަމަށް ވަނީ ބުނެފައެވެ.
އަދި ތަޢުލީމުގެ ބޭނުމަށް ހިންގޭ ތަމްރީންތައް ފިޔަވާ، 16 އަހަރުން ދަށުގެ ކުދިން އެއްވެސް ވަޒީފާއެއް އަދާކުރުމަކީ ހުއްދަ ކަމެއް ނޫނެވެ.
މީގެއިތުރުން ސްކޫލް ދަރިވަރުން ކުރުން މަނާ ކަންތައްތައް ގަވާއިދުގައި ވަނީ ހިމަނާފައެވެ. އެގޮތުން ބެލެނިވެރިއެއްގެ ހުއްދައާއި ނުލާ ރޭގަނޑު 10:00ގެ ފަހުން ބޭރުގައި އުޅުންވެސް މަނާވާނެއެވެ.
މިނިސްޓްރީން ވިދާޅުވީ މިޤަވާއިދާ ޚިލާފުވާ ދަރިވަރުންނާ މެދު "ބިހޭވިއަރ މެނޭޖްމަންޓް ޕޮލިސީ"އާއި އެއްގޮތަށް ޢަމަލު ކުރަމުންދާނެ ކަމަށެވެ.
މިގަވާއިދު މިނިސްޓްރީން މިހާރު ވަނީ އާއްމުކޮށް، ޢަމަލުކުރަން ފަށާފައެވެ.