ރައްޔިތުންގެ މަޖިލީހުގެ ހުސްވެފައިވާ ގުރައިދޫ ދާއިރާއަށް ޕީޕީއެމްގެ ޓިކެޓު، އަވަހާރަވެފައިވާ އެދާއިރާގެ ކުރީގެ މެންބަރު އިބްރާހީމް ރިޒާގެ ކޮއްކޮ، ޙުސައިން ރިޒާއަށް ދީފިއެވެ.
ގުރައިދޫ ދާއިރާގެ މެންބަރުކަމުގައި 3 ދައުރުގައި ހުންނެވި އިބްރާހީމް ރިޒާ އަވަހާރަވީ ކެންސަރުގެ އާލާސްކަންފުޅެއްގައި މިދިޔަ މަހުގެ 23 ވަނަ ދުވަހުއެވެ. ރިޒާ އަވަހާރަވުމާއި ގުޅިގެން ގުރައިދޫ ދާއިރާގެ ބައި-އިލެކްޝަން އަންނަ އޭޕްރީލް މަހުގެ 15ގައި ބާއްވަން އިލެކްޝަންސް ކޮމިޝަނުން ވަނީ ނިންމާފައެވެ. އަދި އިންތިޚާބުގައި ވާދަކުރުމުގެ ފުރުޞަތު މިމަހުގެ 13އާއި ހަމައަށް ވަނީ ހުޅުވާލާފައެވެ.
ޕީޕީއެމުން ބުނީ އެޕާޓީގެ ޓިކެޓުގައި ގުރައިދޫ ދާއިރާގެ ބައި-އިލެކްޝަން ޕްރައިމަރީއަށް ހުޅުވާލުމުން ކުރިމަތިލެއްވީ އެންމެ މީހެއްކަމަށެވެ. އެއީ އަވަހާރަވެފައިވާ އިބްރާހީމް ރިޒާގެ ކޮއްކޮ ޙުސައިން ރިޒާއެވެ. ޙުސައިން ރިޔާޒަކީ މިހާތަނަށް ޕީޕީއެމްގެ އާންމު މެންބަރެއްގެ ގޮތުގައި ހުންނެވި މީހެއްކަމަށް ޕީޕީއެމުން ބުންޏެވެ.
ގުރައިދޫ ދާއިރާގެ ބައި-އިލެކްޝަނަށް ޕީޕީއެމްގެ އިތުރުން ވާދަކުރަނީ އެމްޑީޕީންނާއި އެމްއެންޕީންނެވެ.
މިއީ 19ވަނަ ރައްޔިތުންގެ މަޖިލީހުގެ ބައި-އިލެކްޝަނެއް ބާއްވާ ދެވަނަ ފަހަރެވެ. ފުރަތަމަ ބައި-އިލެކްޝަން ބާއްވާފައިވަނީ ކޮމަންޑޫ ދާއިރާގެ މެންބަރު ޙުސައިން ވަޙީދު އަވަހާރަވުމުންނެވެ.