ފެނުމުން މަހްރޫމްވެފައިވާ މީހުންނަށް އަމިއްލައަށް ވޯޓުލެވޭގޮތަށް ޤާނޫނަށް އިސްލާހު ހުށަހަޅައިފި
އިންތިހާބުތަކުގައި ވޯޓްލާއިރު ލޮލަށް ނުފެންނަ މީހުންނަށް އެމީހަކު އަމިއްލައަށް ވޯޓުލާން ބޭނުންވާނަމަ އެކަން މަގުފަހިކުރުމަށް އިންތިޚާބުތަކާއި ބެހޭ އާންމު ޤާނޫނަށް އިސްލާހު ހުށަހަޅައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވީ އިންތިޚާބުތަކުގައި ވޯޓުލާ ފަރާތްތަކުގެ ތެރެއިން ފެނުމުން މަހްރޫމްވެފައިވާ މީހުންނަށް އެހެން މީހެއްގެ އެހީތެރިކަމާއި ނުލާ ވޯޓު ކަރުދާހުގައި އަމިއްލައަށް ފާހަގަޖެހުމުގެ ފުރުސަތު ހަމަޖައްސުމަށް ޤާނޫނަށް އިސްލާހު ހުށަހަޅާފައިވާކަމަށެވެ.
ޤާނޫނަށް މިއިސްލާހު ހުށަހަޅުމުގެ އެންމެ ބޮޑު ބޭނުމަކީ ފެނުމުން މަހްރޫމްވެފައިވާ މީހުންނަށް ވޯޓުގެ ސިއްރުކަން ކަށަވަރު ކުރެވޭނެ އުސޫލެއް ހަމަޖައްސައި ދިނުމެވެ. ސަރުކާރުގެ ފަރާތުން ޤާނޫނަށް މިއިސްލާހު ހުށަހަޅާފައިވާއިރު، ފެނުމުން މަހްރޫމްވެފައިވާ މީހުންނަށް އަމިއްލައަށް ވޯޓު ލުމުގެ ހައްގު ހޯދުމަށްޓަކައި ކަމާއި ގުޅުންހުރި އިދާރާތަކާއިވެސް ވަނީ ބައްދަލުކޮށްފައެވެ.
މިބިލުން ގެންނަ އިސްލާހަށް ބަލާއިރު ވޯޓު ކަރުދާހުގައި އަމިއްލައަށް ފާހަގަ ޖެހުމަށް ޖިސްމާނީ ގޮތުން ނުކުޅެދޭ މީހުންގެ ތެރެއިން ފެނުމުން މަހްރޫމްވެފައިވާ މީހުންނަށް، އެހެން މީހެއްގެ އެހީތެރިކަމާއި ނުލައި ވޯޓު ކަރުދާހުގައި އަމިއްލައަށް ފާހަގަ ޖަހަން އެދޭނަމަ އެފުރުސަތު ދެވިގެންދާނެއެވެ. އެގޮތުން އެފަދަ މީހުންގެ ވޯޓުގެ ސިއްރުކަން ކަށަވަރު ކުރުމަށްޓަކައި، އެތެރެ ފެންނަ ޕްލާސްޓިކް ކާޑެއް ބޭނުންކޮށްގެން ވޯޓު ކަރުދާހުގައި ފާހަގަ ޖެހިދާނެކަމަށް ބިލުގައި ބަޔާންކޮށްފައިވެއެވެ.
އިންތިޚާބުތަކާއި ބެހޭ އާންމު ޤާނޫނަށް މި އިސްލާހު ހުށަހަޅާފައިވާއިރު، މަޖިލީހުގައި މިހާރުވެސް މިބިލަށް ހުށަހެޅުނު އެހެން އިސްލާހުތަކެއްގެ މަސައްކަތް ކުރިއަށްދާކަން ފާހަގަކޮށްލެވެއެވެ.