ސަރުކާރުން ޔުނިވަރސިޓީތަކުގެ މުސާރައަށް ގެނެވުނު ބަދަލާއިއެކު، މި ދާއިރާގައި މަސައްކަތް ކުރައްވާ ބޭފުޅުންގެ މަސައްކަތުގެ އަގުވަޒަންކޮށް، އެކަން ސަރުކާރުން ބަލައިގެންފިކަން ހާމަވާކަމަށް ޤައުމީ ޔުނިވަރސިޓީގެ ޑެޕިއުޓީ ވައިސް ޗާންސެލަރ ވިދާޅުވެއްޖެއެވެ.
ޕީއެސްއެމް ނިއުސް ރާއްޖެ މިއަދުގައި ވަހަކަދައްކަވަމުން ޤައުމީ ޔުނިވަރސިޓީގެ ޑެޕިއުޓީ ވައިސް ޗާންސެލަރ ހުސައިން ހަލީމް ވިދާޅުވީ ޔުނިވަރސިޓީތަކާއި މަތީ ތައުލީމީ ފޯރުވައިދޭ މަރުކަޒުތަކުގެ މުސާރައަށް ގެނައި ބޮޑު ކުރިއެރުމާއެކު އޭގެ ހެޔޮ ނަތީޖާ ފެނިގެންދާނެކަމަށެވެ.
ޤައުމީ ޔުނިވަރސިޓީގެ ޑެޕިއުޓީ ވައިސް ޗާންސިލަރ ވިދާޅުވީ ޔުނިވަރސިޓީގެ މުވައްޒަފުންގެ މުސާރައަށް ބަދަލެއް އައިސްފައިވަނީ މީގެ 12 އަހަރު ކުރިންކަމަށާއި މިހާރު މިއައި ބަދަލުތަކާއެކު ޔުނިވަރސިޓީއަށް ދަތިވެފައިވާ އެތައް ކަންތައްތަކެއް ފަސޭހަވެގެންދާނެކަމަށެވެ.
ހަލީމް ވިދާޅުވީ ކުރިން އެތައް ފަހަރެއްގެ މަތިން އިއުލާނުކޮށްގެންވެސް ލެކްޗަރއިން ލިބުން ދަތިކަމަށެވެ. ނަމަވެސް މިގެނެވުނު ބަދަލުން އެކަމަށް ދާއިމީ ހައްލެއް ލިބިގެންދާނެކަމަށް އޭނާ ވިދާޅުވިއެވެ.
"މި ބަދަލުން ފުލްޓައިމް މަސައްކަތް ކުރާނެ ލެކްޗަރާއިން ހޯދުމުގައި ދަތިކަމެއް ކުރިމަތި ނުވާނެ ކަމަށް އުންމީދުކުރަނީ" ހުސެއިން ހަލީމް ވިދާޅުވިއެވެ.
ހަލީމްގެ ވާހަކަފުޅުގައި ވަނީ މުސާރައަށް އައި ހެޔޮ ބަދަލާއެކު ރާއްޖެއިން ބޭރުން ބޮޑު ހަރަދުކޮށްގެން ލެކްޗަރާއިން ގެނައުން ނިމުމަކަށް އަންނާނެކަމަށެވެ. އަދި މިކަމުގެ ސަބަބުން މި ދާއިރާއަށް ކުރިމަތިލާ ދިވެހިން އިތުރުވާނެކަމަށްވެސް ހަލީމް ވިދާޅުވިއެވެ.
މިމަހުގެ 1 ވަނަ ދުވަހުން ފެށިގެން ދިވެހިރާއްޖޭގެ ޤައުމީ ޔުނިވަރސިޓީއާއި، މޯލްޑިވްސް އިސްލާމިކް ޔުނިވަރސިޓީއާއި މޯލްޑިވްސް ޕޮލިޓެކްނިކްގެ މުވައްޒަފުންގެ މުސާރަ ވަނީ ބޮޑުކޮށްފައެވެ.
ސަރުކާރުން ގެނައި ބަދަލާއެކު 327 މުވައްޒަފުންގެ މުސާރައަށް ވަނީ ކުރިއެރުން ލިބިފައެވެ. އޭގެ ތެރޭގައި ޔުނިވަރސިޓީ އެކަޑަމިކް ޕްރޮފެޝަނަލުންގެ ގޮތުގައި މަސައްކަތް ކުރާ 276 ލެކްޗަރަރުންނާއި ހަޔަރ އެޑިއުކޭޝަން އިންސްޓިޓިއުޓްތަކުގެ މެނޭޖަރުންގެ ގޮތުގައި މަސައްކަތްކުރާ 30 މުވައްޒަފުންގެ އިތުރުން ހަޔަރ އެޑިއުކޭޝަން އިންސްޓިޓިއުޝަންތަކުގެ ފަންކްޝަނަލް ޕްރޮފެޝަނަލުންގެ ގޮތުގައި މަސައްކަތް ކުރާ 3 މުވައްޒަފުން ހިމެނެއެވެ. އަދި ވޮކޭޝަނަލް އެޑިއުކޭޝަން ޕްރޮފެޝަނަލުންގެ ގޮތުގައި މަސައްކަތްކުރާ 18 މުވައްޒަފުން ހިމެނެއެވެ.
މިއައި ބަދަލާއެކު މިއަހަރު 52 މިލިޔަން ރުފިޔާ އަދި ކުރިއަށް އޮތްތަނުގައި އަހަރަކަށް 62 މިލިޔަން ރުފިޔާ މިކަމަށް ޚަރަދުވާނެކަމަށް ސަރުކާރުން ބުނެއެވެ.