ރިހެބިލިޓޭޝަން ފްރޭމްވަރކްގައި ބައިވެރިވެފައިވާ ޤައިދީންނަށް، މޯލްޑިވްސް ކަރެކްޝަނަލް ސަރވިސް (އެމްސީއެސް) އިން ރަމަޟާން މަހަށް ޚާއްސަކޮށް ޤުރުއާން މުބާރާތެއް ފަށައިފިއެވެ. މި ޤުރުއާން މުބާރާތް ފަށާފައިވަނީ މާފުށީ ޖަލުގައެވެ.
މި މުބާރާތް އިފްތިތާހްކޮށްދެއްވީ މާފުށީ ޖަލުގެ ޑައިރެކްޓަރ އޭއެސްޕީ އަޙްމަދު ޖާދުﷲއެވެ. މީގެ އިތުރުން މާފުށީ ޖަލުގެ ސީނިއަރ މެނޭޖްމަންޓް މި ރަސްމިއްޔާތުގައި ބައިވެރިވިއެވެ.
މި މުބާރާތްކުރިއަށްދާނީ 3 އޭޕްރިލްގެ ނިޔަލަށެވެ. މި މުބާރާތުގައި 14 ފިރިހެން ޤައިދީންނާއި 13 އަންހެން ޤައިދީން ބައިވެރިވެފައިވެއެވެ. މިއީ މިފަދަ ފުރަތަމަ މުބާރާތެވެ.
މި މުބާރާތުގައި ބަލައިގެން ކިޔުމުން އަންހެން ފިރިހެންނުންގެ ތެރެއިން ވަކިން އެންމެ މޮޅު ތިން ވަނަ ހޮވައި، ދެ ބައި އެއްކޮށްލާ އެންމެ މޮޅު ދިހަ ބައިވެރިން ހޮވާނެއެވެ. އަދި އޭގެ ތެރެއިން މުޅި މުބާރާތުގެ އެންމެ މޮޅު ތިން ކިއުންތެރިން ހޮވާނެއެވެ.
ޤައިދީންނަށް އަމާޒުކޮށްގެން މިފަދަ ހަރަކާތްތައް ހިންގުމަކީ އެ ފަރާތްތަކުގެ ހިތުގައި ކީރީތި ޤުރްއާނަށް ލޯބި އިތުރުވެ، އިސްލާމީ އަގީދާ ހަރުދަނާވުމުގެ އިތުރުން ރިހެބިލިޓޭޝަނަށް ލިބޭ ބޮޑު ހިތްވަރެއްކަމަށް ކަރެކްޝަނުން ވަނީ ބުނެފައެވެ.