ވަދު މަސްވެރިކަމާއި ސްޕޯޓް ފިޝިންއަށް ޚާއްޞަ ކަނދުފަތިތަކެއް ހަރުކުރުމުގެ ޕްރޮގްރާމެއް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއިން ވަނީ ފަށާފައެވެ. އެކި މަރުހަލާތަކަކަށް ބަހާލައިގެން ކުރިއަށްގެންދާ މި މަސައްކަތުގައި އެންމެ ފުރަތަމަ ކަނދުފަތި އަޅަނީ ދެކުނުގެ 3 އަތޮޅު ކަމަށްވާ ގއ، ޏ އަދި ސ އަތޮޅުގައެވެ.
ފިޝަރީޒް މިނިސްޓްރީން ވިދާޅުވީ، މި ބުރުގައި ދެކުނުގެ 3 އަތޮޅުގައި އެޅުމަށް ހަމަޖެހިފައިވާ ކަނދުފަތިތައް އަޅާ ނިމިފައިވާކަމަށެވެ.
ކަނދުފަތި ހަރުކުރުމުގެ ޕްރޮގްރާމަކީ ރާއްޖޭގެ ރައްޔިތުންނަށް އާމްދަނީ ހޯދޭނެ އިތުރު ފުރުޞަތުތަކެއް ފަހިކޮށްދިނުމުގެ ގޮތުން ގެސްޓް ހައުސް ވިޔަފާރިއާއެކު މިހާރު ފުޅާވަމުން އަންނަ މުނިފޫހިފިލުވުމަށް ކުރާ މަސްވެރިކަމާއި ސްޕޯޓް ފިޝިންގއަށާއި ކެއިން ބުއިމުގެ ބޭނުމަށް ރަށާއި ކައިރިން މަސްވެރިކަންކުރުމުގެ ފުރުޞަތު ފަހިކޮށްދިނުމުގެ ގޮތުން ކުރިއަށްދާ ޕްރޮގްރާމެއްކަމަށް ފިޝަރީޒް މިނިސްޓްރީން ބުނެއެވެ.
މިދިޔަ ބުރާސްފަތިދުވަހު ފެށި މި ޕްރޮގްރާމުގެ ދަށުން 4 ވަދު ކަނދުފަތި ވަނީ އަޅާފައެވެ. އެގޮތުން ވަދު ކަނދުފަތި ހަރުކޮށްފައިވަނީ ގއ. މާމެންދޫގެ އިރުން 4.5 މޭލު ބޭރުގައި އާއި، ޏ. ފުވައްމުލައް އިރުދެކުނު ގައްޔާއި، ސ. ހުޅުމީދޫގެ އިރު ދެކުނުން 6 މޭލު ބޭރުގައި އާއި، ސ. ގަމުގެ ދެކުނުން 5 މޭލު ބޭރުގައެވެ.
މި ވަދު ކަނދުފަތިތަކާއެކު ރާއްޖޭގައި މަސްވެރިކަންކުރުމަށް އަންނަ ފަތުރުވެރިންނަށް މުޅިން އައު ފުރުޞަތުތަކެއް ހުޅުވި މިމަސައްކަތުގައި ޙަރަކާތްތެރިވާ ޒުވާނުންނަށް މަސްވެރިކަމުގެ ދާއިރާއިން އާމްދަނީ ހޯދުމުގެ އައު ދޮރެއް ހުޅުވިގެންދާނެކަމަށް ފިޝަރީޒް މިނިސްޓްރީން ބުނެއެވެ. އަދި ކުދި އުޅަނދުފަހަރުގައި މަސްވެރިކަންކުރާ ފަރާތްތަކަށް ރަށާއި ކައިރިން ދެމެހެއްޓެނިވި ގޮތެއްގައި ރައްކާތެރިކަމާއިއެކު މަސްވެރިކަންކުރުމުގެ ފުރުޞަތު ފަހިވެ އޭގެ ސަބަބުން ކާނާގެ ޔަޤީންކަން އިތުރު ވެގެންދާނެކަމަށް މިނިސްޓްރީން ވަނީ ބުނެފައެވެ.
ވަދު މަސްވެރިކަމަށް ޚާއްސަ ކަނދުފަތި ފަރުމާކޮށްފައިވަނީ ދޮށީގެ މަސްވެރިކަމަށް ޚާއްސަކޮށްފައިވާ ކަނދުފަތިތަކާއި ވަކިކުރުމަށް ފަސޭހަ އަދި ހޯދަން ފަސޭހަވާ ގޮތަށް "ރީނދޫ" ކުލައިގައެވެ. މިކަނދުފަތިތައް ޤާއިމްކުރަނީ ރަށްރަށުގެ ވަށައިގެން 3 މޭލާއި 6 މޭލާއި ދެމެދުގެ ދުރުމިނުގައެވެ.
މިޕްރޮގްރާމުގެ ދަށުން ރާއްޖޭގެ އެކި ސަރަޙައްދުގައި ވަދު ކަނދުފަތި ޤާއިމްކުރުމުގެ މަސައްކަތް ފިޝަރީޒް މިނިސްޓްރީން މިއަހަރުތެރޭގައި ކުރުމަށް ހަމަޖެހިފައިވާ ކަމަށް އެމިނިސްޓްރީން ވިދާޅުވެއެވެ. އެގޮތުން މިހާރު ޕްލޭންކޮށްފައިވާގޮތުން މުޅި ޖުމްލަ 35 ވަދު ކަނދުފަތި އެޅުމަށް ހަމަޖެހިފައިވާކަމަށް ފިޝަރީޒް މިނިސްޓްރީން މައުލޫމާތުދެއެވެ.