ބިދޭސީންގެ ކޯޓާ ފީ ދެއްކުމަށް ފަސޭހަ އިންތިޒާމްތަކެއް އިކޮނޮމިކް މިނިސްޓްރީން ހަމަޖައްސަދީިފިއެވެ. މި ފީ އިކޮނޮމިކް މިނިސްޓްރީން ބަލައިގަންނަމުން ދަނީ އެކްސްޕެޓް ސިސްޓަމް މެދުވެރިކޮށެވެ.
އެކްސްޕެޓް ސިސްޓަމަކީ ދިވެހިރާއްޖޭގައި ވަޒީފާ އަދާކުރާ ބިދޭސީންނަށް ބޭނުންވާ ހުއްދަ ދޫކުރުމާއި، އެ ބިދޭސީންގެ ކަންކަން ހަރުދަނާގޮތެއްގައި ބެލެހެއްޓުމަށް އިކޮނޮމިކް މިނިސްޓްރީން އެކުލަވާލާފައިވާ ނިޒާމެކެވެ.
ޚިދުމަތް ހޯދާ ފަރާތްތަކަށް ލުއިފަސޭހަ ގޮތްތައް ހަމަޖައްސައިދިނުމަށް ސިސްޓަމަށް އިތުރު ބަދަލުތައް ގެނައުމުގެ ގޮތުން އެކްސްޕެޓް ސިސްޓަމުން ދެމުންގެންދިޔަ ބައެއް ޚިދުމަތްތައް 26 ފެބްރުއަރީ އިން 11 މާރިޗު ގެ ނިޔަލަށް ވަގުތީ ގޮތުން ވަނީ މެދުކަނޑާލާފައެވެ. ނަމަވެސް މިމަހުގެ 12 ވަނަ ދުވަހު އަލުން މި ޚިދުމަތްތައް ސިސްޓަމް މެދުވެރިކޮށް ހުޅުވާލާނެކަމަށް މިނިސްޓްރީން ބުނެއެވެ.
ސިސްޓަމް ހުޅުވާލެވޭއިރު، ދިވެހިރާއްޖެއަށް ވަޒީފާއަދާ ކުރުމަށް ގެންނަ ބިދޭސީންނަށް ދައްކަންޖެހޭ ކަމަށް، ވަޒީފާއާ ބެހޭ ޤާނޫނު ގައި ބަޔާންކޮށްފައިވާ ކޯޓާ ފީ، ވަޒީފާދޭ ފަރާތްތަކަށް އެކްސްޕެޓް ސިސްޓަމް މެދުވެރިކޮށް ދެއްކޭނެ ނިޒާމު ހަމަޖެހިގެންދާނެއެވެ. ކޯޓާ ފީ އަކީ، ވަޒީފާ ދޭ ފަރާތުން "ޔުޓިލައިޒް" ކުރާ ކޮންމެ ކޯޓާ އަކަށް 1 އަހަރުގެ މުއްދަތަށް 2000 ރުފިޔާއެވެ.
ވަޒީފާދޭ ފަރާތްތަކަށް ލުއިފަސޭހަވާނެ ގޮތެއްގެ މަތިން ކޯޓާ ފީ ދެއްކުމުގެ ކަންތައްތައް ހަމަޖައްސައި ދިނުމަށްޓަކައި، ކޯޓާ ފީ 1 އަހަރުގެ މުއްދަތަކަށް ބަހާލައިގެން ޝެޑިއުލް ޕޭމަންޓެއްގެ ގޮތުގައި ދެއްކުމުގެ އިޚްތިޔާރު ސިސްޓަމް ތެރެއިން ވަޒީފާ ދޭ ފަރާތަށް ލިބޭނޭ އިންތިޒާމް ހަމަޖައްސައިދެވިފައިވާނެ ކަމަށް އިކޮނޮމިކް މިނިސްޓްރީން ބުނެއެވެ.
އެކްސްޕެޓް ސިސްޓަމަށް ގެނެވޭ ބަދަލުތަކުގެ މައުލޫމާތުގެ ތަފްސީލް ސިސްޓަމްގެ ހޯމްޕޭޖުން ފެންނަން ހުންނާނެއެވެ. އަދި އިތުރު މަޢުލޫމާތެއް ސާފުކުރަން ބޭނުންވާނަމަ އެ މިނިސްޓްރީގެ ހޮޓްލައިން 1500 އަށް ގުޅުމުން މައުލޫމާތު ލިބޭނެކަމަށް އިކޮނޮމިކް މިނިސްޓްރީން ބުނެއެވެ.