ޔޫކްރެއިނުގެ އިރުމަތީ ޑޮނެޓްސްކުގެ ރަށެއް ކަމުގައިވާ ބަޚްމުތް ހިފުމަށް ރަޝިޔާ ސިފައިން ކުރަމުންދާ މަސައްކަތުގެ ދަށުން، ބަޚްމުތްގެ މަގުތަކުގައި ވެސް ދެ ޤައުމުގެ ސިފައިން މި ވަގުތު ހަނގުރާމަ ކުރަމުންދާ ކަމުގައި އެ ރަށުގެ މޭޔަރުގެ ނައިބު އޮލެންސެންޑަރ މަރްޗެންކޯ ވިދާޅުވެއްޖެއެވެ. ބަޚްމުތް ހިފުމަށް ރަޝިޔާ ސިފައިން މަސައްކަތް ފަށާފައި ވަނީ މީގެ ހަތް ވަރަކަށް މަސް ކުރިންނެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުގެ ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށުމުގެ ކުރިން ބަޚަމުތަކީ 75,000 މީހުންގެ އާބާދީއެއް ދިރިއުޅެމުންދިޔަ، ސިނާޢީ މަސައްކަތްތައް ކުރާ ކުޑަ ރަށެކެވެ. ނަމަވެސް، މިހާރު އެ ރަށުގައި ދިރިއުޅެމުން ދަނީ 4,000 އެއްހާ މީހުންނެވެ.
އެ ރަށަށް ރަޝިޔާ ސިފައިން ދެމުންދާ ވަރުގަދަ ހަމަލާތަކާ ގުޅިގެން، އެ ރަށުގެ ރައްޔިތުން މި ވަގުތު ދިރިއުޅެމުން ދަނީ ހިޔާތަކުގައެވެ. ހަމަލާތަކުގައި އެ ރަށުން ކަރަންޓާއި ގޭހާއި ފެނުގެ ޚިދުމަތް މެދުކެނޑިފައިވާތާ މިހާރު މަސްތަކެއް ފާއިތުވެފައިވާ ކަމުގައި މަރްޗެންކޯ ވިދާޅުވިއެވެ. "މި ރަށުގައި ހަނގުރާމައިގެ ސަބަބުން ގެއްލުން ނުވާ އެންމެ ޢިމާރާތެއް ވެސް މިހާރު ނެތް،" އޭނާ ވިދާޅުވިއެވެ.
އެ ރަށުގެ ވަށައިގެންވާ ސަރަޙައްދުތަކާއި ރަށުގެ މަގުތައް މަތީގައި ވެސް ރަޝިޔާއާއި ޔޫކްރެއިނުގެ ސިފައިން ހަނގުރާމަކުރަމުންދާއިރު، އެ ރަށް ހިފުމަކީ ރަޝިޔާގެ މައި ލަނޑުދަނޑިއަކަށް މި ވަނީ ހަދާފައެވެ. އެ ރަށް ހިފުމަކީ، ޑޮނެޓްސްކުގައި ހިމެނޭ އިތުރު ރަށްތައް ހިފުމަށް ރަޝިޔާ ސިފައިންނަށް މަގުފަހިވާނެ ކަމެއް ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ނަމަވެސް، ބަޚްމުތް ހިފުމަށް ރަޝިޔާ ސިފައިން ކުރަމުންދަނީ ދެކޮޅު ނުޖެހޭ ހަނގުރާމައެއްގެ ގޮތުގައި ސިފަކުރާ މީހުން ވެސް މަދެއް ނޫނެވެ. އެ ރަށް ހިފުމަށް ރަޝިޔާއިން ވަނީ، އެ ޤައުމުގެ ސިފައިންގެ އިތުރުން ޚާއްޞަ ސިފައިންގެ ގުރޫޕުތަކާއި، ވެގްނާ ގުރޫޕުގެ ކުލީ ސިފައިން ފޮނުވާފައެވެ. ނަމަވެސް، އޭގެ ތެރެއިން އެތަކެއް ހާސް ބަޔަކަށް ބަޚްމުތުގައި މަރާ ކުރިމަތިވެފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ބަޚްމުތްގައި މަރުވެފައިވާ ރަޝިޔާ ސިފައިންގެ ޢަދަދު، ޔޫކްރެއިން ފައުޖުގެ ޢަދަދަށްވުރެ ހަތްގުނަ އިތުރުވާނެ ކަމަށް ޔޫކްރެއިނުގެ އަސްކަރިއްޔާއިން ބުނެއެވެ. ނަމަވެސް، އެ ރަށް ހިފުމަށް ކުރަމުންދާ މަސައްކަތުގައި ދަށުން ރަޝިޔާ ސިފައިން ކޮންމެވެސް ވަރެއްގެ ކުރިއެރުންތަކެއް ހޯދާފައިވާ ކަމަށް އިނގިރޭސިވިލާތުގެ އަސްކަރިއްޔާގެ ޖާސޫސީ އިދާރާއިން ދާދިފަހުން ވަނީ ބުނެފައެވެ. އެ ރަށް ވަށައިލާފައިވާ ކަމަށް ވެގްނާ ގުރޫޕުގެ ކުލީ ސިފައިން ވެސް ވަނީ ބުނެފައެވެ.
ޔޫކްރެއިނުގެ އިރުމަތީ ބަނދަރުމަތީ ރަށެއް ކަމުގައިވާ މަރިޔުޕޯލް ރަޝިޔާ ސިފައިން ހިފާފައި ވަނީ ހަނގުރާމައިގެ ކުރީކޮޅު، ތިން މަސް ދުވަހުގެ ވަރުގަދަ ހަމަލާތަކަކަށް ފަހުއެވެ. އަދި، ބަޚްމުތާ 10 ކިލޯމީޓަރު އިރުދެކުނުން އޮންނަ ސޮލޭދާރު ވެސް މިހާރު އޮތީ ރަޝިޔާ ސިފައިންގެ އަތްދަށުގައެވެ. ރަޝިޔާ ސިފައިން އެ ރަށް ހިފާފައި ވަނީ ޖަނަވަރީ މަހުގެ ތެރޭގައެވެ. އެ ރަށް ވެސް ހިފުމުގެ ކުރިން ރަޝިޔާ ސިފައިން ވަނީ އެ ތަން ސުންނާފަތިކޮށްލާފައެވެ.