ޕައިލިންގ މަސައްކަތަށް ހުޅުލޭގެ އިރުއުތުރު ފަރާތުގައި އަޅާފައިވާ އުޅަނދުތައް ނަގަން އަންގައިފި
ހުޅުލޭގެ އިރުއުތުރު ފަރާތުގައި ޕައިލިންގ މަސައްކަތް ކުރުމަށްޓަކައި، އެ ސަރަހައްދުގައި އަޅާފައިވާ ކަނޑު އުޅަނދުތައް ނަގަން އަންގައިފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ބުނީ ހުޅުލޭގެ އިރުއުތުރު ފަރާތުގައި ހުޅުލެއާއި ހުޅުމާލޭގެ ފަޅު ވަކި ކުރުމަށްޓަކައި، ވޯޓަރ ފެންސް ޖެހުމަށް ހަރުކޮށްފައިވާ އޮރެންޖު ބޮއި ސަރަހައްދުގައި ޕައިލިންގ މަސައްކަތް ކުރުމަށް ހަމަޖެހިފައިވާކަމަށެވެ. އެެހެންކަމުން އެ މަސައްކަތްކުރުމަށް އެސަރަހައްދުގައި އަޅާފައިވާ ކަނޑު އުޅަނދު ފަހަރުތައް 2023 މާރިޗު 9 ވަނަ ދުވަހުގެ ކުރިން ނެގުމަށް އެމްއޭސީއެލްއިން ވަނީ އަންގާފައެވެ.
އެމްއޭސީއެލްއިން ވަނީ ކަނޑު އުޅަނދު ފަހަރުގެ ރައްކާތެރިކަމަށްޓަކައި ވޯޓަރ ފެންސް ޖެހުމަށް ހަރުކޮށްފައިވާ އޮރެންޖު ބޮއިން ފެށިގެން އުތުރަށް (ހުޅުމާލެ ފަޅިއަށް) 20 މީޓަރު ނުވަތަ 65 ފޫޓުގެ ދުރުމިނެތް ބެހެއްޓުމަށް އިލްތިމާސްކޮށްފައެވެ. އަދި އެ ސަރަހައްދަށް ވަނުން މަނާކޮށްފައި އޮތްވާ އެ ސަރަހައްދަށް ވަންނަ އެއްވެސް ކަނޑު އުޅަނދު ފަހަރަކަށް ލިބޭ ގެއްލުމުގެ ޒިންމާއެއް މޯލްޑިވްސް އެއަރޕޯޓްސް ކޮމްޕެނީ ލިމިޓެޑްއިން ނުނަގާނެ ވާހަކަވެސް އެ ކުންފުނިން ބުނެއެވެ.
އެމްއޭސީއެލްއިން ބުނީ މިމަހުގެ 10 ވަނަ ދުވަހުން ފެށިގެން ހުޅުލޭގެ އިރުއުތުރު ފަރާތުގައި ބަހައްޓާ ކަނޑު އުޅަނދު ފަހަރު ދިވެހި ފުލުހުންގެ ހިދުމަތުން ނަގަމުންދާނެކަމަށެވެ.