ދުނިޔޭގެ މުއްސަނދި ޤައުމުތަކާއި ބޮޑެތި ވިޔަފާރި ކުންފުނިތަކުން ކުދި އަދި ފަގީރު ޤައުމުތަކާ މެދު އިހާނެތިކޮށް އަމަލުކުރަމުންދާ ކަމަށް ތުހުމަތު ކުރައްވައި، އ.ދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް މުއްސަނދި ޤައުމުތަކާއި ކުންފުނިތަކަށް ވަރަށް ބޮޑަށް ފާޑުވިދާޅުވެއްޖެއެވެ. މިހާރު ޤަޠަރުގައި ކުރިއަށްދާ އ.ދ.ގެ އެންމެ ކުޑަކޮށް ތަރައްޤީވެފައިވާ ޤައުމުތަކުގެ (އެލް.ޑީ.ސީ) ފަސްވަނަ ކޮންފަރެންސްގައި ތަޤުރީރު ކުރައްވަމުން ގުތެރޭޝް ވިދާޅުވީ، މިއީ ވަރަށް ބޮޑަށް ކަންބޮޑުވާ، އަދި ހިތާމަކުރައްވާ ކަމެއް ކަމުގައެވެ.
ގުތެރޭޝް ވިދާޅުވީ، ދުނިޔޭގެ ބޮޑެތި މުއްސަނދި ޤައުމުތަކާއި ބޮޑެތި ވިޔަފާރިތަކުން ފަގީރު ޤައުމުތަކަށް ބޮޑެތި އިންޓްރެސްޓް ރޭޓުތަކުގައި މުދާ ވިއްކަމުންދާ ކަމުގައެވެ. އަދި، މި ކަމުގައި އިސްކޮށް ހަރަކާތްތެރިވަނީ ހަކަތައިގެ ދާއިރާގައި ހަރަކާތްތެރިވާ ކުންފުނިތައް ކަމުގައި އޭނާ ވިދާޅުވިއެވެ. އޭނާ އިޝާރާތްކުރައްވާފައި މި ވަނީ، ކުދި އަދި ފަގީރު ޤައުމުތަކަށް ބޮޑު އަގާއި ބޮޑެތި އިންޓްރެސްޓް ރޭޓުތަކުގައި ތެޔޮ ވިއްކާ ކުންފުނިތަކަށެވެ.
"ތެލާއި ހަކަތައިގެ ދާއިރާގައި ހަރަކާތްތެރިވާ ކުންފުނިތަކުން ދަނީ ބިލިޔަނުން އާމްދަނީ ހޯދަމުން. ނަމަވެސް، ފެންނަން އޮތް ހަޤީޤަތަކީ، ފަގީރު ޤައުމުތަކުގެ ރައްޔިތުންގެ މޭޒުތައް މަތީގައި ހައިހޫނުކަން ފިލުވައިލާނެ މިންވަރަށް ކާބޯތަކެތި ވެސް ނެތް ކަން،" ގުތެރޭޝް ވިދާޅުވިއެވެ. އަދި، މުއްސަނދި ޤައުމުތަކުން ދުނިޔޭގެ މާލީ ނިޒާމު ބިނާކޮށް، ބައްޓަންކޮށްފައި ވަނީ އެ ޤައުމުތަކަށް ފައިދާވާނެ ގޮތްތަކަށް ބަލައިގެން ކަމުގައި ވެސް އޭނާ ތުހުމަތު ކުރެއްވިއެވެ.
ދުނިޔޭގެ އެންމެ ކުޑަކޮށް ތަރައްޤީވެފައިވާ ޤައުމުތަކުގެ (އެލް.ޑީ.ސީ) ލިސްޓުގައި ހިމެނެނީ 46 ޤައުމެވެ. ގުތެރޭޝް ވިދާޅުވީ، އެ ޤައުމުތަކަށް އެހީތެރިކަން ފޯރުކޮށްދިނުމަށް މުއްސަނދި ޤައުމުތަކުން އަހަރެއްގެ މައްޗަށް މަދުވެގެން 500 މިލިޔަން ޑޮލަރު ހޭދަކުރަން ޖެހޭނެ ކަމުގައެވެ. އަދި، އެ ޤައުމުތަކަށް ކުރިމަތިވެފައިވާ އިޤުތިޞާދީ ވަޅުގަނޑުތަކުން ސަލާމަތްވުމަށް މުއްސަނދި ޤައުމުތަކުން އެހީތެރިކަން ފޯރުކޮށްދޭން ޖެހޭނެ ކަމުގައެވެ.
ކޮންމެ 10 އަހަރަކުން އެއް ފަހަރު ބާއްވާ އެލް.ޑީ.ސީ. ސަމިޓު މި އަހަރު ފަށާފައި މި ވަނީ، ކޮވިޑް-19ގެ ބަލިމަޑުކަމާ ގުޅިގެން ދެ އަހަރު ދުވަހުގެ ފަސްކުރުމަކަށް ފަހުއެވެ. އެލް.ޑީ.ސީ.ގެ ގޮތުގައި ބެލެވޭ ދުނިޔޭގެ އެންމެ ފަގީރު ދެ ޤައުމުގެ ގޮތުގައި ބެލެވޭ އަފްޣާނިސްތާނާއި މިޔަންމާއިން މި އަހަރުގެ ބައްދަލުވުމުގައި ބައިވެރިއެއް ނުވެއެވެ. ސަބަބަކީ، އ.ދ.އިން އެ ދެ ޤައުމުގައި މިހާރު ވެރިކަންކުރަމުންދާ ސަރުކާރުތައް ބަލައިގަނެފައި ނެތުމެވެ.
ދުނިޔޭގެ އެންމެ މުއްސަނދި ޤައުމުތަކުގައި ބެލެވޭ އެއްވެސް ޤައުމެއްގެ އިސްވެރިޔެއް ވެސް މި އަހަރުގެ ބައްދަލުވުމުގައި ބައިވެރިވެފައެއް ނުވެއެވެ. މި ކަމާ މެދު ވެސް ގުތެރޭޝް ވަނީ ނުރުހުން ފާޅުކުރައްވާފައެވެ. "ޤައުމުތަކަށް އާމްދަނީ ލިބޭނެ މަގެއް ނެތް ނަމަ، އެ ޤައުމުތަކަށް ކުރިމަތިވެފައިވާ އިޤުތިޞާދީ ހާލަތުން އަރައެއް ނުގަނެވޭނެ. ޚާއްޞަކޮށް، ދަރަނި ބޮޑުވުމަކީ މީގެ އެންމެ ބޮޑު މައްސަލަ. ކޮވިޑް-19އަށް އިޖާބަދޭން ވެސް އެ ޤައުމުތަކުން ވަނީ ނުކުޅެދިފައި،" ގުތެރޭޝް ވިދާޅުވިއެވެ.
ކޮވިޑް އިޖާބަކީ، އެލް.ޑީ.ސީ.ތަކުން އެންމެ ބޮޑަށް ހިތްހަމަނުޖެހުން ފާޅުކޮށްފައިވާ އެއް މައްސަލައެވެ. މި ގޮތުން، ދުނިޔޭގެ އެކި ކަންކޮޅުތަކަށް ވެކްސިން ފޯރުކޮށްދިނުމުގައި އިންސާފުން ބޭރުން އަމަލުކޮށްފައިވާ ކަމަށާއި، ފަގީރު ޤައުމުތަކަށް ބޭނުންވާ މިންވަރަށް ވެކްސިން ފޯރުކޮށްދީފައި ނުވާ ކަމަށް އެ ޤައުމުތަކުން ޝަކުވާ ކުރިއެވެ. އަދި، ވެކްސިންގެ ބޮޑު ބައި ފޮނުވާފައި ވަނީ ވިލާތާއި އުތުރު އެމެރިކާގެ މުއްސަނދި ޤައުމުތަކަށް ކަމުގައި އެލް.ޑީ.ސީ.ގެ ޤައުމުތަކުން ބުނެއެވެ.