އެމްއެމްޕީއާރުސީ މައްސަލަ: ނިންމި 25 މައްސަލައިގައި 278 މިލިޔަން ރުފިޔާ ދައުލަތަށް ލިބެންޖެހޭ
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) މެދުވެރިކޮށް ހިންގި ކޮރަޕްޝަނާއި ގުޅިގެން އޭސީސީން މިހާތަނަށް ތަހުގީގްކޮށް ނިންމި 25 މައްސަލައިގައި ދައުލަތަށް 278 މިލިޔަން ރުފިޔާ ލިބެންޖެހޭ ކަމަށް އޭސީސީން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން، އެންޓި-ކޮރަޕްޝަން ކޮމިޝަންގެ ބޭފުޅުންނާއެކު ބޭއްވި ބައްދަލުވުމުގައި ކޮމިޝަންގެ ރައީސް އާދަމް ޝާމިލް ވިދާޅުވީ އެބޭފުޅުން ކޮމިޝަނާއި ހަވާލުވިފަހުން އެމްއެމްޕީއާރުސީގެ ކޮރަޕްޝަނާއި ގުޅުން އޮތް 13 މައްސަލައެއް ބަލައި ނިންމާފައިވާކަމަށެވެ. އަދި މިހާރު ކޮމިޝަންގެ އެންމެ ފަހު މަރުހަލާގައި 12 މައްސަލައެއް އޮތް ކަމަށެވެ. މިމައްސަލަތަކާއެކު މިހާތަނަށް 25 މައްސަލައެއް ނިމިފައިވާ ކަމަށް ޝާމިލް ވިދާޅުވިއެވެ.
މީގެ ތެރެއިން ބައެއް މައްސަލަތަކުގައި ދައުވާ ކުރަން ފޮނުވާފައިވާއިރު، ބައެއް މައްސަލަތަކަކީ ދައުލަތަށް އަނބުރާ ލިބެންޖެހޭ ފައިސާ ހޯދަންޖެހޭ މައްސަލަތަކެއް ކަމަށްވުމުން، ފައިސާ ހޯދުމަށްވެސް ބައެއް މައްސަލަތަކުގައި އެދިފައިވާނެކަމަށެވެ. މިމައްސަލަތަކުގެ ތެރެއިން ދައުވާ ކުރުމުގެ ކުރިން ކުރިއަށް ގެންދާ ޑިއުޓީ މަރުހަލާގައި 8 މައްސަލައެއްގައި މަޝްވަރާ ކުރެވެމުންދާކަމަށެވެ.
މިހާތަނަށް ތަހުގީގް ނިމުނު މައްސަލަ ތަކުގައި 16.1 މިލިޔަން ޑޮލަރާއި، 38.2 މިލިޔަން ރުފިޔާ ދައުލަތަށް އަނބުރާ ލިބެންޖެހޭ ކަމަށް އޭސީސީގެ ރައީސް ވިދާޅުވިއެވެ. މިފައިސާތަކާއިއެކު މިހާތަނަށް ތަހުގީގު ނިންމި 25 މައްސަލާގައި ޖުމްލަ 278 މިލިޔަން ރުފިޔާ ލިބެންޖެހޭކަމަށްވެސް ޝާމިލް ވިދާޅުވިއެވެ.
އެމްއެމްޕީއާރުސީގެ މައްސަލައަކީ އޭސީސީން އެންމެ އިސްކަންދީގެން ބަލަމުންދާ މައްސަލައަށްވާއިރު މިހާރުވެސް ކޮމިޝަނުން މިމައްސަލައާއި ގުޅުންހުރި 56 މައްސަލައެއްގެ ބަލަމުންދާ ކަމަށް ކޮމިޝަނުން ވިދާޅުވިއެވެ. މިހާތަނަށް ނިންމުނު މައްސަލަތަކުގައި ބައެއް މީހުންނަށް ދައުވާ ކުރުމަށް ފޮނުވާފައިވާއިރު ދައުލަތަށް ލިބެންޖެހޭ ފައިސާވެސް އަނބުރާ ހޯދުމަށް ބައެއް އިދާރާތަކުގައި އޭސީސީން ވަނީ އެދިފައެވެ.
އެމްއެމްޕީއާރުސީއާއި ގުޅުންހުރި ފައިސާތަކުގެ ތެރެއިން ދައުލަތަށް ލިބެންޖެހޭ ފައިސާ ހޯދުމަށް އެދުނު ފައިސާތައް ހޯދުމަށް އިދާރާތަކުން އެކަށީގެންވާ މަސައްކަތްތައް ނުކުރާނަމަ އެއިދާރާތަކާއިމެދު ފިޔަވަޅު އެޅުމަށް ކުރަންޖެހޭ މަސައްކަތްތަކެއްވެސް ކުރަމުންދާކަމަށް އޭސީސީގެ ރައީސް ވިދާޅުވިއެވެ.
އެމްއެމްޕީއާރުސީގެ ޚިޔާނާތަކީ ރާއްޖޭގެ ތާރީޚުގައި ހިނގި އެންމެ ބޮޑު އެއް ޚިޔާނާތަށްވާއިރު، އެމައްސަލައިގެ މީގެކުރިން ބައެއް ފަރާތްތަކަށް ވަނީ އަދަބު އައިސްފައެވެ. އޭގެތެރޭގައި ކުރީގެ ރައީސް އަބްދުﷲ ޔާމީންއާއި، ކުރީގެ ނާއިބު ރައީސް އަހުމަދު އަދީބުގެ އިތުރުން، އެމްއެމްޕީއާރުސީގެ އޭރުގެ މެނޭޖިންގ ޑިރެކްޓަރ ޢަބްދުﷲ ޒިޔަތު ހިމެނެއެވެ.
އެމްއެމްޕީއާރުސީގެ ޚިޔާނާތުގެ ފައިސާތައް ބޭނުންކޮށްފައި ވަނީ ސިޔާސީ މަންފާތަކެއް ހޯދުމަށްކަމަށް އެސެޓް ރިކަވަރީ ކޮމިޝަނުން ވަނީ ބުނެފައެވެ. މިހާތަނަށް ކުރެވުނު ތަހުޤީގުތަކުން އެނގޭ ގޮތުގައި އެމްއެމްޕީއާރުސީގެ ޚިޔާނާތް 3.4 ބިލިޔަން ރުފިޔާއަށް އަރައެވެ. އޭސީސީން މަސައްކަތް ކުރަމުންދަނީ ގެއްލިފައިވާ ނުވަތަ ވަގަށް ނަގާފައިވާ ފައިސަތައް އަބުރާ ދައުލަތަށް ހޯދުމަށެވެ.