ރަޝިޔާގެ ދިފާޢީ ވަޒީރު ސަރްގޭ ޝޮއިގޫ ޔޫކްރެއިނުގެ ދެކުނުގައިވާ ބަނދަރުމަތީ ރަށް މަރިޔުޕޮލްއަށް ޒިޔާރަތް ކުރައްވައިފިއެވެ. ޝޮއިގޫ މަރިޔުޕޮލަށް ޒިޔާރަތް ކުރައްވާފައި މި ވަނީ، ރަޝިޔާގެ ފައުޖުތަކުން އެ ރަށަށް ވަރުގަދަ ހަމަލާތަކެއްދީ، އެ ރަށް ސުންނާފަތިކޮށްލުމަށް ފަހު އެ ރަށް ހިފިތާ އަހަރެއްހާ ދުވަސް ފަހުންނެވެ. މަރިޔުޕޮލްއަކީ ދޮމްބާސްގައި ހިމެނޭ ޑޮނެޓްސްކުގެ ރަށެކެވެ.
ރަޝިޔާގެ ފައުޖުތަކުން މަރިޔުޕޮލް ހިފާފައި ވަނީ، އެ ޤައުމުގެ ފައުޖުތަކުން ޔޫކްރެއިނަށް އަރައި ފަށާފައިވާ ހަނގުރާމައިގެ ކުރީކޮޅެވެ. ރަޝިޔާ ސިފައިން ޔޫކްރެއިނަށް އަރާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައަށް އެއް އަހަރު ވެފައިވާއިރު، ރަޝިޔާ ސިފައިން ވަނީ ޔޫކްރެއިނުގެ އިރުމައްޗާއި ދެކުނުގެ ބައެއް ސަރަޙައްދުތައް އެ މީހުންގެ ބާރުގެ ދަށަށް ގެންގޮސްފައެވެ.
ޝޮއިގޫ މަރިޔުޕޮލްއަށް ވަޑައިގަންނަވާފައި މި ވަނީ، ރަޝިޔާގެ ފައުޖުތަކުން ޑޮނެޓްސްކުގެ އެހެން ރަށެއް ކަމުގައިވާ ބަޚްމުތް ހިފުމަށް ވަރުގަދަ ހަނގުރާމައެއް ކުރަމުންދާ ދަނޑިވަޅެއްގައެވެ. ރަޝިޔާގެ ފައުޖުތަކުން މިހާރު ބަޚްމުތް ވަށައިލާފައިވާ ކަމަށް ރަޝިޔާއިން ބުނެއެވެ.
ސިނާޢީ މަސައްކަތްތައް ކުރާ ބަޚްމުތް ހިފުމަށް ރަޝިޔާގެ ފައުޖުތަކުން މަސައްކަތް ފަށާފައި ވަނީ މީގެ ހަތް ވަރަކަށް މަސް ކުރިންނެވެ. ބަޚްމުތް ހިފުމަށް ކުރަމުންދާ ހަނގުރާމައިގައި އެންމެ އިސް ދަޢުރެއް އަދާކުރަމުން ދަނީ ރަޝިޔާގެ ޚާއްޞަ ފައުޖުތަކުގެ ސިފައިންނާއި، ވެގްނާ ގުރޫޕުގެ ކުލީ ސިފައިންނެވެ.
އެ ރަށް ހިފުމަކީ، ރަޝިޔާގެ ސިފައިންނަށް ލިބޭނެ ވަރަށް މުހިންމު ކާމިޔާބީއެއްގެ ގޮތުގައި މަސްރަޙު ދިރާސާކުރާ ފަރާތްތަކުން ދެކެއެވެ. ސަބަބަކީ، ބަޚްމުތް ހިފުމުން، އެ ރަށް ހިމެނޭ ދޮންބާސް ސަރަޙައްދުގެ އެހެން ރަށްތަކާއި އަވަށްތައް ހިފުމަށް ރަޝިޔާ ސިފައިންނަށް މަގުފަހިވެގެންދާނެތީއެވެ. ދޮންބާސް މިހާރު ވެސް އޮތީ ރަޝިޔާގެ ކޮންޓްރޯލްގެ ދަށުގައި ކަމަށް އެ ޤައުމުން ބުނި ނަމަވެސް، ބައެއް ރަށްތަކުގައި އަދިވެސް ޔޫކްރެއިން ސިފައިން ދަނީ ހަނގުރާމަ ކުރަމުންނެވެ.
ޝޮއިގޫއަކީ ހަނގުރާމަ ފެށިފަހުން ޔޫކްރެއިނުގެ އިރުމަތީގެ ސަރަޙައްދަށް ޒިޔާރަތްކުރައްވާ ރަޝިޔާގެ އެންމެ އިސް އޮފިޝަލެވެ. މަރިޔުޕޮލްއަށް އޭނާ ކުރެއްވި ދަތުރުފުޅުގައި، ހަނގުރާމައިގައި ސުންނާފަތިކޮށްލާފައިވާ ސަރަޙައްދުތައް ބައްލަވައިލައްވާ، އެ ރަށް އަލުން ބިނާކުރުމަށް ރަޝިޔާއިން ކުރަމުންދާ މަސައްކަތްތައް ބައްލަވައިލެއްވި ކަމުގައި ރަޝިޔާގެ ދިފާޢީ ވުޒާރާއިން ބުނެއެވެ.
މި ގޮތުން، ރަޝިޔާއިން މަރިޔުޕޮލްގައި ބިނާކޮށްފައިވާ ޞިއްޙީ ފަރުވާދޭ މަރުކަޒަކާއި، ކުއްލި ހާލަތްތަކުގައި ހަރަކާތްތެރިވާ މީހުން ތިބޭ މަރުކަޒަކަށް ޒިޔާރަތް ކުރެއްވި ކަމުގައި ރަޝިޔާގެ ދިފާޢީ ވުޒާރާއިން ބުންޏެވެ. މީގެ އިތުރުން، ރަޝިޔާއިން ބިނާކޮށްފައިވާ ފަސް ބުރީގެ އެޕާޓްމަންޓް ޢިމާރާތްތަކެއް ވެސް އޭނާ ބައްލަވައިލެއްވިއެވެ. މަރިޔުޕޮލްގައި ގިނަ ޢަދަދެއްގެ އެޕާޓްމަންޓް ޢިމާރާތްތައް ބިނާކުރަމުންދާ ކަމުގައި ރަޝިޔާގެ ދިފާޢީ ވުޒާރާއިން ބުނެއެވެ.
ރަޝިޔާއިން މަރިޔުޕޮލްގައި ހިންގަމުންދާ ޢުމްރާނީ ތަރައްޤީގެ މަޝްރޫޢުތަކަކީ، ރަޝިޔާގެ ދިފާޢީ ވުޒާރާގެ އިސްވެރިންނަށް މާލީ ގޮތުން ފައިދާތައް ލިބޭ ގޮތަށް ރާވާފައިވާ މަޝްރޫޢުތަކެއް ކަމުގައި ރަޝިޔާ ސަރުކާރާ ދެކޮޅު ފަރާތްތަކުން ތުހުމަތު ކުރެއެވެ. އަދި، މިއީ ކޮރަޕްޝަނަށް މަގުފަހިވާ ގޮތަށް ހިންގަމުންދާ މަޝްރޫޢުތަކެއް ކަމުގައި ވެސް އެ ފަރާތްތަކުން ތުހުމަތު ކުރެއެވެ.
މަރިޔުޕޮލްގެ އިތުރުން، ޔޫކްރެއިނުގެ އިރުމަތީގައި ރަޝިޔާއިން ގާއިމުކޮށްފައިވާ އަސްކަރީ މަރުކަޒަކަށް ވެސް ޝޮއިގޫ ވަޑައިގެންނެވި ކަމަށާއި، ޔޫކްރެއިނުގައި ހަނގުރާމަ ކުރަމުންދާ ރަޝިޔާ ސިފައިންގެ ފައުޖުތަކުގެ އިސް ކޮމާންޑަރުންނާ ބައްދަލުކުރެއްވި ކަމުގައި ވެސް ރަޝިޔާގެ ދިފާޢީ ވުޒާރާއިން ބުނެއެވެ. ނަމަވެސް، އޭނާ ޔޫކްރެއިނަށް ވަޑައިގެންނެވި ތާރީޚެއް ހާމަކޮށްފައެއް ނުވެއެވެ.