އެމްޑީޕީގެ ރިޔާސީ ޕްރައިމަރީ ބާޠިލްކުރުމުގެ އިޙްތިސާސް ކޯޓަށް ނެތްކަމަށް އެމްޑީޕީން ބުނުމުން، ޕްރައިމަރީގެ ނަތީޖާއަށް ޢަމަލުކުރުން ފަސްކުރުމުގެ ވަގުތީ އަމުރެއް ނެރުމާ މެދު ގޮތެއް ނިންމުން ސިވިލް ކޯޓުން ފަސްކޮށްފިއެވެ.
އެމްޑީޕީގެ ރިޔާސީ ޕްރައިމަރީ، އެޕާޓީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ ކާމިޔާބުކުރައްވާފައިވަނިކޮށް، ޕްރައިމަރީ ޞައްޙަ ނޫންކަމަށް ކަނޑައަޅައިދިނުމަށް އެދި ސިވިލް ކޯޓަށް މައްސަލަ ހުށައެޅީ ޢަލީ އަމްޖަދު ކިޔާ މީހެކެވެ.
އެމްޑީޕީގެ ޕްރައިމަރީއާއި ގުޅޭގޮތުން ސިވިލް ކޯޓަށް ހުށައަޅާފައިވާ މައްސަލާގައި ވަނީ، ޕާޓީގެ މެންބަރުކަމުން ވަކިކުރުމަކީ، އެ މެންބަރަކާމެދު އެޅޭ ފިޔަވަޅެއްކަން އެމްޑީޕީގެ އަސާސީ ޤަވާއިދުގައި ބަޔާންކުރާއިރު، އެޕާޓީން 39،000 މެންބަރުން ވަކިކޮށްފައިވަނީ އިޖްރާޢަތްތައް ފުރިހަމަ ނުކޮށްކަމަށެވެ. އެހެންކަމުން އެ މެންބަރުންގެ ވޯޓުދިނުމުގެ ހައްގު ގެއްލޭގޮތަށް ބޭއްވި ޕްރައިމަރީ ޞައްހަ ނޫންކަމަށް ކަނޑައަޅައި، އަލުން ޕްރައިމަރީ ބޭއްވުމަށް އެމްޑީޕީގެ މައްޗަށް ޢަމުރުކޮށްދިނުމަށް އޭނާ އެދިފައިވެއެވެ.
އެމްޑީޕީ ޕްރައިމަރީގެ ނަތީޖާއަށް އަމަލުކުރުން ފަސްކުރުމުގެ އަމުރަކަށް އެދިފައިވާތީ ސިވިލް ކޯޓުގައި މިއަދަށް ތައާވަލުކޮށްފައިވަނީ ވަގުތީ އަމުރާ މެދު ވާހަކަ ދެއްކުމުގައި ގޮތެއް ނިންމުމަށެވެ. ނަމަވެސް އެމްޑީޕީން ވަނީ އިޙްތިސާސްއާމެދު ސުވާލު އުފައްދައި، އިޖްރާޢީ މައްސަލަ ހުށައަޅާފައެވެ. އެހެންކަމުން އެކަމަށް ޖަވާބުދެއްވުމަށް 10 ދުވަހުގެ ފުރުޞަތެއް ކޯޓުން ވަނީ މައްސަލަ ހުށައެޅި ފަރާތަށް ދެއްވާފައެވެ.
މަދަނީ އިޖްރާޢަތުގެ ޤާނޫނު ބަޔާންކުރާ ގޮތުގައި މައްސަލަ ނުބެލޭނެކަމަށް ބުނެ އިޙްތިސާސްއާއި މެދު ސުވާލު އުފައްދައިފިނަމަ، އެކަމަކަށް ދަޢުވާ ކުރާ ފަރާތުން ޖަވާބުދާރީ ވާންޖެހޭނެއެވެ. އަދި ކޯޓުން އެކަމށް ގޮތެއް ނިންމަން ޖެހޭނެކަމަށް ބަޔާންކުރެއެވެ.
އެމްޑީޕީގެ ރިޔާސީ ކެނޑިޑޭޓް ކަނޑައެޅުމަށް ޖެނުއަރީ މަހުގެ 28ގައި ބޭއްވި ޕްރައިމަރީގައި ރައީސް ނަޝީދުގެ މައްޗަށް ރައީސް ޞާލިހު ކާމިޔާބު ހޯއްދެވީ ބޮޑު ތަފާތަކުންނެވެ. ޕްރައިމަރީގައި ރައީސް ޞާލިޙަށް %61 ލިބިވަޑައިގެންފައިވާއިރު، އެއީ 24572 ވޯޓެވެ. ރައީސް ނަޝީދަށް ލިބިވަޑައިގަތީ 15631 ވޯޓާއެކު %39އެވެ.