ތޮޔޮ ބޯޓެއްގައި އެކުގައި މަސައްކަތްކުރި ބިދޭސީ މީހާ މަރާލިކަމުގެ ތުހުމަތުގައި ދަޢުވާއުފުލާފައިވާ ގދ. ތިނަދޫ، މަނާރު، މުޙައްމަދު ނިޒާމް ބަންދަށް އިތުރު 30 ދުވަސް ޖަހައިފިއެވެ.
މިދިޔަ ޑިސެމްބަރު މަހުގެ 28 ވަނަ ދުވަހުގެ ވަގުތެއްގައި ފިއުލް ޕަވަރ ކުންފުނީގެ "ހެދޭކުރި" ދޯނީގައި މަސައްކަތްކުރާ ބަނގަލަދޭޝް ރައްޔިތެއްކަމަށްވާ މުހައްމަދު ލިޓޮން މަރާލިކަމުގެ ދައުވާ އުފުލާފައިވާ ނިޒާމްގެ ބަންދަށް 30 ދުވަސް ޖަހާފައި މިވަނީ އޭނާގެ ބަންދަށް މީގެ ކުރިން ޖެހި 60 ދުވަސް ހަމަވުމުންނެވެ.
ލިޓޮން މަރާލިކަމުގެ ދަޢުވާ ނިޒާމްގެ މައްޗަށް އުފުލާފައިވަނީ މިދިޔަ ބުރާސްފަތި ދުވަހުއެވެ. އޭނާގެ މައްޗަށް 3 ދަޢުވާއެއް ވަނީއުފުލާފައެވެ. އެއީ ޤަޞްދުގައި މީހަކުމެރުމުގެ ކުށުގެ ދަޢުވާއާއި، ވައްކަންކުރުމުގެ ކުށުގެ ދަޢުވާއާއި، ޑައިމޯފިނުން މުޢާމަލާތުކުރުމުގެ ކުށުގެ ދަޢުވާއެވެ.
މި ދައުވާތައް ސާބިތުވެއްޖެނަމަ 26 އަހަރަށްވުރެ ދިގު މުއްދަތެއްގެ ޖަލު ޙުކުމެއް އޭނާގެ މައްޗަށް އަންނާނެއެވެ. އަދި ފަންސަވީސްހާސް ރުފިޔާއިން ފެށިގެން ފަސްލައްކަ ރުފިޔާއާ ދެމެދުގެ ޖޫރިމަނާއެއް އަންނާނެއެވެ.
ލިޓޮން މަރާލާފައިވަނީ އޭނާގެ އަތުގައި ހުރި ފައިސާތަކެއްގެ ބޭނުމުގައި ކަމަށް ތަހުގީގަށް ވަނީ ހާމަވެފައިކަމަށް ޕްރޮސެކިއުޓަރ ޖެނެރަލްގެ އޮފީހުން ވިދާޅުވެފައިވެއެވެ. ލިޓޮން މަރާލާފައިވަނީ އޭނާއަށް ނޭނގި ހުއްޓައި، ކ.ގަލުފަޅު ކިޔާ ސަރަޙައްދު ކައިރިއަށް މޫދަށް، އޭނާ ކޮށްޕާ ވައްޓާލައިގެންކަމަށްވެސް ތަހުގީގަށް ހޯދިފައިވާކަމަށް ޕީޖީން ވިދާޅުވިއެވެ. ގެ އިތުރުން ހެދޭކުރި ދޯނީގައި ހުރި މުޙައްމަދު ލިޓޮންގެ ފަންސާސް އެއްހާސް ރުފިޔާއަށް ވުރެ ގިނަ ފައިސާ، މުޙައްމަދު ނިޒާމް ވަގަށް ނަގާފައިވާކަމަށްވެސް ތަޙްގީގަށް ހާމަވެފައިވާކަމަށް ޕީޖީ އޮފީހުން ވިދާޅުވިއެވެ