ކުރިއަށް އޮތް ރިޔާސީ އިންތިޚާބަށް ޖުމްހޫރީ ޕާޓީގެ ފަރާތުން ވާދަކުރާ ކެނޑިޑޭޓެއް ހޮވުމަށް ބާއްވާ ޕްރައިމަރީއަށް ކުރިމަތިލެއްވީ އެޕާޓީގެ ލީޑަރު ޤާސިމް އިބްރާހީމް ކަމަށް ޖުމްހޫރީ ޕާޓީން ބުނެފިއެވެ.
ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީން ވާދަކުރަން ނިންމާ، ޕްރައިމަރީގައި ވާދަކުރަން ބޭނުންވާ ފަރާތްތަކަށް ފޯމް ހުށައެޅުމަށް ފުރުޞަތު ހުޅުވާލީ މިމަހުގެ 16 ވަނަ ދުވަހުއެވެ. އަދި އެމުއްދަތު މިއަދު މެންދުރު 12:00އަށް ވަނީ ހަމަވެފައެވެ.
ޖުމްހޫރީ ޕާޓީގެ އަސާސީ ޤަވާއިދު ކުރިން އޮތްގޮތުން އެޕާޓީގެ ރިޔާސީ ކެނޑިޑޭޓަކީ ޕާޓީގެ ލީޑަރެވެ. ޖޭޕީ އުފެދުނީއްސުރެ އެޕާޓީގެ ލީޑަރުކަމުގެ މަޤާމުގައި ހުންނަވަނީ ޤާސިމް އިބްރާހީމެވެ. ނަމަވެސް ދާދި ފަހުން ޖޭޕީން ވަނީ ރިޔާސީ އިންތިޚާބުގައި ވާދަކުރަން ބޭނުންވާ ހުރިހާ ފަރާތްތަކަށްވެސް ވާދަކުރުމުގެ ފުރުޞަތު ދެވޭގޮތަށް އަސާސީ ޤަވާއިދު އިޞްލާހުކޮށްފައެވެ.
ޖުމްހޫރީ ޕާޓީން ވަނީ ރިޔާސީ އިންތިޚާބުގެ ފުރަތަމަ ބުރުގައި ޖުމްހޫރީ ޕާޓީގެ ރިޔާސީ ކެނޑިޑޭޓެއް ވާދަކުރުމަށް ނުވަތަ ޖުމްހޫރީ ޕާޓީ އިސްވެ އުފައްދާ ކޯލިޝަނަކުން ރިޔާސީ އިންތިޚާބުގައި ވާދަކުރުމަށް ނިންމާ ކޮންގްރެސްގައި ޤަރާރެއް ފާސްކޮށްފައެވެ. ނަމަވެސް މިހާތަނަށް ކޯލިޝަން ހަދަން ނިންމާފައިވާކަން އެޕާޓީން ހާމަކޮށްފައެއް ނުވެއެވެ.
ޖޭޕީން ވަނީ 2008 އަދި 2013ގެ ރިޔާސީ އިންތިޚާބުގައިވެސް ވާދަކޮށްފައެވެ. އެ ދެއިންތިޚާބުގައި ވާދަކުރިއިރުވެސް ޕްރައިމަރީއެއް ބާއްވާފައެއް ނުވެއެވެ.
މިއަހަރުގެ ބާއްވާ ރިޔާސީ އިންތިޚާބު އޮންނަނީ ސެޕްޓެމްބަރުމަހުގެ 9 ވަނަ ދުވަހުއެވެ.