ރައީސުލްޖުމްހޫރިއްޔާގެ އޮފީހުގެ މިނިސްޓަރުކަމުގެ މަޤާމުގައި ހުންނެވި މުޙައްމަދު ޝިފާޒް އެ މަޤާމުން ވަކިކުރައްވައިފިއެވެ.
މިނިސްޓަރުކަމުގެ މަޤާމުން ޝިފާޒް މިއަދު ވަކިކުރައްވާފައިވާކަން ރައީސުލްޖުމްހޫރިއްޔާގެ އޮފީހުން ވަނީ ކަށަވަރުކޮށްދެއްވާފައެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވެރިކަމަށް ވަޑައިގަތުމަށްފަހު އެންމެ ފުރަތަމަ ސިޔާސީ މަޤާމަކަށް އައްޔަންކުރެއްވި އެއް ބޭފުޅަކީ ޝިފާޒެވެ. ރައީސުލްޖުމްހޫރިއްޔާގެ އޮފީހުގެ މިނިސްޓަރުކަމުގެ މަޤާމަށް ޝިފާޒް އައްޔަންކުރައްވާފައި ވަނީ 2018 ވަނަ އަހަރުގެ ނޮވެމްބަރު 22 ވަނަ ދުވަހުއެވެ.
މިދިޔަ ޖެނުއަރީ މަހު ބޭއްވި އެމްޑީޕީގެ ރިޔާސީ ޕްރައިމެރީއަށްފަހު ޕާޓީގެ ތެރޭގައި ހިޔާލު ތަފާތުވުންތައް ވަނީ އުފެދިފައެވެ. އެމްޑީޕީގެ ރައީސް މުހައްމަދު ނަޝީދާއި ވާދަކުރައްވާ ރިޔާސީ ޕްރައިމެރީ ބޮޑު ތަފާތަކުން ކާމިޔާބު ކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހެވެ.
އެމްޑީޕީގެ ރިޔާސީ ކެނޑިޑޭޓަށް ތާއިދުނުކޮށް ހިންގާ ހަރަކާތުގައި އެންމެ އިސްކޮށް މަސައްކަތް ކުރައްވާ އެއް ބޭފުޅަކީ ޝިފާޒެވެ. ރައީސް އޮފީހުގެ މަޤާމެއްގައި ހުންނަވައިގެން އެޕާޓީގެ އުސޫލްތަކާއި ހިލާފަށް މަސައްކަތް ކުރައްވަމުން ގެންދަވާތީ އެމްޑީޕީގެ އާއްމު މެމްބަރުންގެ ގިނަ ބައެއްގެ ފާޑުކިޔުންތައް ޝިފާޒަށް ވަނީ އަމާޒުވެފައެވެ.