މިއަހަރުގެ ރަމަޟާންމަހުގެ އިޙްޔާ ފޯރަމްތައް ފަށައިފިއެވެ.
މި ޕްރޮގްރާމަކީ އާއްމުންގެ ދީނީ ހޭލުންތެރިކަން އިތުރުކޮށް، ހެޔޮލަފާ މުޖުތަމަޢުއެއް ބިނާކުރުމަށް ކޮންމެ އަހަރަކުވެސް ސިލްސިލާކޮށް ބާއްވަމުން އަންނަ ފޯރަމެކެވެ.
ފުރަތަމަ ފޯރަމް ބާއްވާފައިވަނީ މާލޭގައި، އިސްލާމީ މަރުކަޒުގެ ޖަލްސާކުރާ މާލަމުގައިއެވެ. މައުޟޫއަކީ "ހެޔޮ ބަދަލަކަށް ރަމަޟާން" މި މައުޟޫއެވެ. މި މައުޟޫއަށް ވާހަކަފުޅުދައްކަވާފައި ވަނީ މިނިސްޓަރ އޮފް އިސްލާމިކް އެފެއަރސް ޑރ.އަޙްމަދު ޒާހިރު އަލީ އަދި އައްޝައިޙް ޙަސަން ލަތީފު މޫސާއެވެ.
ފޯރަމްގައި ވާހަކަދައްކަވަމުން މިނިސްޓަރ އޮފް އިސްލާމިކް ޑރ.އަހުމަދު ޒާހިރު އަލީ ވިދާޅުވީ ރޯދައިގެ އަޅުކަން ހާސިލުވާނީ އެމީހުންގެ އަޙުލާގާއި އެމީހެއްގެ އުޅުން ހުންނަގޮތުންކަމަށެވެ. ކީރިތި ޤުރުއާން ކިޔެވުމާއެކު ޤުރުއާން މުރާޖާ ކުރަންޖެހޭކަން ފާހަގަކުރައްވާ މިނިސްޓަރ ވިދާޅުވީ، އަޙުލާގު ބައްޓަންވާންވާނީ ކީރިތި ޤުރުއާނުން ބުނެދޭގޮތަށްކަމަށެވެ. އަދި ރޯދައަށް ހުންނައިރު ބަސް މަދުކުރުމާއި، ދޮގު ވާހަކަތައް ނުދެއްކުމާއި، އަދި ދޭތެރެ ޖައްސާ މީހަކަށް ނުވުމަށް ވަނީ ނަސޭހަތްތެރިވެފައެވެ.
"ގޯސްވަހަކާއާއި ދޮގު ވާހަކަ ދެއްކުމުން އެއްކިބާ ނުވާނަމަ، ﷲ ސުބްޙާނަހޫ ވަތަޢާލާ އެދިވޮޑިގެންނުވޭ އެމީހެއް ނުކައި ނުބޮއެ ހުރުން. އެމީހެއްގެ އުޅުން އިސްލާހުވާންވީ" މިނިސްޓަރ ވިދާޅުވިއެވެ.
މިއަހަރު ޖުމްލަ 17 އިޙްޔާ ފޯރަމް ބޭއްވުމަށް ހަމަޖެހިފައިވާއިރު މާލޭގައި 9 ޕްރޮގްރާމް އަދި އަތޮޅުތަކުގައި 8 ޕްރޮގްރާމް ކުރިއަށް ގެންދާނެއެވެ. އަތޮޅުތަކުގައި އިޙްޔާ ފޯރަމް ބާއްވަން ފަށާފައިވަނީ މިދިޔަ އަހަރުން ފެށިގެންނެވެ.
މާލޭގައި އިޙްޔާ ފޯރަމް އޮންނާނީ އެހެން އަހަރުތަކެކޭވެސް އެއްގޮތަށް ކޮންމެ އާދިއްތަ އަދި ބުރާސްފަތި ދުވަހެއްގެ ރޭ 21:30ގައި އިސްލާމީ މަރުކަޒުގެ ހޯލްގައެވެ. އަދި އަތޮޅުތަކުގައި ހުކުރު އަދި ހޮނިހިރު ދުވަހުރޭ ރޭގަނޑު 21:30ގައެވެ.
މި ޕްރޮގްރާމްގައި ގުރުއަތުން ހޮވޭ ފަރާތްތަކަށް ދީނީ ފޮތް ހަދިޔާކުރުން ކުރިއަށްގެންދެއެވެ.