ބާރުގަދަ ތޫފާން ފްރެޑީގެ ސަބަބުން އެފްރިކާ ބައްރުގެ އިރުދެކުނުގައިވާ މަލާވީއަށް ބޯކޮށް ވާރޭވެހި، ފެންބޮޑުވުމާ ގުޅިގެން 11 މީހުން މަރުވެއްޖެއެވެ. މި ތޫފާނުގެ ސަބަބުން މަލާވީގެ ބައެއް ސަރަޙައްދުތަކުގައި ބިންގަނޑު ކަނޑައިގެން ގޮސް، ކިސަޑު ފައިބާފައިވެއެވެ. ފްރެޑީއަކީ އިންޑިޔާ ކަނޑުގެ ސަރަޙައްދުގައި މިހާތަނަށް އުފެދުނު އެންމެ ގިނަ ދުވަހަށް ދެމިގެންދިޔަ އެއް ތޫފާން ކަމުގައި ދުނިޔޭގެ މޫސުމާބެހޭ މައި އިދާރާއިން ބުނެއެވެ.
މި ތޫފާނުގެ އަސަރު އެންމެ ބޮޑަށް ކޮށްފައި ވަނީ މަލާވީގެ ދެވަނައަށް އެންމެ ބޮޑު ރަށް ބްލަންޓަޔަރއަށެވެ. މި ތޫފާނާ ގުޅިގެން ކުރިމަތިވި ހާދިސާތަކުގައި 16 މީހަކު ގެއްލިފައިވާ ކަމަށާއި، އެ މީހުން ހޯދުމަށް މަސައްކަތް ކުރަމުންދާ ކަމުގައި މަލާވީގެ ފުލުހުން ބުނެއެވެ. މި ތޫފާނާ ގުޅިގެން ބޯކޮށް ވާރޭވެހި ބްލަންޓަޔަރގެ 10 ޑިސްޓްރިކްޓެއްގައި ފެންބޮޑުވެފައިވާ ކަމުގައި އޮފިޝަލުން ވިދާޅުވެއެވެ. ބައެއް ރަށްތަކުން ކަރަންޓުގެ ޚިދުމަތް ވެސް ވަނީ މެދުކެނޑިފައެވެ.
މަލާވީއަށް އެރުމުގެ ކުރިން، މާރިޗު 12 ވަނަ ދުވަހު ފްރެޑީ ވަނީ މޮޒަމްބީކްގެ ސަރަޙައްދުތަކަށް ވެސް އަރާފައެވެ. މިއީ، މި ތޫފާން އެ ޤައުމުގެ ސަރަޙައްދުތަކަށް އެރި ދެވަނަ ފަހަރެވެ. މޮޒަމްބީކުގެ ކެލަމާނާއަށް ތޫފާން އެރުމުގެ ސަބަބުން ޢިމާރާތެއް ވެއްޓި، އެކަކު މަރުވެފައިވާ ކަމުގައި އެ ޤައުމުގެ އޮފިޝަލުން ވިދާޅުވިއެވެ. މިއާއެކު، ފްރެޑީއާ ގުޅިގެން ހިނގި އެކި ހާދިސާގައި މޮޒަމްބީކާއި މަޑަގަސްކަރައިގައި މަރުވި މީހުންގެ ޢަދަދު މި ވަނީ 28 އަށް އަރާފައެވެ.
މި ތޫފާނާ ގުޅިގެން މޮޒަމްބީކުގައި ދެކުނުގެ ސަރަޙައްދުތަކުގައި 171,000 އަށްވުރެ ގިނަ މީހުންނަށް ވަނީ ގެއްލުން ލިބިފައެވެ. މި ތޫފާނުގެ ނުރައްކާ ބައި މިލިޔަނެއްހާ މީހުންނަށް ކުރާނެ ކަމަށް ބެލެވޭ ކަމުގައި އ.ދ.ގެ އިންސާނީ އެހީއާ ބެހޭ އިދާރާ (އޯ.ސީ.އެޗް.އޭ) އިން ބުނެއެވެ. މި ތޫފާނާ ގުޅިގެން މޮޒަމްބީކުގެ 650 ގެ ވަނީ ހަލާކުވެފައެވެ. އަދި، ފެންބޮޑުވުމާ ގުޅިގެން 3,000 އަށްވުރެ ގިނަ މީހުން ވަނީ ހާލުގައި ޖެހިފައެވެ. އަދި، ގިނަ ސަރަޙައްދުތަކުން ވަނީ ކަރަންޓުގެ ޚިދުމަތް މެދުކެނޑިފައެވެ.
ތޫފާން ފްރެޑީ އުފެދިފައި ވަނީ ފެބުރުވަރީ 6 ވަނަ ދުވަހު އިންޑޮނީޝިޔާ ކައިރިންނެވެ. އަދި، އެއަށްފަހު އިންޑިޔާ ކަނޑު ހުރަސްކޮށް އެ ތޫފާން މި ވަނީ އެފްރިކާ ބައްރާ ހަމައަށް ދަތުރުކޮށްފައެވެ. މި ތޫފާނުގެ އުމުރު ދިގުވެފައި ވަނީ މޫސުމީ ބަދަލުތަކާ ގުޅިގެން ކަމަށް ބެލެވޭ ކަމުގައި މޫސުން ދިރާސާކުރާ ފަރާތްތަކުން ބުނެއެވެ. މޫސުމީ ބަދަލުތަކާ ގުޅިގެން މި ފަދަ ތޫފާންތަކުގެ ބާރާއި ނުރައްކާތެރިކަން ވެސް އިތުރުވަމުންދާ ކަމުގައި އެ ފަރާތްތަކުން ބުނެއެވެ.